Формула 1-шампионатот ќе има целосно нова структура за менаџирање на трките во обид да се избегне нова контроверзија како на последната трка од минатата сезона во Абу Даби, тврди Би-би-си.

По драматичниот финиш на сезоната, во кој Макс Ферстапен го помина Луис Хамилтон во последниот круг во Абу Даби кога безбедносното возило се тргна од патеката по необичната наредба на директорот на трката, Мајкл Маси, Мерцедес најави протест, а потоа се откажа, иако побара менување на системот во Ф1.

Според Би-би-си, плановите на ФИА се да се воведат серија безбедносни мерки со кои директорот на трките на Ф1 ќе може да прави послободни одлуки, но без притисок од шефовите на тимовите. Исто така, останува нејасно дали Маси ќе ја задржи својата позиција иако ФИА смета дека тој бил нефер нападнат од шефовите на двата ривалски тима, Тото Волф и Кристијан Хорнер.

Исто така, можна е и ревизија на изборот на стјуардите на трките, кои се независни од директорот на трки и одлучуваат за прекршувањето на правилата.

Интернационалниот олимписки комитет (ИОЦ) открива дека постојат планови за средба со кинеската тениска ѕвезда Пенг Шуаи во Пекинг следниот месец откако 36-годишната тенисерка исчезна од јавната сцена на крајот на 2021 по обвинувањето на поранешниот кинески вицепремиер Жанг Гаоли за сексуален напад.

По овие вести, на Западот почна кампања со името „Каде е Пенг Шуаи“, која се зголеми на Австралија опен кога дел од навивачите се појавија во такви маички. Шампионката од Вимблдон 2013 во двојки неколкупати се појави во јавноста и прати писмо дека е слободна и дека западните медиуми ја извртеле нејзината приказна, а претседателот на ИОЦ, Томас Бах, во ноември имаше видеоразговор со неа. Сега од ИОЦ велат дека ќе има средба за време на Олимпијадата во Пекинг.

„По првиот повик на ИОЦ со Пенг Шуаи на 21 ноември 2021, тимот на ИОЦ е во постојан контакт со неа со постојани разговори секоја недела. Таа ќе ги следи Олимписките игри во Пекинг и ќе го следи кинескиот тим кога ќе има средба со членовите на ИОЦ“, се вели во објавата на портпаролот на ИОЦ.

Олимписките игри во Пекинг почнуваат на 4 февруари со дипломатски бојкот од САД, Австралија и Велика Британија поради човековите права во земјата домаќин.

Претседателот на ФИФА, Џани Инфантино, се обиде да ја разјасни контроверзната изјава дека со одржување светско првенство во фудбал секои две години ќе помогне африканските мигранти помалку да умираат на море.

Швајцарецот преку „Твитер“ објасни дека не му била намера директно да го поврзе мундијалот со заштитата на животот на африканските мигранти.

„Бидејќи моите забелешки пред Советот на Европа беа погрешно интерпретирани и извадени надвор од контекст, сакам да разјаснам дека во мојот говор пораката беше дека сите што се на позиција за носење одлуки имаат одговорност да ја подобрат ситуацијата на луѓето во целиот свет. Ако има повеќе можности, вклучувајќи во Африка, но не само таму, тогаш луѓето ќе ги искористат тие можности во своите земји. Тоа беше обичен коментар, неповрзан со одигрувањето на светските првенства на секои две години“, вели Инфантино.

Инфантино: Со СП на две години ќе има помалку мигранти што умираат на морињата