Кошаркарскиот сојуз на Литванија ја одби опцијата да го натурализира играчот на Лос Анџелес Лејкерс, ДиАнџело Расел.

Плејмејкерот истакна дека е заинтересиран да игра за репрезентацијата на Литванија бидејќи неговата девојка Лаура Иваниускас со која има две деца е со литванско потекло.
Расел бил видно заинтересиран да добие литванско државјанство, па во својата објава на социјалните мрежи напиша „ајде да го направиме тоа“.

Желбата нема да му биде исполнета, бидејќи Литванците немаат намера на Расел да му дадат државјанство со кое би имал право да настапува за оваа репрезентација.

„Одлуката на стручниот штаб на националниот тим и селекторот Римас Куртинаитис, како и менаџерот на репрезентацијата Линас Клеиза е дека нема потреба да биде ангажиран Расел. Нивниот став е дека Литванија треба да се сврти кон кошаркарите од сопствената земја. Ако мене ме прашувате тоа е вистинскиот пат“, изјави претседателот на Кошаркарскиот сојуз на Литванија, Миндаугас Балциунас.

Инаку, Литванците во својата репрезентација имаат еден играч кој потоа добил државјанство, тоа е Игнас Браздеикис, кој е роден во САД, но неговите родители се Литванци.

Во својата трета сезона во Лос Анџелес Лејкерс, Расел има просек од 11,5 поени со 4,9 асистенции и 2,3 скока за околу 27 минути на паркетот.

Андре Онана, голманот на камерунската репрезентација и Манчестер јунајтед ја освои овогодинешната награда на Унијата на професионални фудбалери (ФИФПРО) за позитивно влијание врз животите на другите.

„Неговата фондација обезбедува бесплатни медицински услуги и операции низ субсахарска Африка, помагајќи им на речиси 500 деца годишно“, пишува во денешната објава на ФИФПРО на социјалната мрежа „Х“.

ФИФПРО донираше 10 илјади долари на неговата фондација.

„Кога ја основав фондацијата, идејата беше да им помогнам на слепите деца во Камерун. Добивме голема поддршка и оттогаш таа прерасна во невладина организација (НВО) која обезбедува услуги за деца и возрасни во непривилегираните заедници. Носиме лекари и хирурзи, главно од Шпанија, да оперираат во Африка. Во јули оваа година им помогнавме на над 350 луѓе во Јаунде, додека во претходните три години извршивме над 1.200 операции. Овозможуваме и можност за образование на децата без родители“, рече Онана.

Андре Онана е член на Манчестер јунајтед од јуни минатата година, а претходно настапуваше за Интер и Ајакс.

Еден од најпопуларните ММА борци во историјата на овој спорт, Конор Мекгрегор, прв пат се огласи откако беше осуден за силување на Никита Ханд во 2018 година.

Контроверзниот Ирец на социјалната мрежа „Х“ напиша дека признава дека згрешил што влегол во односи со споменатата Никита Ханд, но дека не е виновен за силување, односно дека се било консензуално.

Судењето траеше осум дена, при што беа изведувани докази, додека завршните зборови траеја три дена.

Поротата составена од осум жени го прогласи Мекгрегор за виновен.

Мекгрегор ќе треба да плати отштета од 250.000 евра, но рече дека ќе ја обжали пресудата.

„Луѓето сакаат да слушнат од мене, ми требаше време. Знам дека направив грешки. Пред шест години, никогаш не требаше да одговорам на нејзините посети. Требаше да ја прекинам забавата. Никогаш не требаше да се оддалечам од жената што најмногу ја сакам во светот “, напиша Конор и додаде:

„Колку и да ми е жал, сè што се случи таа вечер беше консензуално и сите присутни сведоци под заклетва се заколнаа на тоа. Му наложив мојот правен тим да се жали на одлуката“.