ПСВ Ајндоховен направија пресврт и во финишот го победија Базел, во првиот меч од втората квалификациска рунда за пласман во Лигата на шампионите. И покрај поразот резултатот е добар за Базел пред реваншот наредната недела на „Сент Јакобс парк“. Останатите тимови кои вечерва гостуваа остварија одлични резултати. Динамо Загреб, Копенхаген и АПОЕЛ победија, а Олимпијакос играа 0-0 кај Плзен во Чешка.

Динамо Загреб во Грузија дури во второто полувреме го скршија отпорот на Сабуртало, со головите на Оршиќ и Петковиќ. Целиот натпревар за Динамо го одигра македонскиот репрезентативец Аријан Адеми.

Во Ајндховен; ПСВ и Базел одиграа драматичен натпревар, кој домаќините го решија во своја корист во последните четири минути. Брума погоди за ПСВ во 14 минута, а потоа пресврт направија Ајети и Алдерете.

Во финишот, во 89 и 93 минута се случи уште еден пресврт и ПСВ стигна до победата со головите на Ламерс и Мален.

Копенхаген немаа проблем во Велс, кај ТНС. Сигурна победа на Данците им обезбедија Сотиру и Сков.

Еден гол го реши победникот на натпреварот во Црна Гора, каде АПОЕЛ славеше над Сутјеска. Стрелец на голот беше Де Виченти од пенал во 42 минута.

Џенсон Батон светскиот првак во шампионатот на Формула 1 од 2009 година, смета дека Луис Хамилтон ќе направи грешка доколку се пресели во Ферари. Тој вели дека неговиот сонародник не би требало да го напушта тимот со кој победува.

„Сигурен сум дека сите возачи сакаат да одат во Ферари, но ниту еден возач не би заминал од тим што победува и да оди во тим што не е конкурентен“, рекол Батон.

Според Батон, Хамилтон треба да остане во Мерцедес доколку сака да го собори рекордот на Михале Шумахер кој има најмногу светски титули.

„Би било храбро од него да се пресели во Ферари. Луис може да освои десет титули доколку остане во Мерцедес, додека трансфер во Ферари би можел да значи и крај на неговата кариера“, заклучил Батон.

Кејлеб Јуан е победник на 16 етапа на Тур д’Франс, која се возеше по екстремно висока температура на воздухот од 40 степени Целзиусови.

Австралискиот велосипедист етапата долка 177 километри чија цел беше во Ним ја мина за пет часа, 57 минути и осум секунди.

Второто место го освои Елија Вивијани, а трет етапата ја заврши Дилан Греневеген. Возачот на Квикстеп, Жулијен Алафилип ја задржа жолтата маичка како лидер во генералниот пласман.

Актуелниот шампион на Тур д’Франс, Грејант Томас, инаку втор во генералниот пласман имаше незгоден пад. Тој и покрај повредите ја заврши етапата, а од неговиот тим Инеос се надеваат дека ќе може да се подготви за трите планински етапи во Алпите.

Наредната 17 етапа е долга 200 километри и ќе се вози ос Понт-ду-Гар до Гапо.