Советникот на Ред бул рејсинг, Хелмут Марко открива дека постои договор јапонската Хонда да продолжи да ги снабдува со мотори до крајот на турбо-хибридната ера во 2025 година.

Хонда почна со партнерството со Ред бул преку јуниорскиот Торо росо (сега Алфа Таури) во 2018 година, пред главниот тим да добие мотори во 2019, но по крајот на сезоанта 2021, Хонда се повлече од спортот, а Ред бул си постави сопствена фабрика „Ред бул пауертрејнс“, која ќе ја преземе интелектуалната сопственост на Хонда и ќе го развива моторот, но сега е договорено јапонската компанија да праќа мотори од Јапонија до крајот на 2025, пред во 2026, Ред бул сами да ја преземат работата.

„Имаме целосно поинакво решение од тоа кое беше предвидено. Моторите ќе бидат произведувани во Јапонија до 2025, ние воопшто нема да ги допираме. Тие права ќе останат со Јапонците, бидејќи од 2026 ќе бидеме новаци. Првично беше предвидено да изградиме наши мотори за 2022, но вака имаме голема предност, бидејќи ќе работиме само на подесувањата и калибрацијата на моторите“, вели Марко.

Бруно Фернандеш, Рубен Дијаш и сега на крајот Луиш Дијаз. Што е заедничко за тројцата фудбалери? Освен тоа што биле ѕвезди во португалската лига, тоа што тројцата беа блиску до трансфер во Тотенхем за на крајот да завршат во друг премиерлигаш.

Вест дека Дијаз го избрал Ливерпул пред Тотенхем, доаѓа 24 часа откако стана јасно дека Адама Траоре исто така ќе го одбие тимот од Лондон за трансфер во Барселона, оставајќи го Антонио Конте без ниту едно засилување во зимскиот преоден рок, откако претходно најави дека му ставил јасно на знаење на претседателот на клубот, Даниел Леви дека му се потребни одредени засилувања.

Оваа ситуација го остава италијанскиот тренер во тешка позиција во обидот да се обезбеди топ 4 пласман и фудбал во Лигата на шампионите следната сезона, а бидејќи Конте има „навика“ да си заминува од клубови ако не му се исполнуваат желбите – како што дознаа Интер откако лани им ја освои титулата, Тотенхем дури ризикува тој да е откаже предвреме.

На неколку дена пред крајот на преодниот рок, топката е кај Даниел Леви…

Вејн Руни открива дека ја одбил можноста да се врати на својот прв клуб Евертон, откако првиот човек на второлигашот Дерби каунти не се појавил на „интервју“ со управата на „карамелите“ за да биде наследник на Рафа Бенитез, кој беше отпуштен на 16 јануари.

Френк Лампард и Португалецот Витор Переира остануваат фаворити за испразнетото место во клубот од Ливерпул, но дел од навивачите сакаа враќање на нивниот поранешен напаѓач, кој сега вели дека е посветен на Дерби.

„Евертон контактираа со мојот агент и побараа да одам на интервју за работа. Но, ги одбив. Мислам дека ќе бидам менаџер во Премиерлигата и дека сум 100 отсто подготвен за тоа, но имам работа во Дерби, која ми значи многу“, вели Руни.

Руни, кој е роден во ливерпулскиот кварт Крокстет, произлезе од академијата на Евертон, за како тинејџер да влезе во првиот тим и да постигне 17 гола во 77 настапи на „Гудисон парк“, пред во 2004 да замине во Манчестер јунајтед, каде што помина 13 сезони и стана најдобар стрелец во историјата на клубот, пред да се врати една сезона во Евертон во 2017 година.