УЕФА, попладнево во Нион, ги одреди двојките за второто квалификациско коло во Лигата на шампионите.

Шампионот Македонија, Шкендија, доколку во првото коло успее да ја мине Мура, во втората рунда ќе игра против победникот од натпреварот помеѓу Лудогорец од Бугарија и Шахтјор Солигорск од Белорусија.

Дуелите во второто коло ќе се играат на 20 и 21.јули, односно на 27 и 28.јули.

Тешки противници, во второто коло, добија Динамо Загреб и Црвена звезда.

Динамо, на Ареијан адеми и Стефан Ристофски, доколку во првото коло го мине Валур од Исланд, во втората рунда ќе се соочи со шампионот на Кипар, Омонија.

Црвена звезда, во второто коло ќе игра против победникот од дуелот помеѓу Макаби Хаифа од Израел и Каират од Казахстан.

Интересни ќе бидат и пресметките во ткн. „Патеката на следбениците“. Ждрепката ги спои ПСВ Ајндховен и Галатасарај, Рапид Виена и Спарта Прага, односно Селтик и Митјиланд.

На Европското првенство во фудбал, во среда, ќе започне второто коло, во фазата по групи. По одигрувањето на денешните натпревари можат да се дефинираат позициите на репрезентациите, во групите А и Б.

Денот, во 15 часот, ќе го отворат Русија и Финска во Санкт Петербург. Русите, по катастрофалната игра и поразот од Белгија (0:3), немаат право на кикс, за нив победата е императив, доколку сакаат да играа во осмина-финалето.

Финците, по победата во чудниот меч против Данска, ќе играат на бод. Според сите прогнози четири поени во групата се доволни за пласман во нокаут фазата.

Императив на победа ќе имаат и селекциите на Турција и Велс, чии дуел во Баку ќе започне во 18 часот.

Турците ќе мора да го поправат впечатокот од првиот натпревар, кога беа прегазени од Италија со 0:3. Велшаните, по ремито со Швајцарија (1:1), исто така ќе атакуваат на победа. Три бода од овој дуел ќе им ја отворат врата кон осмина-финалето.

Италија, од 21 часот, ќе игра против Швајцарија. Азурите со победа ќе си обезбедат пласман во нокаут рундата.

Премиер лигата го објави распоредот за новата сезона. Сезоната 2021/2022 ќе започне на 14.август.

Манчестер сити, одбраната на шампионската титула ќе ја започнат со гостувањето кај Тотенхем.

Актуелниот европски првак Челси, во првото коло ќе го пречека Кристал Палас, а на Манчестер јунајтед ќе му гостува Лидс. Ливерпул и Арсенал ќе гостуваат кај новите членови на Премиер лигата, Норич односно Брентфорд.

Сезоната во Премиер лигата ќе заврши на 22.мај 2022 година.