Лион постигна четири гола во првото полувреме за убедлива 4:1 победа над Монако во неделното француско дерби, за да ја продолжи лошата серија на гостите, кои под новиот тренер Нико Ковач немаат победа во последните три меча.

Карл Токо Екамби постигна два гола, по еден додадоа Мемфис Депај и Хусем Ауар (од пенал) за уште во првото полувреме да се реши победникот на мечот, пред гостите да постигнат утешителен гол од пенал преку Висам Бен Једер. Депај, кој беше прв стрелец на мечот, по голот прати порака кон колегата од холандската репрезентација, Вирџил ван Дајк, кој ги повреди лигаментите на коленото и најверојатно ќе отсуствува цела сезона. Бидејќи и тој самиот имаше слична повреда во минатото, многу добро знае што е потребно за рехабилитација.

Со третата победа во низа, Лион се на шестото место со 13 поени, пет помалку од лидерот ПСЖ, додека Монако се на 12. место со 11 поени.

ЛИГА 1, 8.КОЛО

Бордо – Ним 2:0

Брест – Стразбур 0:3

Мец – Сент-Етјен 2:0

Монпелје – Ремс 0:4

Ница – Лил 1:1

Лион – Монако 4:1

Реал Сосиедад се „созедоа“ и со 4:1 го совладаа новиот прволигаш Уеска, за да се искачат на првото место во шпанската Ла лига по седум кола. Со четири победи во седум меча, клубот од Сан Себастијан има 14 поени, еден повеќе од Реал Мадрид и Гранада, кои остануваат на 13, но со меч помалку.

Микел Ојарзабал ги донесе Сосиедад во водство со гол од пенал во 35. минута, но гостите израмнија на стартот на второто полувреме преку Рафаел Мир. Ојарзабал повторно стрелаше во 54. минута, по што Порту (69. минута) и Александер Исак (75. минута) по асистенција на повратникот во Ла лига, Давид Силва, го потврдија триумфот на домашниот клуб.

Гранада го „заддржа“ изненадувачкото темпо со водечките клубови, откако со гол од пенал славеше на тешкото гостување кај Хетафе со 0:1.

ЛА ЛИГА, 7.КОЛО

Валјадолид – Алавес 0:2

Кадиз – Вилјареал 0:0

Хетафе – Гранада 0:1

Реал Сосиедад – Уеска 4:1



Дејан Кулушевски во финишот на мечот го постигна својот втор гол во дресот на Јувентус, за да помогне „бјанконерите“ да извлечат 1:1 реми против Верона во уште еден неимпресивен меч на Андреа Пирло.

Алваро Мората во 45. минута ја затресе мрежата на гостите, меѓутоа неговиот гол беше поништен поради офсајд, пред во второто полувреме, неверојатна епизодна улога да има поранешниот јуниор на Јуве, Андреа Фавили.

Фавили влезе во игра во 55. минута на местото на Никола Калиниќ, за само пет минути подоцна фантастично да ја заврши убавата акција и да го совлада Војчех Шчесни. Веќе во 62. минута, Фавили мораше да излезе од игра поради повреда!

Јувентус продолжи со притисокот, и откако Пауло Дибала ја стресе пречката, во 78-тата уште една замена, Дејан Кулушевски да постигне убав гол за реми.

По пет кола, Јувентус се на петтото место со 9 поени (2 победи и 3 ремија), три зад лидерот Милан, додека Верона имаат осум поени.

Dejan Kulusevski. One of our own. pic.twitter.com/R7ZXtiikP0

— Max Statman (@eMaxStatman) October 25, 2020