Составот на сениорскиот кошаркарски национален тим е подмладен со нови млади кошаркари, но, сепак, мотивот за успех, за прва победа во квалификациите за Светскиот куп 2023, е голем кај сите што веќе четврти ден вредно работат во СЦ „Борис Трајковски“ во Скопје. Еден од нив е и Кристијан Николов, еден од најстандардните во изборот на селекторот Драган Баиќ, и кој, веројатно, ќе има голем простор за игра и на претстојните мечеви од квалификациите.

Плејмејкерот потенцира дека најважно е да се борат до самиот крај, дека мора да се даде максимумот, и пред сè, да се одигра чесно до крајот на оваа квалификациска трка.

„Очекувам да дадеме сè од себе и да имаме борба за секоја топка. Подмладени сме, тоа е точно, но тоа не значи дека ќе се предадеме. Секој од нас знае што значи да се игра за Македонија и ветуваме дека ќе го дадеме максимумот“, вели Николов.

Негова, но и желба на соиграчите, е овие квалификации да ги затвориме со победа.

„Прв предизвик ни е Шпанија и ние ќе се бориме до крај. Потоа следува Украина на домашен терен. Сакаме победа затоа што мотивот не е загубен и покрај тоа што сме некомплетни. Ние играме за репрезентацијата и не е важно каков тим имаме, туку мора да бидеме чисти пред себе и да го дадеме најдоброто. Наше е да се бориме до крај. Во овој тим дојдоа и неколку млади играчи. Знам дека ќе дадат сè од себе. Ние еден на друг не гледаме како на млад и стар и не се делиме, туку се гледаме како играчи што може да играат за репрезентацијата и затоа се овде“, истакнува Кристијан Николов.

Македонската кошаркарска репрезентација утре патува за Сарагоса, каде што на 1 јули ќе игра против Шпанија, а три дена подоцна ја пречекува Украина во СЦ „Борис Трајковски“.

Најдобриот македонски кошаркар Ненад Димитриевиќ и следната сезона ќе го носи дресот на Валенсија. Иако имаше шпекулации дека тој не е во плановите на новиот тренер Алекс Мумбру, сепак шпанскиот тим потврди дека Димитриевиќ останува во Валенсија.

Македонскиот репрезентативец дојде во Валенсија минатата сезона од Хувентуд.

Тој се мачеше и со повреди и немаше голема минутажа, но следната сезона ќе има нова шанса за докажување.

После Марин Чилиќ, уште еден квалитетен тенисер ќе мора да го пропушти настапот на Вимблдон поради коронавирус. Ланскиот финалист Матео Беретини објави дека е позитивен на Ковид-19 и нема да може да учествува на гренслем – турнирот.

„Со огромно жалење морам да објавам дека го прекинувам настапот на Вимблдон бидејќи сум позитивен на Covid-19. Немам зборови за да го опишам разочарувањето што го чувствувам. Сонот за оваа година предвреме заврши, но ќе се вратам уште посилен во 2023“, објави Матео Беретини.

На негово место ќе игра „среќниот губитник“ Елијас Имер, кој денеска ќе се сретне со Кристијан Гарин.