Спорт
Во Ред Бул донеле одлука да направат рокада на Јуки Цунода за Лијам Лосон

Ред Бул, донесе одлука да ги замени своите возачи по само две трки во тековната Формула 1 сезона. Шпекулациите дека ова може да се случи, се појавија по лошата форма на Лијам Лосон. Возачот од Нов Зеланд ги заврши првите две трки на 15-то и 12-тото место, откако на успеа да ја мине првата рунда во квалификациите за трките во Австралија и Кина.
Лијам Лосон ќе оди во Рејсинг Булс, а на неговото место одо овој тим ќе дојде Јуки Цунода, кој за Ред Бул ќе дебитира на домашен терен, на трката за Големата награда на Јапонија на 6 април.
Медумите тврдат дека одлуката Лосон да биде испратен во сестринскиот тим ќе биде официјализирана до крајот на неделата.
Ваков расплет вчера најави шефот на Ред Бул, Кристијан Хорнер.
„Шампионатот за конструктори ќе биде тешка задача за нас и ќе мораме значително да го подобриме болидот за да бидеме воопшто конкурентни. Мора да имате два болиди кои освојуваат поени, тоа беше нашиот проблем минатата година. Дури и во борбата за титулата кај возачите мора да имате два болида. Клучот е да се осигураме дека двајцата наши возачи ќе бидат што е можно поблиску до врвот“, рече тој.
По заминувањето на Серхио Перез, Ред Бул бараа нов тимски колега за четирикратниот шампион Макс Ферстапен, се одлучија за 21-годишниот Новозеланѓанец Лосон, кој последните шест трки од минатата сезона го возеше во болидот на Рејсинг Булс и освои две деветти места.
Јуки Цунода (24) ја вози својата петта сезона во Формула 1, сите ги помина тимот на Рејсинг Булс, кој претходно настапуваше под името АлфаТаури, а потоа и под името РБ.
Минатата сезона заврши на 12. место во поредокот кај возачите. Цунода во Австралија заврши на 12., а во Кина на 16.место.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Интер оствари рекорден приход

Италијанскиот фудбалски гигант Интер оствари рекордни 567 милиони евра приходи во изминатата финансиска година, беше објавено на веб-страницата на клубот.
Финансиските извештаи за сезоната 2024/25 покажуваат приходи од 567 милиони евра, што е зголемување од 94 милиони евра во споредба со претходната сезона. Ова е рекорд, не само за Интер, туку и за италијанскиот фудбал како целина. Претходниот рекорд го држеше Јувентус кога имаше приходи од 464 милиони во првата сезона на Роналдо.
Рекордните приходи на Интер се резултат на зголемените приходи од домашните и европските натпреварувања, како и учеството во првото издание на проширеното Светско клупско првенство. Во исто време, имаше зголемување на комерцијалните приходи од спонзорства и натпревари.
Интер ја затвори финансиската година со нето добивка од 35,4 милиони евра, во споредба со загуба од 35,7 милиони евра во претходната финансиска година. Интер ја заврши рекордната финансиска година без трофеј.
Во финалето на Лигата на шампионите загуби од ПСЖ, во Серија А беше втор од Наполи, во Купот на Италија испадна во полуфиналето против градскиот ривал Милан, „росонерите“ беа подобри и во финалето на Суперкупот на Италија, додека на клупскиот Мундијал клубот загуби од Флуминензе.
Спорт
Детали го делат Бенитез од клупата на Панатинаикос

Трофејниот шпански стручњак Рафаел Бенитез (65) треба да го преземе грчкиот тим Панатинаикос во наредните денови, откако че бидат дефинирани деталите за идната соработка.
Великанот од Атина е во потрага по тренер по заминувањето на Португалецот Руи Виторија, кој беше отпуштен на 15 септември, еден ден откако „зелените“ загубија од Кифисија со 3:2.
Во меѓувреме, Панатинаикос значително ја подобри играта и резултатите под водство на привремениот тренер Христос Контис и забележа голема победа во Лигата на Европа против Јанг Бојс (4:1), но во клубот, и покрај очигледниот напредок, бараат ново, по можност звучно име за клупата.
Според грчките медиуми, изборот паднал на тренерот кој ја освои Лигата на шампионите со Ливерпул во 2005 година, две титули во Ла Лига и Купот на УЕФА со Валенсија и Лигата на Европа со Челзи.
Истите извори наведуваат дека Бенитез пристигнал во Атина со приватен авион во четврток наутро за финални преговори со челниците на клубот и најверојатно за потпишување на договорот.
Наводно, Панатинаикос му нуди дури пет милиони евра само за едногодишна соработка.
Спорт
Џексон Хејс ќе добие пасош на Словенија

Центарот на Лос Анџелес Лејкерс, Џексон Хејс (25), откри дека е во процедура за добивање словенечки пасош за во иднина да може да игра со Дончиќ и во репрезентацијата.
Хејс е член на Лејкерс од 2023 година, претходно играше за Њу Орлеанс.
Наскоро би можел да биде опција за селекторот на Словенија, Александар Секулиќ, кој бара играч на позицијата „пет“ по повлекувањето на Џош Нибо за последниот Евробаскет.
Нибо, да потсетиме, поради повреда, не доби дозвола од својот клуб Милано да игра за Словенија, што ги принуди челниците на КС Словенија да најдат посигурно решение за наредните години.
Изборот падна на Хејс, со кого неговиот соиграч Лука Дончиќ ги водеше преговорите.
„Лука е мој човек. Работиме заедно за да добиеме словенечки пасош и да можеме да играме за Словенија следното лето“, ги изненади Хејс новинарите по натпреварот со Далас.
Хејс со тоа би бил четвртиот странец во последните неколку години во дресот на Словенија, по Ентони Рандолф, Мајк Тоби и Џош Нибо.
Словенија беше европски шампион во 2017 година со Рандолф.