Спорт
Просинечки: Јас селектор на Македонија? Прв пат слушам

Информацијата која вчера ја пласираше српски „Курир“, дека Роберт просинечки ќе ја предводи Македонија на ЕП, предизвика големо внимание во регионот. Прославениот фудбалер за „Јутарњи“, негира дека имал контакти со луѓето од Фудбалската федерација на Македонија.
„Од вас го дознавам ова…Не сум ги читал порталите. Навистина не знам ништо, прв пат слушам. Не сум разговарал со никого од македонскиот сојуз. Дома сум во Загреб, откако се вратив од Турција, немам никакви други вести“, рекол Просинечки.
Инаку, договорот на Игор Ангеловски, со ФФМ истекува на 31.декември, а од Федерацијата најавија дека по Нова година ќе ги започнат преговорите околу новиот договор на селекторот кој успеа да го оствари неголемиот успех во историјата на македонскиот фудбал.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Аморим доби поддршка од челниците на Манчестер јунајтед

Тренерот на Манчестер јунајтед, Рубен Аморим, вети дека нема да ја менува својата фудбалска филозофија, а клупските челници не планираат да го сменат тренерот, објавија британските медиуми.
„Клубот од Олд Трафорд има долгорочен план и иако постои незадоволство од моменталните резултати, нема да има ненадејни реакции или по секој натпревар да се преиспитува иднината на тренерот, без разлика колку е гласна бучавата однадвор“, објави „Скај Спортс“.
Откако легендарниот Сер Алекс Фергусон го напушти Јунајтед пред 12 години, клубот имаше осум тренери и двајца привремени тренери.
„На Аморим му е потребен добар настап и резултат во претстојниот натпревар против Челзи за време на викендот, во спротивно повиците за негово отпуштање само ќе растат“, пишува „Скај Спортс“.
Во недела на „Етихад“, Јунајтед го загуби дербито на Манчестер против Сити со 0:3.
Со четири бода од првите четири натпревари, Јунајтед го има најлошиот старт во Премиер лигата од сезоната 1992/1993. Тимот беше елиминиран и од Лига купот, со сензационалниот пораз од тимот од четвртата лига Гримсби на пенали.
Минатата сезона, Јунајтед освои најмалку бодови во својата историја во Премиер лигата (42).
Foto/ EPA
Спорт
Погон Шчецин потпиша со поранешен светски првак

Францускиот лев бек Бенжаман Менди, поранешен играч на Манчестер Сити, кој преживеа долгогодишна драма пред да биде ослободен од обвиненијата за силување, има нов клуб.
Менди, кариерата ќе ја продолжи во полската Екстракласа, а новиот клуб на 31-годишникот роден во близина на Париз ќе биде Погон Шчецин, како што тврди локалниот „mezcyki.pl“ и објавија бројни европски медиуми.
Станува збор за двегодишен договор, а Полјаците истакнуваат дека Французинот бил привлечен од годишна плата од повеќе од еден милион евра.
Менди ја започна својата професионална кариера во Авр, по што играше за Марсеј и Монако. Тој беше активен во синиот дел на Манчестер од 2017 до 2021 година кога започна контроверзната приказна.
Французинот не играше фудбал две години, иако официјално беше член на Сити, а по ослободителната пресуда се врати во Лига 1 каде што ги бранеше боите на Лориен, а последната сезона ја помина во Цирих.
Левиот бек беше дел од француската репрезентација која го освои Светското првенство во Русија во 2018 година, а со Сити го освои и англиското првенство во 2018, 2019 и 2021 година.
Спорт
Познати се локациите на шесте спринт-трки во новата сезона во Ф1

Формула 1 и ФИА ги објавија имињата на шест локации каде што ќе се одржат спринт трки во 2026 година.
За прв пат, спринт трките ќе се одржат во Монтреал, Зандворт и Сингапур, а тука се и Шангај, Мајами и Силверстоун.
Првата спринт трка ќе биде на Големата награда на Кина, која се одржува од 13 до 15 март, а потоа се сели во Северна Америка (Мајами и Монтреал).
Европските спринт патеки се британскиот Силверстоун и холандскиот Зандворт, а последната спринт трка ќе се вози во Сингапур.
Ова се датумите и локациите на спринтерските трки за новата сезона:
Шангај, Кина: (13-15 март 2026 година)
Мајами, САД: (1-3 мај)
Монтреал, Канада (22-24 мај)
Силверстоун, Велика Британија (3-5 јули)
Зандворт, Холандија (21-23 август)
Марина Беј, Сингапур (9-11 октомври).
Новата сезона во Ф1 започнува на 6 март во Австралија и завршува на 6 декември во Абу Даби. Ќе се одржат вкупно 24 трки.