Европскиот шампион Пари Сен Жермен и актуелниот освојувач на Конференциската лига, Челзи, ќе се борат за титулата на првото издание на Светското клупско првенство во новиот формат со 32 екипи, што се одржува во Соединетите Американски Држави.

Финалето ќе се игра вечерва од 21 часот (по македонско време) на легендарниот стадион „Метлајф“ во Њу Џерси, каде фудбалска елита од цел свет ќе ги впери очите во двобојот што може да го дефинира фудбалот во 2025 година.

Двете екипи имаа речиси идентичен пат до финалето – по две победи и еден пораз во групната фаза, а потоа по три победи во елиминациските натпревари. Формата на тимовите е импресивна. Челзи забележа 13 победи на последните 15 натпревари, додека ПСЖ е во серија од 10 победи на последните 11 средби, притоа задржувајќи ја својата мрежа недопрена на 7 од последните 8 меча.

Менаџерот на Челзи, Енцо Мареска, вели дека ова е само уште еден доказ за прогресот на тимот.

„Имавме неверојатна сезона, завршивме меѓу најдобрите четири во Премиер лигата, ја освоивме Конференциската лига и сега сме во финале на светски турнир. Среќни сме, но сакаме уште“, истакна Мареска.

Тренерот на ПСЖ, Луис Енрике, е подеднакво амбициозен во пресрет на финалето.

„Ова е посебна сезона за нас. Имаме силен ривал во Челзи, но ние сме фокусирани и сакаме да испишеме историја за клубот. Подготвени сме“, рече Енрике.

Светот ќе добие нов клупски првак – прашањето е само дали тоа ќе биде „сините“ од Лондон или „светците“ од Париз.

Капитенот на македонската фудбалска репрезентација, Енис Барди, кариерата ќе ја продолжи во турската Суперлига. Тој и официјално е претставен како нов играч на екипата на Коњаспор, со која потпиша двегодишен договор, до 30 јуни 2027 година.

Откако пред десетина дена го прослави својот 30-ти роденден како слободен играч, Барди стави крај на шпекулациите и ја прифати понудата од турскиот суперлигаш. Тој беше претставен во тренинг-кампот на тимот во Ерзурум, каде што и официјално го облече новиот дрес со бројот 10, што е јасен показател дека клубот во него гледа лидер на играта.

Овој трансфер доаѓа во вистински момент за нашиот капитен, кој сега ќе има можност да се фокусира на клупските обврски и да ја темпира формата за клучните натпревари на македонската репрезентација што следуваат наесен во квалификациите за Светското првенство.

По настапите во Шкупи, Ујпешт, Леванте, Трабзонспор и Бодрумспор, Коњаспор ќе биде нов предизвик во богатата кариера на Енис Барди.

Ига Свјонтек го освои првиот Вимблдон во својата кариера на спектакуларен начин. Во финалето ја победи Американката Аманда Анисимова со 6:0, 6:0 за само 58 минути. Швионтек направи пробив на почетокот и од тој момент сè тргна по нејзина волја. Анисимова беше премногу нервозна и никогаш не успеа да ја загрози својата соперничка.

За жал за неа, таа дури и не успеа да се запише на семафорот и натпреварот заврши практично пред да започне. Швионтек сега има четири Ролан Гарос, по еден на Вимблдон и на Отвореното првенство на САД, и ѝ недостасува само трофејот на Отвореното првенство на Австралија за да ја комплетира својата колекција од четири големи турнири.