Спорт
Роналдо за проблемите во Манчестер јунајтед: Не е до тренерот

Манчестер jунајтед не успеа да излезе од кризата ниту откако го смени тренерот. По поразот од Вулверхемптон на Боксинг деј, тимот од „Олд Трафорд“ е на скромното на 14. место во Премиер лигата.
Катастрофалните резултати продолжуваат и откако Рубен Аморим ја презеде функцијата менаџер, а неговиот сонародник и поранешна клупска ѕвезда Кристијано Роналдо смета дека проблемот не е менаџерот.
„Премиер лигата е најтешката лига на светот. Нема лош тим, сите се борат, сите трчаат, сите тимови се силни.
Фудбалот целосно се промени. Нема лесни натпревари.
Го кажав ова и претходно, но ќе продолжам да го повторувам: Проблемот не се тренерите. Ќе дадам пример со аквариум:
Имаш болна риба во аквариумот, ја вадиш и го решаваш проблемот, ако повторно ја вратиш во аквариумот, пак ќе биде болна.
Проблемот во Манчестер јунајтед е ист. Проблемот не е секогаш тренерот. Има многу повеќе од тоа“, објасни Роналдо.
Потоа Португалецот додаде:
„Да бев сопственик на клубот, ќе ги поправев работите што не се во ред“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Скај Спорт: Кевин Де Брујне го напушта Манчестер сити

Кевин Де Бујне (33), еден од најдобрите играчи од средниот ред во светот и легенда на Манчестер сити, на крајот од сезоната ќе го напушти клубот како слободен играч, објави „Скај Спорт“.
Белгиецот кој во Сити пристигна во 2015 година за 76 милиони евра, одби да го продолжи договорот со клубот. Де Брујне одигра 409 натпревари за Сити, постигна 105 голови и забележа 173 асистенции. Со клубот освои шест титули во Премиер лигата, два ФА купа, пет Лига купови и во 2023 толку посакуваната Лига на шампиони.
Иако Де Брујне и понатаму е еден од најдобрите играчи во светот, се чини дека Пеп Гвардиола решил да тргне во насока на подмладување на тимот. Белгиецот во јуни ќе наполни 34 години, а во последно време често го мачат повредите.
Според последните информации тој би можел да ја продолжи кариерата во МЛС. Сан Диего новиот клуб во лигата, наводно е во напредни преговори со белгискиот играч за врска. Американскиот клуб му нуди статус на ѕвезда и улога на клучен играч во првата сезона во МЛС.
Спорт
Лука Карабатиќ ја заврши репрезентативната кариера

Францускиот ракометар Лука Карабатиќ објави дека ставил крај на репрезентативната кариера.
Карабатиќ (36) со француската репрезентација има освоено десет медали на големите натпреварувања, од кои пет златни. Во моментов е член на Пари Сен Жермен.
„По Олимпијадата дојде до смена на генерацијата, а кога се вратив на тренинзите по мојата повреда во ноември 2024 година, сфатив дека многу познати лица повеќе ги нема. Тоа ме натера да се преиспитам. По неуспехот на Олимпијадата, не сакав да ја завршам репрезентативната кариера со чувство на горчина.
Сè уште имав можност да играм на големо натпреварување и да се обидам да ја завршам кариерата на високо ниво“, изјави меѓу другото Карабатиќ на социјалните мрежи.
Карабатиќ годинава со репрезентацијата на Франција го освои бронзениот медал на Светското првенство.
„Уживав на последниот турнир. Не беше лесно, но успеав да уживам. Секако, не ја освоивме титулата, но да ја завршам репрезентативната кариера со медал е посебно чувство“, истакна ракометарот на Пари Сен Жермен.
Спорт
Артета: Не се откажуваме од борбата за титулата

Арсенал не се откажува од борбата за титулата во Премиер лигата.
Така барем вели Микел Артета, иако предноста на Ливерпул е огромна. „Црвените“ имаат 11 бода и меч повеќе од Арсенал на девет кола пред крајот на првенството.
„Нема откажување од борбата за титулата. Само преку мене мртов“, истакна шпанскиот стручњак, а потоа дополнително објасни: „Ако престанам да верувам, ќе си одам дома. Математички се уште е можно“.
Арсенал во среда гостува кај Нотингем Форест во вонредно коло, додека лидерот Ливерпул го пречекува Њукасл.