Игор Стефановски – Иџе, најтрофејниот македонски автомобилист, овој викенд во Хрватска ќе одбележи голем јубилеј – 200-та трка во својата кариера.

На патеката во Бузет ќе се вози последната трка од ФИА Европскиот шампионат на ридски патеки (EHC) за 2025 година, каде Иџе ќе настапи со својот Ферари 488 B8, автомобил специјално подготвен за овие патеки. На оваа трка се пријавени дури 241 возач, а Стефановски ќе настапи со бројот 32.

Годинава, во генералниот пласман од првата група на шампионатот, Иџе се наоѓа на втората позиција, а само за потсетување, тој веќе е носител на европската титула во ова натпреварување, во група 1.

„Со силна возбуда, сакам да најавам дека очекувам добра трка. Посакувам да постигнеме одличен резултат и во овој шампионат. Благодарност до мојот неверојатен тим, тимот на Ферари, до моите спонзори и до сите Вас кои ни давате безрезервна поддршка. Оваа трка е посебна, затоа што со неа одбележувам 200 настапи во кариерата – предизвик кој ме мотивира уште повеќе“, изјави Стефановски.

Иџе ја започна својата кариера во 2001 година на патеките во Скопје, а повеќе од две децении подоцна зад себе има богато искуство, титули и победи што го вбројуваат меѓу најдобрите европски возачи на ридски патеки. Во изминатите 199 трки има 83 победи и 122 подиуми.

фото: фејсбук

Жозе Мурињо ќе стане новиот тренер на Бенфика.

„Here we go“, објави фудбалскиот инсајдер, Фабрицио Романо. По отказот што го доби во Истанбул, Мурињо ќе се врати во Бенфика по 25 години.

Мурињо ќе го наследи Бруно Лаж, кој беше отпуштен по изненадувачкиот пораз на Бенфика од Карабаг на отворањето на Лигата на шампионите.

Искусниот Португалец ја започна својата независна тренерска кариера на „Луж“ стадионот, но во својата татковина имаше најголем успех со Порто. Ја освои Лигата на шампионите и Купот на УЕФА, а потоа се пресели во Челзи.

Интересно е што Мурињо, доби отказ во Фенербахче поради елиминацијата од Бенфика во плеј-офот за пласман во главната фаза во Лигата на шампионите со Фенербахче. Иронијата да биде поголема, во целата ситуација, Керем Актуркоглу со чии гол Бенфика го елиминира Фенербахче, се пресели во турскиот тим за 22 милиони евра.

Како што е наведено, Мурињо ќе потпише двегодишен договор, а се очекува дека ќе потпише во текот на денот. Ова значи дека Мурињо по 21 година се враќа во Португалија.

Foto/ EPA

Во Загреб, на Светското првенство во борење се случи скандал. Хрватските власти го депортираа од земјата европскиот шампион во борење Емин Сефешаев.

Емин Сефешаев дојде во Загреб за да се натпреварува на Светското првенство во борење, но наместо на се натпреварува тој заврши во полициска станица, со образложение дека неговата виза е неважечка.

Овој борач има златен медал од Европското првенство 2025 во Братислава во категоријата до 55 килограми во грчко-римски стил.

Полицијата најпрвин влегла во хотелот каде што престојувал Сефешаев, а потоа бил однесен во станица.

Непријатната ситуација ја прекинал претседателот на Светската организација за борење, Ненад Лаловиќ, кој во полициската станица инсистирал, Сефешаев да биде депортиран во Белград, што на крајот се случи со негова помош.

Руските медиуми негираат дека нивниот спортист имал каква било неважечка документација и се изненадени од однесувањето на хрватските власти.

Фото/ Принтскрин