Спорт
Пуерта по 15 години призна дека лажел за допингот по поразот од Надал

Поранешниот аргентински тенисер, Маријано Пуерта, призна дека лажел за да добие намалена казна за допингување по финалето на Ролан Гарос во 2005, кога загуби од Рафаел Надал.
Надал се врати од загубениот прв сет, за да ја освои својата прва гренд слем титула на омилените терени во Париз (каде што има 12 титули), по што сега 41-годишниот Пуерта бил позитивен на стимулантот етилефрин. Бидејќи веќе имаше отслужено деветмесечна суспензија поради позитивен тест на кленбутерол во 2003, тој доби осумгодишна суспензија.
Меѓутоа, тој тврдеше дека вториот позитивен тест е резултат на тоа што тој случајно се напил од водата во која неговата сопруга имала медикаменти за менструални болки, и неговата казна беше намалена на две години. Сега, во интервју за весникот „Ла насион“, тој признава дека тоа било лага и дека земал додатоци за исхрана добиени од личниот тренер Дарио Лецман.
„Објаснувањето кое го користевме како стратегија беше лага. Не можевме да направиме ништо бидејќи тие апчиња не беа купени на легален начин. Моите адвокати сметаа дека не е добро да го признаам тоа. Но, верувајте, не добив никаква спортска предност и не сакам да ме означуваат како измамник“, вели Пуерта.
Неговиот поранешен тренер, Андрес Шнајтер не верува во оваа верзија.
„Го прашав што се случи и тој ми кажа дека не знае. Мислев дека лаже и дека одговорот не е искрен. Мислам дека земал нешто без да знае“, вели Шнајтер.
Пуерта беше на деветтото место на АТП листата тогаш, но не успеа да го врати ова ниво на игра по камбекот во 2007 и се пензионираше две години подоцна.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Марк Маркез со рекорд до пол-позицијата во Аргентина

Возачот на Дукати, Марк Маркез, ја освои пол-позицијата пред ГН на Аргентина, втората трка од овогодинешниот шампионат во Мото ГП.
Осумкратниот светски првак уште од почетокот на акцијата ги поместуваше границите на патеката „Термас де Рио Ондо“, а на пат до втората пол-позиција сезонава, постави нов рекорд, 1:36.917 минути.
Исто како и пред две недели во Тајланд, најблиску до него беше неговиот помлад брат, Алекс, возач на Гресини Дукати, кој заостануваше 246 илјадитинки. На браќата Маркез во првиот стартен ред им се приклучи сензационалниот Жоан Зарко на ЛЦР Хонда.
Вториот стартен ред го заврши Фабио ди Џанантонио од тимот БР46, следен од Фабио Квартаро на Јамаха и тимскиот колега Франко Морбидели. Меѓу првите десет се најдоа Марко Бецеки од Априлија и фабричкиот возач на Хонда Жоан Мир.
Спринт трката во Аргентина е закажана за 19 часот, додека Големата награда е закажана за во недела во истиот термин.
Спорт
Тадиќ потпишал за Ајакс

Душан Тадиќ потпиша договор со Ајакс и ќе се врати во Холандија, пренесуваат турските медиуми. Поранешниот српски репрезентативец по две години се враќа во Амстердам, тврдат овие извори.
По елиминацијата на Фенербахче од Лига Европа и промашениот пенал на Тадиќ, навивачите го критикуваа исто како и целиот тим. Српскиот играч за врска по се изгледа одлучи дека најдобар потег е враќањето во Ајакс.
Тадиќ имаше понуда од Фенербахче да го продолжи договорот и се чинеше дека ќе ја прифати понудата. Но откако по промашениот пенал од лутите навивачи доби пораки дека е „најдобро да не се враќа во Истанбул“, по се изгледа дека решил да ја прифати понудата од поранешниот клуб.
Доколку тврдењата на турските медиуми се точни, Тадиќ по две години ќе се врати на арената Јохан Кројф, каде што играше од 2018 до 2023 година.
Спорт
Реал го нуди Чуамени за Енцо Фернандез

Енцо Фернандез пристигна во Челзи на крајот на претходната година за 121 милион евра од Бенфика. Англиските медиуми пишуваат дека тој би можел да го напушти клубот во летниот преоден рок, во размена на фудбалери меѓу Челзи и Реал Мадрид.
Шпекулациите говорат дека Реал го нуди Орелиен Чуамени и пари за аргентинскиот репрезентативец, кој со националниот тим стана светски и јужноамерикански шампион.
Наводно, Реал Мадрид веќе извесно време е заинтересиран за 24-годишниот играч за врска на Челси. Фернандез има договор со Челси до јуни 2032 година.
Фернандез има пет гола и девет асистенции во 34 одиграни натпревари оваа сезона. Според информациите на англиските медиуми, Фернандез не би имал ништо против да се пресели во Мадрид.
Чуамени, кој Карло Анчелоти го користи на дефанзивниот среден ред и позициите во одбраната, е под договор со Реал до летото 2028 година.