Спорт
Неста ја презеде Монца
![](https://makfax.com.mk/wp-content/uploads/2024/06/Alessandro-Nesta-Source-Umbria24-630x420-1.jpg)
48-годишниот Алесандро Неста, поранешен легендарен играч на Лацио и Милан, ја презеде тренерската функција во италијанскиот фудбалски прволигаш Монца.
Неста на клупата на Монца го наследи Рафаеле Паладино, кој кариерата ќе ја продолжи во Фиорентина.
Неста потпиша едногодишен договор со Монца, кој автоматски ќе биде продолжен доколку ги оствари целите поставени од клупските челници.
Неста ја започна својата професионална играчка кариера во Лацио, каде настапуваше девет сезони, а потоа се пресели во Милан, со кого двапати ја освои шампионската титула во Серија А, а беше и двократен освојувач на Лигата на шампионите, во 2003 и 2007 година. Кариерата ја заврши играјќи за Монтреал и индискиот тим Ченаиин.
За италијанската репрезентација одигра 78 натпревари и беше член на селекцијата која го освои светскиот шампионат во 2006 година.
Тренерската кариера ја започна во американскиот второлигаш Мајами, а потоа се врати во Италија каде ги тренираше Перуџа, Фросиноне и Реџиана. Минатата сезона Монца го зазеде 12. место во Серија А.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Спорт
Кошаркарите на Бразил го потврдија пласманот на Олимписките игри
![](https://makfax.com.mk/wp-content/uploads/2024/07/kaboklo.jpg)
Кошаркарите на Бразил ја совладаа Летонија со 94:69 во финалето од квалификациите за Олимписките игри.
Со овој триумф избраниците на Александар Петровиќ обезбедија учество на турнирот во Париз.
Бразил на Олимпијадата ќе биде во групата Б со Франција, Германија и Јапонија.
Бруно Кабокло го предводеше бразилскиот тим до победата со 21 поен и четири скока, Лео Мејндл имаше поен помалку и осум скока.
Жоргињо Де Паула со 14, Марселињо Хуертас и Гуи Сантос постигнаа по 12 поени. Јаго дос Сантос за нешто повеќе од седум минути на паркетот постигна три поени и две асистенции.
Во литванскиот тим се истакнаа Рихардс Ломаш со 15 поени и пет скока, Роланд Смитс со 14 поени, исто колку и Артурс Жагарс.
Кошаркарскиот натпревар на Олимписките игри ќе се одржи од 27 јули до 10 август.
Спорт
Најстариот играч во историјата на EП 2024 остана без договор!
![](https://makfax.com.mk/wp-content/uploads/2024/07/EU.jpg)
На Европското првенство во Германија, еден од најдобрите стопери на 21 век Португалецот Пепе, на возраст 41 година стана најстариот играч во историјата на Европското првенство.
Во четвртфиналниот пораз од Франција, тој го одигра последниот натпревар во националниот дрес и на тој начин најверојатно се збогуваше со репрезентативните обврски.
На оваа возраст секој натпревар може да биде последен, а Португалецот доживеа нов тежок удар по болната елиминација од ЕП 2024.
Имено, португалскиот гигант Порто одби да ја продолжи соработката со легендарниот стопер, а поранешниот ас на Реал Мадрид остана без договор.
По пет години минати во град на северот на Португалија, дојде време Пепе по втор пат да го напушти својот сакан клуб, но овој пат не по своја волја.
Пепе за прв пат го облече сино-белиот дрес на самиот почеток на кариерата од 2004 до 2007 година, кога во летниот преоден рок се пресели во Мадрид.
Со оглед на тоа дека легендарниот фудбалер веќе наполни 42. години, прашање е дали стоперот ќе успее да најде нов ангажман или ќе се збогува од фудбалот по долгата 22-годишна кариера и 33 освоени трофеи.
Спорт
Иако на ова ЕП играат „лош“ фудбал, Француската репрезентација знае да победува!
![](https://makfax.com.mk/wp-content/uploads/2024/07/FRANTSEEEE.jpg)
По пет натпревари, 480 минути фудбал, и бројни промени на Дидиер Дешамп – Франција успеа да се пласира во полуфиналето постигнувајќи само три гола.
Два беа автогол, додека еден постигна Мбапе од пенал.
Имаше шанси, но тие беа главно производ на индивидуалните квалитети на Мбапе, Дембеле и Баркола. Тактички изгледаше крајно слабо, освен ако тактиката не е да се потпреме на одбраната, на средниот ред и среќата.
Дешамп знае да победува на големи натпреварувања. Впрочем, ги освои и како играч и како тренер.
Јасна е и неговата намера да се потпре на брзината во нападот, како и силата и издржливоста во одбраната. Оправдувањето може да се најде и во отсуство на вистински плејмејкер, поради што селекторот на „триколорите“ посегна по неконвенционално решение.
Во поголемиот дел од турнирот, Нголо Канте играше на позицијата преден играч за врска, поради што очекувано настрада креацијата, но преснигот се зголеми.
Во такви околности, јасно е зошто играта на Франција не е течна и мека, но придобивките се забележуваат од другата страна на теренот.
Ги имаа и убедливо најтешките ривали во нокаут фазата, а мрежите зад Мајк Мењан останаа недопрени. Кога на Канте му се придружуваат Аурелиен Чуамени и Едуардо Камавинга, јасно е зошто француските противници толку се мачеа да постигнат гол.
Јасно е дека Франција ќе се обиде на ист начин да ја неутрализира Шпанија и дека ќе се потпре на еден момент на генијалност од своите напаѓачи за да се пласираат во новото финале на големото натпреварување.
Дешамп има можност да стане единствениот човек кој ги освоил светските и европските првенства и како играч и како тренер и затоа ќе му треба подобра реализација на фудбалерите кои му донесоа големи успеси во минатото.