Франк Кеси потврди дека си заминува од Милан како слободен агент, посочувајќи дека „најдобар начин да се збогуваш“ е со скудето, пред најавениот трансфер во Барселона.

Фудбалерот од средниот ред од Брегот на Слоноват Коска не се договори за обновување на договорот со „росонерите“ и од 30 јуни е слободен агент.

„Ова беа пет многу важни години во кои навистина се посветив на проектот. Среќен сум за градот, за клубот, за фановите, за тренерот, но и за мене и за моето семејство. Ова е последен месец од мојот договор тука, но во овие пет години успеавме да се вратиме во Лигата на шампионите и да го освоиме скудетото. Го направив тоа за што дојдов тука и ова е најдобар начин да се збогуваме“, вели Кеси.

25-годишниот Кеси цела своја кариера ја помина во Италија, откако во 2015 година пристигна во младинската академија на Аталанта, по што беше позајмен во Чезена, пред во 2017 да направи трансфер во Милан за 32 милиони евра. Оваа сезона тој постигна 6 гола во 31 настап во Серија А, вклучувајќи ги последниот гол при 0:3 победата кај Сасуоло со кој се запечати титулата.

Велосипедската трка Трофео Кастелфидардо во Италија заврши со трагедија во неделата, откако спортскиот директор на тимот Вирис Вигевано, Стефано Мартолини почина откако беше удрен од 23-годишниот велосипедист Никола Венкјарути (Ворк сервис).

Венкјарути ја загубил контролата на велосипедот на 400 метри пред крајот кога се удри со брзина од околу 60 км/ч во Мартолини, кој ја следел трката на тротоарот. 41-годишниот Мартолини паднл на раката и починал веднаш, додека Венкјарути завршил во болница со скршен ‘рбет.

Претседателот на УЕФА, Александер Чеферин застана во одбрана на Пари Сен-Жермен околу новиот богат оговор за францускиот напаѓач Килијан Мбапе, инсистирајќи дека и Реал Мадрид дале „слична“ понуда.

Француските медиуми тврдеа дека 23-годишниот Мбапе стана најплатениот фудбалер во историјата со потпишувањето на тригодишниот нов договор, нешто што предизвика бура реакции во Шпанија, каде што и Ла лига го пријави клубот пред УЕФА велејќи дека се работи за „скандалозна“ понуда која претставува опасност за илјадници работни места во европскиот фудбал.

Чеферин ги отфрла обвиненијата дека УЕФА ги игнорира прекршувањата на финансискиот ферплеј, посочувајќи на хипокризијата во Шпанија бидејќи Мадрид исто така му нудел богат договор на Мбапе.

„УЕФА има правила за финансиски ферплеј кои се доста стриктни. Кој ќе ги почитува правилата, ќе игра во нашите натпреварувања, кој нема, нема место за него, толку е едноставно. Ниту Реал Мадрид, ниту било кој ќе кажува што ќе прави УЕФА. Тие велат дека има скандал, но според тоа што го знам, нивната понуда беше слична со таа на ПСЖ“, вели Чеферин за „Би-би-си“.

Тој исто така вели дека нема промени на правилата за сопственост на клубовите, откако ПСЖ е во раце на Катар инвестмент ауторити (КИА), државната компанија од Катар, додека Манчестер сити е во сопственост на газди од Обединетите Арапски Емирати.

„Кажете ми еден аргумент зошто тие да не се сопственици на клуб? Ако кажете дека клубовите се во сопственост на фановите, заборавате дека сите англиски клубови имаат сопственици – од САД, од Англија, од Блискиот Исток. Така што ситуацијата е идентична и мака ми е од овие обвинувања без основа“, додава Чеферин.