Благоја Милевски ја имаше промоцијата како нов селектор на фудбалската репрезентација на Македонија. Селекторот на У-21 репрезентацијата, на функцијата во сениорскиот тим, дојде на местото на Игор Ангеловски. Најупсшниот македонски селектор, Ангеловски, ја напушти селекторската функција, по елиминацијата на Македонија од Европското првенство.

Милевски ќе биде 18 селектор, или в.д.селектор во историјата на македонската репрезентација. Зад себе има настап на Европско првенство со У-21 репрезентацијата.

Милевски, со Фудбалската федерација на Македонија, договори соработка до 2024 година.

На кормилото на националниот тим тој ќе дебитира во септември, во квалификациите за Светското првенство. Македонија на 2.септември ќе ја пречека Ерменија, три дена подоцна ќе гостува на Исланд, а на 8.септември во Скопје ќе игра против Романија.

Женската фудбалска репрезентација на САД, која како селектор ја предводи Македонецот Влатко Андоновски, го освои бронзениот медал на олимпискиот турнир во Токио.

САД, во спектакуларен натпревар, ја победија Австралија со 4:3 (3:1). Малото финале го обележа репрезентативката на САД, Меган Рапино, која постигна два спектакуларни гола во првото полувреме.

Рапино, во осмата минута, постигна гол директно од корнер, а откако Кери израмни во 17.минута, со волеј во 21.минита повторно донесе предност за САД.

До крајот на полувремето, во првата минута од судиското надополнување на времето, Лојд ја зголеми предноста на САД. Лојд, по шест минути игра во второто полувреме, со својот втор гол и донесе недостижна предност на САД.

Три минути подоцна Фурд намали на 2:4, а во последната минута Гиелник го постави конечниот резултат 3:4.

За златото на женскиот фудбалски турнир, утре ќе се борат Канада и Шведска.

Ракометната репрезентација на Франција избори пласман во финалето на олимпискиот турнир во Токио. Франција, во првото полу-финале, го победи Египет со 27:23 (13:13). Французите четврти пат по ред ќе играт олимписко финале, во Пекинг и Лондо го освоија златото, во Рио де Жанеиро пред пет години беа втори. Пласманот во полу-финалето за Египет е историски успех не само за оваа земја, туку и африканскиот ракомет. Никога досега репрезентација од Африка не стигнала толку далеку на еден олимписки турнир.

Француската одбрана, предводена од голманот Жерар, го оневозможи Египет да приреди сензација. Египќаните на стартот водеа со 5.1 и 7:4, меѓутоа Жерар со серија одбрани ги врати во натпреварот. Првото полувреме заврши 13:13.

Израмнето се играше и во првиот дел од второто полувреме. Во периодот од 43. до 47.минута, Франција ја направи клучната серија, се одлепи на 18:15.

До крајот на мечот, Жерар не им дозволи на египетските ракометари да се врата во мечот.

На крајот Жерар имаше 17 интервенции, односно одбрани 46 отсто од удари упатени кон неговиот гол. Стрелците кај Франција ги предводеа Ремили и Деска со по пет гола. Ист број на голови за Египет постигна играчот на Веспрем, Јахија Омар.

Франција во финалето ќе игра против победникот од натпреварот помеѓу Данска и Шпанија.