Спорт
Најбогатиот Европеец и Ред Бул ќе го купат ФК Париз

Францускиот милијардер Бернар Арно во заеднички проект со компанијата Ред Бул се согласи да го купи фудбалскиот клуб Париз, кој во иднина би можел да ја промени фудбалската мапа на оваа земја и Европа.
Париз моментално е лидер во Лига 2 и единствена цел му е да влезе во елитните редови на францускиот фудбал.
Помалку познатиот клуб од „градот на светлината“ почна да се издигнува откако во него инвестираше Кралството Бахреин.
Но, сега купувањето на клубот наводно го договориле Арно и Ред Бул, компанија која веќе го промени односот на силите во Европа со фудбалските проекти од Салцбург и Лајпциг.
Интересно, веста за преземањето на Париз доаѓа неколку дена откако Ред Бул го назначи Јирген Клоп за директор за фудбалски операции.
Како што пренесува „Лекип“, актуелниот сопственик Пјер Фераси (72) се согласил да го продаде мнозинскиот пакет акции во клубот, но ќе задржи 30 отсто од акциите до 2027 година, по што целосно ќе се пензионира.
Арно ќе има 55 % од акциите и ќе биде мнозински сопственик на клубот, додека Ред Бул откупува 15% од акциите, додека не го откупи остатокот од акциите на Фераси до 2027 година.
Арно е најбогатиот Европеец чие богатство се проценува на 191 милијарда долари. Сопственик е на мултинационалната компанија Moët Hennessy Louis Vuitton (LVMH).
Договорот може да биде од големо значење за францускиот фудбал бидејќи може да ја загрози долгогодишната доминација на Пари Сен Жермен, што ќе му даде моќен градски ривал, особено во годините кога вредноста на медиумските права на Лига 1 е значително намалена.
Инаку, ФК Париз е основан пред 55 години (1969), а следната година со Стад Сен Жермен го формира Пари Сен Жермен.
Но, веќе во 1972 година се одвои од ПСЖ и остана во сегашната форма, без значителни резултати.
Тренер на Париз е Стефан Жил, а клубот игра на стадионот „Себастиен Шерлети“, изграден во 1939 година, со капацитет од 20.000 седишта.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Интер без Павар против Барселона

Фудбалерот на Интер, Бенжаман Павард, ќе го пропушти првиот полуфинален натпревар од Лигата на шампионите против Барселона поради повреда на левиот глужд, објавија италијанските медиуми.
Павар се повреди во неделата за време на првенствениот натпревар против Рома (0:1) и нема да патува за Шпанија, објавија „Газета дело Спорт“ и „Скај Италија“.
Францускиот фудбалер се повреди при дуел со противнички играч. Откако доби помош, тој се обиде да ја продолжи играта, но набрзо мораше да го напушти теренот.
Италијанските медиуми објавија дека Маркус Тирам, кој ги пропушти последните три натпревари поради повреда на мускулот, би можел да се врати во тимот на Интер.
Во последните осум дена, Интер претрпе три порази, во првенството против Болоња (0:1) и Рома (0:1) и во реваншот од полуфиналето на Купот против Милан (0:3).
До минатата недела, Интер беше во трка за тројната круна, но по елиминацијата од Купот, тоа веќе не е можно.
Тимот се бори за два трофеи, во Лигата на шампионите и во Серија А, во која, по два последователни порази, падна на второто место на табелата со 71 бод, три помалку од водечкиот Наполи.
Првиот полуфинален натпревар од Лигата на шампионите помеѓу Интер и Барселона ќе се игра во вторник од 21:00 часот во Шпанија.
Во второто полуфинале, во вторник во Лондон, Арсенал го пречекува Пари Сен Жермен во 21:00 часот.
Спорт
Сака ќе го продолжи договорот со Арсенал

Букајо Сака ќе ја продолжи соработката со Арсенал во следните неколку дена.
Најголемата ѕвезда на тимот од Лондон се согласи да потпише нов договор со тимот за кој игра практично целиот свој живот.
Се очекува веста наскоро да биде официјализирана, како и финансиските детали и време траењето на новиот договор.
Сака е во Арсенал од 2008 година, а потпиша професионален договор во 2018 година. Досега има одиграно 257 натпревари за „топџиите“.
Оваа сезона, тој има можност да го одведе Арсенал до финалето на Лигата на шампионите за прв пат од 2006 година.
Спорт
Реал подготвува церемонија за збогување и нова улога за Анчелоти

Најтрофејниот тренер на Реал Мадрид во неговата историја, Карло Анчелоти, ќе ја напушти позицијата ова лето, а „кралскиот клуб“ одлучи достоинствено да се збогува.
Анчелоти ќе го напушти клубот една година пред истекот на договорот, а раководството на клубот одлучи да му ги исплати сите плати што му следуваат според договорот, без оглед на тоа што нема да работи.
Во исто време, тој потоа ќе стане почесен амбасадор на клубот, иако најверојатно ќе стане селектор на бразилската фудбалска репрезентација.
Претседателот на Реал Мадрид, Флорентино Перез, сака да се раздели со Анчелоти на најубав можен начин, без никаква дамка, како што беше случајот претходно при разделбата на некои клупски легенди.
Перез планира да му приреди на италијанскиот тренер посебна церемонија за време на последниот натпревар од сезоната против Реал Сосиедад, кога треба да му биде одадено признание за сите трофеи што ги освоил и неговиот придонес за клубот.