Спорт

Официјализирано е спојувањето на Еурофарм Работник и Пелистер

Објавено пред

10 месеци

- 29 ноември, 2019

Од

Денес е потпишан договорот за уредување на капиталната и управувачката структура на РК Еурофарм Работник АД Битола и РК Пелистер АД Битола.

Потписници на договорот се градоначалничката м-р Наташа Петровска во име на Општина Битола како акционер на РК Пелистер АД Битола, Зоран Стерјев, претседател на РК Еурофарм Работник АД Битола, Горан Петровски, во својство на акционер на РК Еурофарм Работник АД Битола и Сашо Шамбевски, генерален директор на РК Пелистер АД Битола.

„Отсекогаш сум се водела од начелото дека спортот треба да биде оставен на спортистите и спортските работници и затоа ценам дека во управните одбори на спортските клубови треба да има спортски работници, меѓутоа и од бизнис-заедницата. Моето залагање како градоначалник е од страна на Општината да се поддржуваат максимално со финансиски средства нивните активности, па РК Пелистер, откако сум градоначалник, има добиено 579.000 евра, што не е сума за занемарување за наши македонски услови. Денес го потпишавме договорот, кој претставува завршница на еден процес, исклучително транспарентен, договорот беше изгласан во Советот, а беше поставен и на веб-страницата на Општината, со што имаа можност и граѓаните да имаат увид во него. Она што посакувам е во периодот што следува ракометна Битола да ја добие славата што ја имаше во минатото“, рече градоначалничката на општина Битола, м-р Наташа Петровска, по потпишувањето.

Претседателот на РК Еурофарм Работник, Зоран Стерјев, истакна дека за менувањето на името на клубот во РК Еурофарм Пелистер во наредниот период ќе бидат преземени сите административни процедури што се однесуваат на EХФ, Ракометната федерација на Македонија и сите други тела.

„Во име на РК Еурофарм Работник сакам да го искажам моето задоволство што по долги преговори, стигнавме до овој момент. Според некои, долги преговори, но според мене, исклучително квалитетни, и тоа е најзначајното, во тоа што го правите да внесете квалитет и темелност, а времето некогаш и не е приоритет кога треба да овозможите иднината да биде светла, особено за нешто што е многу сензитивно за Битола и битолчани, а тоа се ракометот и РК Пелистер. Идејата потекна од спортски работници и поранешни ракометари, кои сметаа дека фузијата на двата сегашни клуба во Битола е основа за да се направи еден поголем исчекор не само на нашите простори туку и на меѓународен терен. Ние сме уверени во тоа дека ќе биде така и ме радува што целокупниот процес се темелеше на исклучителна транспаретнтност, на чесни идеи, а така и ќе продолжи. Основата на оваа платформа за битолскиот ракомет е комплетно да му се врати сјајот на битолскиот ракомет и сите да се гордееме“, посочи Стерјев.

Обврските на Општина Битола се во наредните пет години да даде финансиска поддршка од 15.000.000 денари со цел да се постигнат и меѓународни успеси на клубот.

Градоначалничката Петровска нагласи дека токму во начелото на транспарентност ќе одржи средба со спортските работници од градот со цел да се добијат нивните сугестии и размислувања за програмата за спорт во 2020 година, како и за лоцирање на финансиските средства за наредната година.

©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Поврзани Артикли:sport

Следно

Арсенал го отпуштија Унаи Емери

Претходно

Вилијан сака да остане во Челси

Спорт

Барселона не смее да носи нови играчи

Објавено пред

59 минути

- 20 септември, 2020

Од

TopSport.mk

Доколку не продаде некој од фудбалерите во кои изминатите години вложи многу пари Барселона нема да може да биде активна на трансфер-пазарот тврдат странските медиуми. Ова значи дека Роналд Куман ќе мора да ја истурка сезоната со актуелниот состав.

Според медиумите Ла Лига им забраниле на Барселона да трошат пари поради актуелната финансиска ситуација во клубот која е далеку од идеална.

Клубовите во Шпанија мора да работат според правилникот и преземените финансиски мерки поради новонастанатата ситуација што ја предизвика коронавирусот.

Барселона на плати годишно троши 500.000.000 евра и поради тоа ЛА Лига не ѝ дозволува нови трансфери. Челниците на Ла Лига исклучок би направиле само доколку Барса успее да продаде некој играч (Дембеле, Кутињо…).

Изминатите денови со Барселона се поврзуваше Жоржињо Вајналдум, но како стојат работите овој трансфер нема да се случи.

„Во УЕФА ги гледаат бројките кога ќе заврши сезоната, ние тоа го правиме пред таа да започне. Доколку Барселона се обидат да направат нешто нашите аналитичари веднаш тоа ќе го забележат. Ние имаме финансиски систем кој е поинаков од финансискиот фер-плеј на УЕФА“, рекол Жорис Еверс од Ла Лига.

Според некои се уште непотврдени извештаи поради кризата што ја предизвика коронавирусот Барселона изгубиле 300.000.000 евра.

Прикажи повеќе...

Спорт

Невил: Со вакви дефанзивци Јунајтед никогаш нема да ја освојат титулата

Објавено пред

1 час

- 20 септември, 2020

Од

TopSport.mk

Манчестер Јунајтед лошо влегоа во новата сезона. Во првиот меч на „Олд Трафорд“ Јунајтед беа поразени од Кристал Палас со 1:3. Англиските медиуми во денешните коментари ја потенцираат лошата игра во одбраната на „црвените ѓаволи“.

Со „дрва и камења“ по одбранбената четворка веднаш по мечот, во анализата, фрлаше и поранешниот капитен на на славниот клуб Гери Невил.

„После ова голем ќе биде притисокот врз одбраната. Можеме да зборуваме за Џејдон Санчо колку што сакаме, но на Јунајтед им е потребен дефанзивец кој ќе може да ги брани ситуациите „еден на еден“ и кој ќе може да трча. Без таков играч не може да размислува за титулата. Со вакви централни дефанзивци Јунајтед никогаш нема да ја освои титулата“, рекол Невил и продолжил.

„Јунајтед мора да донесе подобар и подоминантен дефанзивец од Линделоф и Мегваер. Клубот итно мора да донесе централен дефанзивец. Ако се вратите нананзад ќе видите дека секој тандем имал еден брз дефанзивец. „Олд Трафорд“ има голема површина и доколку играше со четворица во последната линија кои одат напред, тогаш мора да бидат подготвени и брзо да се вратат назад“.

Прикажи повеќе...

Спорт

Армстронг за Погачар: Еден од најдобрите настапи во велосипедизмот

Објавено пред

3 часа

- 20 септември, 2020

Од

TopSport.mk

Ленс Армстронг, еден од најголемите измамници во историјата на спортот, му ја честиташе победата на Тур д’Франс на Словенецот Тадеј Погачар. Човекот на кого поради допинг му беа одземени сите седум титули на најпрестижната трка во светот на велосипедизмот се огласи на „Твитер“ по сензационалната победа на Погачар на вчерашниот хронометар.

„Ова беше еден од најдобрите настапи во историјата на велосипедизмот. Апсолутно неверојатна победа на Тадеј Погачар“, напишал Армстронг.

Погачар во претпоследната етапа, хронометарот долг 36,2 километри, успеа да ја стигне и престигне предноста од 57 секунди на сонародникот Примож Роглич.

22 годишникот имаше за речиси две минути подобро време од Роглич и во пресрет на денешната последна етапа има 59 секунди предност во однос на повозрасниот сонародник.

Прикажи повеќе...