Фудбалската репрезентација на Јамајка, пласман на Мундијалот ќе се обиде да избори преку интерконтинеталниот бараж. Во последното коло, Јамајка на домашен терен против Курасао не успеа да ја обезбеди победа и пласман на СП. Натпреварот во Кингстон заврши без голови и му овозможи на Курасао да се пласира на Мундијалот наредното лето.

И покрај тоа што Јамајка се уште има шанси да се квалификува за Светското првенство преку Интерконтиненталниот бараж, селекторот реши да поднесе оставка.

Веднаш по натпреварот против Курасао, Стив Мекларен поднесе оставка од функцијата.

„Подобро да си одам“, го започна своето обраќање Мекларен и продолжи:

„Во текот на изминатите 18 месеци се посветив на оваа работа. Водењето на овој тим беше една од најголемите почести во мојата кариера.“

Потоа зборуваше за оставката.

„По длабоко размислување и искрена проценка каде сме и каде треба да одиме, решив да се повлечам од функцијата главен тренер на репрезентација на Јамајка“, рече искусниот тренер и додаде:

„Понекогаш најдоброто нешто што еден лидер може да го направи е да препознае кога е потребен свеж глас, нова енергија и поинаква перспектива за да се движи овој тим напред“.

Што се однесува до Интерконтиненталниот бараж, познати се шесте репрезентации, кои ќе се борат за двете последни места на СП.

Од Азија е Ирак, од Африка ДР Конго, од Океанија Нова Каледонија, од Јужна Америка Боливија, а од Северна и Централна Америка Јамајка и Суринам.

Фудбалската репрезентација на Швајцарија, во Приштина го потврди пласманот на Светското првенство, во натпревар кој што поскоро ќе сака да го заборави капитенот на тимот, Гранит Џака.

Натпреварот од последното квалификациско коло меѓу Косово и Швајцарија заврши со резултат 1:1, што беше доволно за Швајцарците директно да се квалификуваат на Светското првенство.

Пред почетокот на натпреварот, Гранит Џака доби громогласни свирежи од стадионот „Фадиљ Вокри“ во Приштина.

По натпреварот, Џака влезе во конфликт со таканаречениот водач на навивачите на косовската репрезентација, Лулзим Бериша, за на крајот фудбалерот на Сандерленд да каже колку му бил тежок овој гест на навивачите.

„Овие свирежи болат. Тоа е последното нешто што го очекував, особено тука дома. Но, морам да го прифатам тоа. Вакви работи се случуваат во спортот, барем имам поддршка од навивачите на Швајцарија“, рече Гранит Џака.

Фото/ Принтскрин

Фудбалската репрезентација на Шкотска, во фантастичен меч ја победи Данска со 4:2 и се пласира на Светското првенство. Шкотите славеа во Глазгов со спектакуларните голови на Тирни и Меклин во 93-та и 97-та минута од натпреварот.

Со солзи во очите, капитенот на Шкотска, Енди Робертсон, го прослави пласманот на Мундијалот. Пред новинарите се сети на својот голем пријател, Диого Жота.

„Тој беше мојот најдобар пријател во животот. Лик што го сакав и ми недостига секој момент од мојот живот. Беше толку нормален, толку реалистичен, полн со љубов и топлина. Секогаш се шегувавме дека е добродушен како Ирец или Шкотланѓанец Го викав Диого МекЖота“, рече Робертосон и продолжи со солзи во очите.

„Не можев да го извадам Диого од глава. Цел натпревар, цел ден… само тој. Постојано размислував за нашите разговори за Светското првенство. Ова можеби беше мојата последна шанса да одам на Светско првенство. И знам дека некаде во моментов ме гледа и се смее затоа што го остварив најголемиот неостварен сон во мојот живот. Сакав да бидам силен пред момците, но внатре… се распаѓав. Многу ми е драго што заврши вака.“

„Едвај чекам да се вратам во Ливерпул и да испијам чаша вино со татко ми, мислам дека конечно ќе биде среќен за нешто што сум го направил во мојот живот“, заврши капитенот на Шкотска.

Foto/ EPA