Спорт
Нов шок во тенисот – тенисери и тенисерки им се заканија на грен слем турнирите
Претставниците на топ-20 тенисери и тенисерки доставија јасна листа на барања до организаторите на четирите грен слем турнири.
Само неколку недели откако Професионалната тениска асоцијација (PTPA) ги тужеше водечките тениски авторитети (ATP, WTA, ITIA и ITF), се случи нов потрес во белиот спорт.
PTPA не ги тужеше грен слемовите, но затоа најдобрите тенисери на планетата планираат потенцијално да го сторат ова, и тоа поради парите.
Според информациите на францускиот „Лекип“, 20-те најдобри тенисери испратиле остро барање до Австралија опен, „Ролан Гарос“, Вимблдон и Ју-ес опен и бараат порамноправна распределба на парите.
Тие во писмото наведуваат дека лига како НБА дава минимум 50 проценти од приходот во текот на една сезона на играчите, а во тенисот таа бројка е многу помала. На пример, вкупниот награден фонд на „Ролан Гарос“ лани изнесуваше 53,4 милиони евра, односно само 16 % од приходот на овој турнир (338 милиони).
Претходниот притисок на играчите се исплатеше бидејќи 2022 година забележа значително зголемување на паричните награди, најмногу за победниците на грен слем турнирите (54 %), полуфиналистите (60 %) иза победниците од првото коло (40 %).
Минатата година „Ролан Гарос“ го зголеми наградниот фонд за 7,82 отсто во однос на 2023 година, а победниците во машки и женски сингл добија 2,4 милиона евра.
Кога ќе се соберат сите грен слем турнири, беа поделени вкупно 254 милиони евра наградни средства, што е повеќе од 231 милион од 2023 година, а тие пари ги собраа над 800 натпреварувачи во сите категории.
Сега се очекува реакцијата на организаторите на грен слемовите, пред сè, на „Ролан Гарос“, кој почнува на крајот на мај. Наградниот фонд „Роланд Гарос“ ќе го објави за еден месец.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Хет-трик на Гидсел, повторно е најдобар во светот
Репрезентативецот на Данска, Матијас Гидсел е прогласен за најдобар ракометар во светот во 2025 година во традиционалниот избор на Меѓународната ракометна федерација (IHF).
Матијас Гидсел беше избран за најдобар ракометар на годината, трет пат по ред. Тој е третиот ракометар во историјата кој е прогласен за играч на годината три пати по Никола Карабатиќ и Микел Хансен.
Во 2025 година, Гидсел ја освои титулата светски шампион со данската репрезентација, а беше прогласен и за најкорисен играч (MVP) на планетарното првенство. Тој беше и најдобар стрелец и асистент на Светското првенство.
IHF ја избра Норвежанката Хени Рејстад за најдобра ракометарка во светот во 2025 година. И таа беше прогласена за играч на годината трет пат по ред.
Таа освои злато на Светското првенство минатата година со норвешката репрезентација. Рејстад беше најдобар стрелец, а беше прогласена и за најкорисен играч (MVP) на планетарното првенство.
Португалецот Франциско Коста беше избран за најдобар млад ракометар во 2025 година, додека најдобра млада ракометарка е Фиола Лојхтер од Германија.
Во гласањето учествуваа навивачи, селекторите на националните тимови кои учествуваа на Светското првенство во 2025 година, како и членови на Комисијата за тренинг и методи на IHF.
Фото/ ЕПА
Спорт
Упамекано го продолжи договорот со Баерн
Дајо Упамекано го продолжи договорот со Баерн Минхен до 30 јуни 2030 година, објави германскиот клуб.
Упамекано (27) пристигна во Минхен во сезоната 2021/22 од Лајпциг, а со Баерн досега освои три титули во Бундеслигата и три германски Суперкупа. Во дресот на баварскиот клуб одигра 180 натпреварувачки натпревари, постигна шест гола и запиша девет асистенции.
Генералниот менаџер на Баерн, Јан-Кристијан Дрезден, истакна дека Упамекано израснал во врвен играч во Минхен, додека членот на спортската администрација Макс Еберл нагласи дека францускиот стопер е еден од главните столбови на тимот и пример за развој на играчите во клубот.
Самиот фудбалер рече дека е среќен поради продолжувањето на соработката и дека има големи цели со тимот, со желба да освои повеќе трофеи.
Упамекано одигра 35 настапи и постигна два гола за француската репрезентација, ја освои Лигата на нации во 2021 година и беше дел од тимот што го играше финалето на Светското првенство во 2022 година против Аргентина.
Foto/ depositphotos
Спорт
Јада 83-ти, Клабо го освои осмото олимписко злато во кариерата
Македонскиот репрезентаивец, Ставре Јада, го заврши своето учество на Зимските олимписки игри во Милано и Кортина во петокот. Јада го освои освои 83-то место во трката крос-кантри на 10 километри.
Во трката учествуваа 113 натпреварувачи, Јада ја помина целта како 83-ти, со време од 25:286,9, за 4:52,7 зад олимпискиот шампион. Ставре Јада претходно го освои 88-мо место во трката со спринт.
Златниот медал го освои кралот на овие Игри, Јоханес Хесфолт Клабо. Норвежанецот ја заврши трката за 20:36,02. Ова е негово трето злато на Игрите во Милано и Кортина, а негов осми златен медал – десетти вкупно, бидејќи Клабо има едно сребро и една бронза.
На Клабо му недостига само уште едно злато за да стане најуспешниот олимпиец во крос-кантри. Осум златни медали, и вкупно 12 олимписки медали во кариерата, освои Бјорн Дели.
Сребрениот медал му припадна на Матјас Делож, кој беше фантастичен, францускиот ас ја заврши трката 4,9 секунди зад Клабо. За дваесет и тригодишниот Французин, ова е прв олимписки медал.
Бронзата оди во Норвешка, кај Ејнар Хедегерт, кој имаше задоцнување од 14 секунди. И за него ова е првиот олимписки медал во неговата кариера.
Foto/ EPA

