Спорт
Саинс го продолжи договорот со Ферари

Ферари и Карлос Саинс ја продолжија соработката, Шпанецот ќе биде дел од италијанскиот тим до 2024 година.
Карлос Саинс дојде во Ферари во 2021 година од Мекларен и веднаш покажа дека ќе биде многу корисен за тимот од Маранело. Тој често беше подобар во својата прва сезона во Скудерија од колегата Шарл Леклер, имаше долга серија трки во кои завршуваше во поени, а 2022 започна уште подобро за него.
Малку разочара во Австралија, но беше одличен во Бахреин и Саудиска Арабија. Ферари затоа му понуди нов договор, па Карлос ќе остане во Италија до 2024 година.
„Многу сум среќен што потпишав договор со Ферари. Нема подобар тим во Формула 1 и тоа секогаш сум го кажувал. Уникатно и неспоредливо е кога ќе ја облечеш оваа униформа и кога го претставуваш овој тим. Мојата прва сезона беше солидна и конструктивна, напредувавме заедно. Резултатот е јасно видлив оваа сезона“, изјави Карлос Саинс.
Шпанецот е во Формула 1 од 2015 година кога возеше за Торо Росо, потоа беше во Рено во 2017 и 2018 година, по што следуваа две години во Мекларен. Во својата прва сезона во Ферари, тој заврши на петтото место во генералниот пласман.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
(Видео) Дончиќ за судењето: Вакво нешто никогаш не ми се случило во животот

Најдобриот словенечки кошаркар, Лука Дончиќ, даде изјава за медиумите по натпреварот против Германија, кој неговата репрезентација го загуби со 99:91. Дончиќ натпреварот го заврши со 39 поени, 10 скока и седум асистенции.
Словенија водеше во поголемиот дел од натпреварот, но не издржа, Германците направија пресврт во последниот период.
„Горд сум на Словенија. Навистина сум горд“, беше првото нешто што го кажа Дончиќ во микс-зоната на салата во Рига.
Беше прашан дали чувствувал дека судиите не го почитуваат. За потсетување, тој доби техничка грешка веднаш на почетокот, а потоа уште една лична грешка во првите три минути.
Полувремето го заврши со три, а на почетокот од третиот период ја заработи и четвртата лична грешка, што значително ја ограничи неговата продуктивност и во одбраната и во нападот.
„Не сакам да зборувам за судиите. Навистина не сакам. Но, четири фаули на почетокот на третата четвртина, нешто такво никогаш не ми се случило во животот.“
Што се ве боли?
„Не кревајте паника. Ќе имам неколку дена за одмор, па потоа започнува новата сезона“, подвлече Дончиќ.
Foto/ EPA
Спорт
Пелистер со победа ја започна сезоната во Лигата на шампионите

Ракометарите на Пелистер со победа ја отворија новата сезона во Лигата на шампионите. Вечерва во Битола македонскиот првак го победи Загреб со 25:23 (13:12).
Натпреварот беше тврд и неизвесен, на крајот пелистерци имаа среќа и ја остварија победата.
Пелистер водеше во текот на целото прво полувреме, најмногу со три гола, но Загреб во ниту еден момент не му дозволи на протигвникот да се одлепи. Со два гола гостите го заклучија првиот дел (13:12).
Стартот на вториот дел им припадна на гостите, со серија од четири гола го презедоа водството (14:16). Пелистер одговори со три гола (19:18), а во последните 10 минути домашните влегоа со предност од три гола (23:20, 24:21).
Сепак Пелистерци дозволија мечот да има драматичен финиш. Пешевски при резултат 24:23 промаши зицер на 24 секунди до крајот. Загреб лошо го одигра последниот напад, Хеидарирад го одбрани шутот на Кларица, а потоа на празен гол погоди, со што ја круниса добрата партија во вториот дел.
Иранскиот голман забележа шест одбрани, додека најефикасни беа Мансков со осум и Кузмановски со шест гола.
Foto/ facebook.com/hceurofarmpelister
Спорт
Дончиќ испиша историја, Германија избори полуфинале на Евробаскетот

Кошаркарите на Германија обезбедија пласман во полуфиналето на Европското првенство.
Во натпревар полн со возбудувања, актуелните светски шампиони ја победија Словенија со 99:91.
И покрај победата на „Панцерите“, натпреварот го одбележа неверојатниот Лука Дончиќ, кој го одигра речиси целото второ полувреме со четири фаули, и покрај тоа, го сруши рекордот на Евробаскетот.
Натпреварот го заврши со 39 поени (11/25 од поле), што е најмногу во историјата на четвртфиналињата на континенталното натпреварување. Тој имаше и 10 скока, односно седум асистенции, како и три изгубени топки.
Ова беше осмиот натпревар во неговата Евробаскет кариера во кој постигна најмалку 30 поени, а само Дражен Петровиќ (9), Радивој Кораќ (12) и Никос Галис (23) имаат повеќе од него.
Клемен Препелиќ со 13 и Грегор Хорват со 11 беа единствените кои имаа двоцифрен број поени кај Словенија.
Германците не блескаа, но на крајот сепак покажаа дека се подобар тим. Франц Вагнер беше најефикасен со 23 поени (седум скока, четири асистенции), но постигна повеќе од половина од поените од линијата за слободни фрлања (13/14).
Денис Шрудер го заврши натпреварот со 20 поени и седум асистенции, со 1/9 тројка. Тајс имаше 15, Ло 11, а Обст исклучително вредни 10 поени.
Словенија остана без гориво на крајот. Иако беа брилијантни три периоди, падот на концентрацијата на крајот од третиот период ги чинеше скапо.
Тимот на Александар Секулиќ водеше во поголемиот дел од првите 30 минути. На Германија вештачко дишење и даде неверојатната тројка на Тристан Да Силва со свукот на сирената, откако Николиќ промаши чист шут за предност од девет поени.
Потоа во првата минута од последната четвртина Германците постигнаа уште шест поени, го презедоа водството и не го испуштија до крајот.
Германија во полуфиналето ќе игра против Финска, во второто полуфинале ќе играат Грција и Турција.
Foto/ EPA