Атлетико Мадрид победнички мина на гостувањето во Памплона. Предводени од Жоао Феликс „јорганџиите“ ја поразија Осасуна со 3:1.

Младиот Португалец, за чии трансфер Атлетико минатото лето плати 126.000.000 евра, во 43 минута го постигна првиот гол на мечот. Феликс реализираше пенал за кој се избори Витоло.

Атлетико доби уште еден пенал во 48 минута, откако Ојер играше со рака пред својот гол. Повторно Феликс ја презеде одговорноста, но неговиот удар заврши во дирекот, а одбиената топка Анхел Кореа ја испрати над голот.

Во првите 15 минути од вториот дел покрај промашениот пенал, играчите на Атлеитко имаа уште три чисти шанси за постигнување на гол. Кореа од 20 метри го погоди дирекот, истиот играч не успеа да го совлада Херра во ситуација „еден на еден“, а речиси иста шанса не реализираше и Витоло.

Добрата игра во второто полувреме Атлетико сепак ја крунисаа со уште еден гол. Кореа му асистираше на Феликс, а Португалецот од работ на шеснаесетникот го совлада Херара.

Трошка надеж за Осасуна донесе голот на Анте Будимир во 80 минута. Хрватскиот репрезентативец го одигра првиот натпревар за Осасуна по трансферот од Мајорка.

Надежите на Осасуна дека ќе можат да освојат барем бод им ги урна Лукас Тореира во 88 минута. Уругваецот четири минути претходно влезе во игра, тој го постигна деби голот за Атлетико.

Атлетико со оваа победа од шест натпревари имаат 14 поени и се наоѓаат на второто место на табелата. „Јорганџиите“ имаат натпревар помалку од лидерот Реал. Осасуна го дели седмото место со 10 поени.



Ливерпул го победи Вест Хем со 2.1 (1:1) во седмото коло, во Премиер лигата. Црвените, сега се лидери на табелата, имаат 16 бода и натпревар повеќе од Евертон.

Екипата на Јирген Клоп и на овој меч не блескаше, но успеа да ја оствари целта. Човекот на одлука беше резервниот играч Диого Жота. Португалецот за кого Ливерпул плати 40.000.000 евра, во 86 минута го постигна голот за победа. Неколку минути претходно, поради офсајд на истиот играч му беше поништен гол.

Инаку, Вест Хем први постигнаа гол, преку Пабло Форналс во 10 минута, а Ливерпул израмни од пенал, во 41 минута стрелец беше Салах.



Фудбалерите на Интер се спасија од пораз против Парма во шестото коло, во Серија А. Бод за Интер спаси Иван Перишиќ во 92 минута, откако претходно Парма имаше предност од 0:2.

Интер има проблем со ефиксноста оваа сезона и тоа фудбалерите на Антонио Конте го потврдија и на овој натпревар. Доминираа во првиот дел, не ги искористија шансите, па на полувреме немаше голови.

Парма го казни домаќинот веднаш на стартот од второто полувреме. Од првиот удар кон Хандановиќ, ветеранот Жервињо постигна гол. Истиот играч, 15 минути подоцна рутински ја реализираше мајсторската систенција на Инглесе.

Три минути подоцна Интер во натпреварот го врати Марцело Брозовиќ.

До крајот на мечот Интер напаѓаше кон голот на Сепи, но без некоја конкретна шанса. Во 92 минута Коларов нафрли на првата статива, а Перишиќ ја спроведе топката во голот.

Интер по шест одиграни натпревари има 11 бодови, додека Парма освои пет бода.