Милан вчера успеа да стигне до својата петта победа оваа сезона, триумфирајќи над Специја со 2:1, во меч во кој сите очи беа вперени кон Даниел Малдини, кој покрај тоа што првпат во кариерата беше стартер во лигашки меч, постигна и убав гол со глава.

Трите поени беа слатки, но фокусот на бројот 27 и семејството Малдини беше главна тема на италијанските спортски весници. Младиот Малдини со голот го наследи својот татко Паоло (сега спортски директор на клубот кој се радуваше на трибините) и својот дедо, легендарниот Чезаре.

„Малдини засекогаш. Даниел постигна гол, по Чезаре и Паоло, третиот од династијата кој има гол за росонерите. Таткото прославува на трибините“, стоеше на насловната страница на „Ла газета дело спорт“.

И „Тутоспорт“, спортскиот весник од Торино беше импресиониран: „Династија на Милан. Прв гол во Серија А за Даниел Малдини, кој ги следи таткото Паоло и дедото Чезаре“. На „Кориере дело спорт“ кратко пишуваше: „Внукот на ѓаволот. Од Чезаре до Даниел, преку Паоло – ова е династијата на Милан“.

Paolo Maldini's reaction to his son, Daniel, scoring on his first start for AC Milan is EVERYTHING. ❤️ pic.twitter.com/vZourSAW7i

— CBS Sports Golazo ⚽️ (@CBSSportsGolazo) September 25, 2021

Новокрунисаниот шампион во тешка категорија, Олександер Усик вели дека од неговиот агол добил совет да не го нокаутира Ентони Џошуа на вчерашниот меч на стадионот на Тотенхем.

Украинецот, кој победи со 117:112, 116:112 и 115:113 кај тројцата судии, вели дека неговиот план бил едноставен и дека знаел дека ќе стигне до победа.

„Мечот се одвиваше точно како што очекував. Имаше моменти во кои тој ме притискаше, но тоа не беше ништо посебно. Немав цел да го нокаутирам. Моите тренери ми кажаа дека не треба да одам на нокаут и да се држам до својот план“, вели Усик.

34-годишниот поранешен шампион во крузер категорија, смета дека може да биде и многу подобар, но дека не планира римеч со Џошуа.

„Работам напорно од јануари. Ми беше потребна половина година за да стигнам до ова. Сега ми недостасуваат децата, сакам да си одам дома и не размислувам за римеч. Не го видовте најдобриот Усик, можам да сум многу подобар“, изјави Украинецот.

Ромелу Лукаку, според зборовите на менаџерот на Челси, Томас Тухел беше само последно парче во слагалката на „сините“. Но, мечот против Манчестер сити во саботата, кога Белгиецот беше изолиран со 21 допир, 33 отсто успешни додавања и ниту еден удар на голот, го покажа проблемот – иако тој само што пристигна на „Стемфорд бриџ“, тимот премногу зависи од него.

Челси беа „задушени“ од тактичкиот план на Пеп Гвардиола, и скапиот Лукаку беше нешто повеќе од обичен гледач во западен Лондон. Ова беше и слатка одмазда за Гвардиола, откако претходно ги загуби претходните три дуели со Томас Тухел минатата сезона, вклучувајќи го и финалето на Лигата на шампионите.

За Тухел, останува главоболката дали неговиот 3-5-2 систем, кој функционираше фантастично против Тотенхем минатата недела, овојпат спектакуларно не успеа. Покрај Лукаку напред беше и Тимо Вернер, но со тројца дефанзивни играчи од средниот ред зад напаѓачката двојка, домашниот тим не најде простор за нив.

„Мислам дека нема потреба да зборуваме за маките на Ромелу денеска. Кога топката стигнуваше до Лукаку, нападот веќе беше пола завршен и немаше доволно луѓе напред, доволно верба во системот и доволно поврзаност. Затоа мислам дека се работеше за тимски проблем, не за индивидуален проблем“, изјави Тухел по мечот.

Родри, Ајмерик Лапорт и Рубен Дијаш го ставија во „кутија“ Лукаку, додека Вернер треба да го крене нивото ако сака да биде партнер на Лукаку како Лаутаро Мартинез во Интер во 3-5-2 системот на Антонио Конте минатата сезона.

Графика: Sofascore за Топспорт.мк

Манчестер сити го освои „Стемфорд Бриџ“