Спорт
Рамош херој, Португалија ја декласираше Швајцарија

Португалија и без Кристијано Роналдо супер лесно се справи со Швајцарија во осминафиналето на Светското првенство во Катар и си обезбеди четвртфинален дуел со Мароко. Португалците триумфираа со 6:1 во последниот натпревар од осминафиналната фаза.
Гонсало Рамош беше херој во убедливиот триумф на Португалците, постигна три гола и го забележа првиот хет-трик на овој Мундијал. Во првиот меч од нокаут-фаза на светските првенства тој погоди во 17., 51. и во 67. минута. Стрелаа и Пепе, Рафаел Гереро и Леао. Единствениот гол за Швајцарија го постигна Аканџи по девет минути од второто полувреме.
Кристијано Роналдо доби шанса во завршните дваесетина минути од натпреварот кога веќе неговата репрезентација имаше високи 5:1 и осигурана победа.
Мундијалот во Катар ќе продолжи по два дена пауза, четвртфиналните дуели се закажани за в петок и за в сабота. На првиот ден играат Холандија – Аргентина и Хрватска – Бразил, полуфиналната шема ќе ја комплетираат пресметките Англија – Франција и Португалија – Мароко.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Објаснување за казната на Јувентус: Сериозен прекршок кој траел предолго

Апелациониот суд на Италијанската фудбалска федерација (ФИГЦ) ги објави причините поради кои Јувентус доби казна од 15 поени во случајот со лажно пријавување на вредноста на трансферите.
„Бјанконерите“ беа казнети, а повеќе нивни сегашни и поранешни директори добија суспензии за вештачко зголемување на вредноста на трансферите на фудбалерите, за така да можат да пријават поголем приход. Јуве беа прво ослободени во спортскиот случај, пред обвинителот на ФИГЦ да побара второ судење по појавувањето на нови документи од страна на Јавното обвинителство.
„Клубот направил спортски дисциплински прекршок, а казната е таква поради сериозноста и долготрајноста на тие прекршоци. Доказот за вина е осигуран преку документација на клупските директори, сведочењето на играчите и од дополнителни докази кои покажуваат прикривање и манипулација на потврдите од клубот“, се вели во одлуката на ФИГЦ.
Сега, Јувентус ќе можат да се жалат на одлуката пред Италијанскиот олимписки комитет (ЦОНИ), но им се заканува и дополнителна казна од Јавниот обвинител во Торино.
Juventus, le motivazioni della sentenza sulle plusvalenze: "Illecito grave, ripetuto e prolungato" https://t.co/OUSi1pEdJD
— TUTTOmercatoWEB (@TuttoMercatoWeb) January 30, 2023
Спорт
Надал му честиташе на Ѓоковиќ за израмнувањето на неговиот рекорд: Уживај, Ноле!

Рафаел Надал му честиташе на својот вечен ривал, Новак Ѓоковиќ преку Инстаграм, откако Србинот се израмни со неговите 22 гренд слем титули по победата на Австралија опен.
„Неверојатно остварување, Ноле, многу честитки до тебе и до твојот тим. Сосема заслужено. Уживај, Ноле!“, напиша Шпанецот.
Рекордот по бројот на освоени гренд слем титули во сингл уште останува кај Австралијката Маргарет Корт, која има 24 гренд слем титули, а повеќе од Ѓоковиќ и Надал има и Серена Вилијамс со 23 титули.
Надал беше актуелен шампион во Мелбурн и прв носител, но загуби во второто коло од Американецот Мекензи Мекдналд, по што потврди дека ќе паузира најмалку два месеци поради повреда на колкот. Двајцата тениски великани ќе се судрат на Ролан Гарос во мај за поставување на нов рекорд.
Спорт
Интер сериозно заинтересиран за Мегваер

Интер преговара со Манчестер јунајтед околу евентуалниот трансфер на Хари Мегваер во летниот преоден рок, пишуваат италијанските медиуми.
„Нероаѕурите“ се свесни дека наскоро ќе останат без Милан Шкриниар, кој одби продолжување на договорот и е на прагот да се пресели во ПСЖ, па Мегваер е еден од кандидатите да го замени.
Интер планира да го доведе Мегваер на позајмица, а стоперот е исто така заинтересиран да го напушти„Олд Трафорд“.
Договорот на Мегваер со Манчестер Јунајтед истекува во 2025 година, а оваа сезона тој беше во стартниот тим на само четири натпревари во Премиер лигата. Со низа киксови тој целосно ја загуби довербата на менаџерот Ерик тех Хаг.
Англискиот репрезентативец пристигна во Манчестер јунајтед во 2019 година од Лестер за 87.000.000 евра.