Спорт
Олимпик Лион исфрлен од Лига 1

Фудбалскиот клуб Олимпик Лион е исфрлен во втората француска лига поради неусогласеност на финансиите на клубот со прописите на натпреварувањето.
Олимпик Лион е седумкратен шампион на Франција и петкратен освојувач на Купот.
Според француските медиуми, долгот на клубот ја пробил границата од половина милијарда евра.
Во среда, Француската фудбалска федерација ја потврди одлуката донесена минатата зима, во меѓувреме, Лион не успеа да ги „испегла книгите“ и долговите што ги имаше, па следеше драконска казна.
Лион има право да поднесе жалба на оваа одлука од Француската фудбалска федерација.
„Лавовите“ паднаа во финансиска дубиоза кога паднаа во рацете на контроверзниот американски бизнисмен Џон Текстор, кој е сопственик и на Кристал Палас, Ботафого и Моленбек.
По состанокот со француското тело за финансиска контрола на професионалните клубови (DNCG), беше потврдено дека Лион е официјално префрлен во Втората лига – објави Фудбалската федерација на Франција.
Клубот претходно беше под привремена закана од испаѓање, со предупредување дека ќе испадне доколку не ја подобри својата финансиска состојба.
Групацијата „Игл Фудбал“, која е сопственик на Олимпик де Лион, се обиде да го убеди DNCG дека финансиите се подобруваат, го продадоа уделот на Џон Текстор во Кристал Палас, како и женскиот тим на Олимпик Лион.
Сепак, тоа не беше доволно за да се задоволат критериумите што ги бараа властите.
Оваа одлука доаѓа и покрај фактот дека сопственикот на клубот, Џон Текстор, беше оптимист по состанокот. Во разговор со новинарите, тој рече дека финансиската состојба е „значително подобра“ и дека е задоволен од тоа како поминал состанокот:
„Можете да видите дека нашите акционери инвестирале нов капитал, не само поради DNCG, туку и за лиценцирање на УЕФА. Исто така, има добри вести за продажбата на Кристал Палас. Нашата ликвидност сериозно се подобри“,ја пренесе „One Football“ изјавата на човекот кој буквално е „персона нон грата“ во Лион.
Сепак, сето ова не помогна. Како што стојат работите, Лион ќе игра во Втората лига почнувајќи од следната сезона.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Колку е лош Јунајтед на Рубен Аморим?

Мандатот на Рубен Аморим во Манчестер јунајтед стана синоним за неуспех. „Црвените ѓаволи“ синоќа го допреа дното, испаднаа во второто коло во Лига купот од членот на Четвртата лига, Гримзби, што се смета за историски неуспех.
Рубен Маорим, донесен да го стабилизира тимот, стана најлошиот менаџер во поновата историја на славниот клуб. Катастрофата на Јунајтед под Аморим ја покаѓуваат и бројките.
Катастрофата против Гримзби достигнува епски размери бидејќи летово Јунајтед на засилувања потрошија 200 милиони фунти.
Аморим победил на само 24,7 отсто од натпреварите во Премиер лигата, што е најлош учинок на кој било менаџер на Јунајтед по заминувањето на Сер Алекс Фергусон.
За споредба, често критикуваниот Дејвид Мојес имаше половичен успех, победи на 50 отсто од натпреварите, додека Жозе Мурињо е убедливо најдобар со 58,3 отсто победи.
Јунајтед победи само на седум од 29 лигашки натпревари под водство на Аморим, односно тимот победува на еден од четири натпревари, учинок што му доликува на тим во зоната за испаѓање.
Минатата сезона беа освоени само 42 бода, најмалку во историјата на клубот во Премиер лигата, додека 15-то место на табелата е најлошата позиција откако лигата се игра во овој формат.
Тимот постигна само 44 гола во текот на целата сезона, соборувајќи уште еден негативен рекорд.
Јунајтед ретко постигнувал голови во првата половина од натпреварите, во петте најдобри европски лиги, само Џенова била понеефикасна во првите 45 минути од почетокот на сезоната 2024/25.
Фактот дека Аморим има водено повеќе натпревари во Премиер лигата (29) отколку што има добиено (28) е особено разочарувачки.
Во домашните купови и во Европа, против англиски клубови, Аморим има само една победа од пет натпревари, против Арсенал на пенали во ФА Купот.
Тие беа поразени од Тотенхем (двапати), Фулам и во среда од четвртолигашот Гримсби.
Извор/ Би-би-си
Спорт
Милан експресно го договори трансферот на Нкунку

Челзи и Милан експресно го договрија трансферот на напаѓачот Кристофер Нкунку.
Клубовите го договорија трансферот за помалку од 24 часа. Двете страни се согласија за обештетување од околу 35 милиони евра.
Што се однесува до Нкунку, тој ќе потпише петгодишен договор со „росонерите“. Потенцијалниот француски репрезентативец е седмото засилување на Милан, но преодниот рок сè уште не е завршен. Тие би сакале да доведат уште еден напаѓа и стопер на „Сан Сиро“. Главни кандидати во моментов се Душан Влаховиќ и Артим Довбик, односно Мануел Аканџи.
Нкунку дојде во Челзи како големо засилување во 2023 година од РБ Лајпциг за 60 милиони евра. За две сезони, тој одигра 62 натпревари и постигна 18 голови.
Спорт
УЕФА го смени терминот на финалниот меч во ЛШ

УЕФА воведе новитет помалку невообичаен. Од оваа сезона финалето на Лигата на шампионите ќе се одржува во 18:00 часот.
Досега, финалниот меч за највредниот трофеј во клупскиот фудбал се одржуваше во 21:00 часот, но тоа повеќе нема да биде случај.
Како што вели првиот човек на УЕФА, Александар Чеферин, оваа новина е донесена првенствено поради навивачите.
„Со оваа промена, го ставаме навивачкото искуство во центарот на нашите планови. Финалето на Лигата на шампионите е клучен момент од фудбалската сезона и новото време на почеток ќе го направи уште подостапно, инклузивно и важно за сите вклучени. Додека терминот од 21:00 часот е посоодветен за натпревари што се играат во средината на неделата, пораното започнување на финалето во сабота значи порано завршување на натпреварот, без оглед на евентуалните продолженија, пенали. А ова им дава поголема можност на навивачите да уживаат со остатокот од вечерта со своето семејство, пријатели, гледајќи го најважниот натпревар во сезоната“, објасни Чеферин.
Првото финале, кое ќе се игра од 18:00 часот, ќе биде на стадионот „Пушкаш Арена“ во Будимпешта, каде што ќе се игра следниот натпревар за титулата европски шампион.