Спорт
Обамејанг: Само Артета имаше проблем со мене во Арсенал

Пјер-Емерик Обамејанг вели дека менаџерот на Арсенал, Микел Артета, е виновен за неговото заминување во Барселона, упатувајќи последен „удар“ кон Шпанецот по заминувањето од „Емирати“.
На Обамејанг му беше одземена капитенската лента и беше исфрлен од тимот од почетокот на декември поради „дисциплински прекршоци“, пред во јануарскиот преоден рок да го добие посакуваниот трансфер во Барселона. Габонскиот репрезентативец вели дека единствено Артета имал проблем со него и дека немал избор да замине.
„Имаше компликувани месеци во Арсенал, но фудбалот е таков понекогаш. Јас никогаш не сакав да направам нешто погрешно и мислам дека тоа веќе е во минатото и сакам да мислам на иднината. Мојот проблем беше само со Артета и тој направи одлука. Не можам да кажам многу, но не бев среќен. Останав смирен, но не бев среќен“, објаснува Обамејанг.
Тој пристигна во Арсенал од Борусија Дортмунд во јануари 2018, и во првата цела сезона во Премиерлигата (2018/19) беше најдобар стрелец со 22 гола. Тој вкупно постигна 92 гола во 163 настапи за „топчиите“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Иско ја одби Рома

Досегашниот фудбалер на Реал Мадрид, Иско Аларкон, ја одби понудата на Рома. Шпанскиот играч за врска е слободен агент и имаше понуда од тимот на Жозе Мурињо, но на крајот одбра да остане во својата татковина.
Приоритет на Иско е да потпише со клуб кој ќе игра во Лигата на шампионите, што значи дека неговите домашни опции се само Атлетико Мадрид и Севилја, под претпоставка дека неговото минато ќе го оддалечи од Барселона.
Поранешниот репрезентативец на Шпанија има 30 години, но играше се помалку во последните сезони.
Спорт
Филип Антовски од Австрија Виена оди на позајмица во Истра

Kапитенот на младата фудбалска репрезентација на Македонија до 21 година, Филип Антовски, следната сезона ќе ја мине на позајмица во хрватскиот тим Истра. Антовски заминува како позајмен играч од Австрија Виена.
21-годишниот Антовски ја почна кариерата во младионскиот тим на Вардар, потоа замина во Динамо Загреб каде исто така беше дел од Б-тимот. Играше за Славија Софија како позајмен, а потоа се врати во Австрија Виена каде ја мина целата измината сезона. Сега ќе има можност за ново докажување во Истра.
Спорт
Шкупи го почнува патот во Европа: Линколн е тим што мора да се елиминира

Македонскиот првак Шкупи вечерва (20.45 часот) го стартува настапот во квалификациите на Лигата на шампионите. Прв ривал на Шкупи е Линколн од Гибралтар, а тренерот Гоце Седлоски верува дека неговиот тим е подобар и ќе успее тоа да го докаже на претстојниот двомеч. Првиот дуел е вечерва на арената „Тодор Проески“ во Скопје.
„Подготвени сме, максимално. Еден месец работиме и подготвени сме за предизвикот. Нема да го потцениме противникот, апсолутно имаме респект за Линколн Ред Импс затоа што тоа е шампион на една земја, но веруваме во нашиот квалитет. Ние, секако, ќе ја играме нашата игра и сакаме да оствариме победа. Шкупи на секој натпревар игра напаѓачки, тоа секако ќе се случи и утревечер. Треба да покажеме зошто сме шампиони на Македонија“, вели Гоце Седлоски.
Капитенот Кристијан Наумовски е уверен дека Линколн е ривал што Шкупи треба да го елиминира.
„На хартија, го добивме најлесниот ривал. Но, знаеме дека нема да биде лесно. Најважен е првиот нареден натпревар. Засега размислуваме само за Линколн и како да оствариме триумф. Потоа ќе размислуваме за евентуалниот двомеч со Динамо Загреб“, изјави голманот Наумовски.
Во следното квалификациско коло од ЛШ следи дуел со хрватскиот првак Динамо Загреб. Сепак, Шкупи ќе мора прво да го елиминира Линколн.