Се чини дека крајот на Евробаскетот не значи и крај на расправиите – барем не меѓу селекторот на Турција, Ергин Атаман, и МВП на турнирот, германскиот плејмејкер Денис Шрудер.

Сè започна кога Атаман изјави дека е „најдобриот тренер во последните десет години“. На тоа реагираше Шрудер, а турскиот стратег возврати со коментар дека Германецот е „проблематична личност“.

„Германија победи во натпревар кој мислеше дека ќе го изгуби, па играчите добија дополнителен елан. Шрудер со ова видео покажа одреден проблем во карактерот. Не е тоа голем проблем, го припишувам на младоста. Но, тренерите во НБА треба да размислат – не е случајно што игра за различен тим секоја година“, изјави Атаман.

МВП-играчот на Евробаскетот не молчеше. Со порака на Инстаграм, Шрудер му возврати директно:

„Среќа што никогаш нема да бидеш мој тренер. Јас не ја започнав оваа расправија – ти ја започна. Ако веќе зборуваш глупости, поткрепи ги со аргументи – а тоа не го направи. Жал ми е, тренеру, звучи како да си повреден. Сепак, само љубов. Јас ќе бидам тоа што сум, а луѓето што ме познаваат – знаат.“

Не е првпат Атаман да влегува во вербални дуели со противници и кошаркари, но овојпат ја предизвика реакцијата на еден од најгласните и најхаризматични играчи во Европа. Спорот меѓу двајцата продолжува да ја бранува јавноста, а навивачите веќе коментираат дали ова ќе има епилог и на теренот.

Арсенал приреди вистинска драма на „Сент Џејмс Парк“ и со гол во судиското продолжение успеа да слави против Њукасл со 1-2. Херој на „топчиите“ беше Габриел, кој во 96. минута со прецизен удар со глава по корнер од десната страна ја затресе мрежата на Ник Поуп и го искачи својот тим на второто место на табелата, веднаш зад лидерот Ливерпул, со само два бода негатива.

Домашниот тим прв стигна до предност благодарение на Ник Волтемаде, кој погоди во 34. минута. Но, Арсенал не се предаде и постојано притискаше.

Наградата дојде во завршницата. Прво Микел Мерино израмни во 84. минута, а потоа Габриел го комплетираше големиот пресврт со погодок во последните мигови од мечот.

Српскиот напаѓач Душан Влаховиќ повторно е во фокусот на шпекулациите за трансфер, а овојпат како најсериозен кандидат за неговиот потпис се споменува англискиот гигант Манчестер Јунајтед.

Влаховиќ во текот на летото беше практично отпишан од Јувентус. Одби да го продолжи договорот под услови на пониска плата, одби понуди од Турција и од Саудиска Арабија, по што односот со раководството се влоши. Според важечкиот договор, 25-годишниот голгетер може да си замине како слободен агент на крајот на сезоната, но „старата дама“ би можела да инкасира одредена сума доколку го продаде уште во јануари.

Според „Газета дело Спорт“, Јунајтед е моментално во најдобра позиција.

„Влаховиќ е поблиску до Манчестер Јунајтед отколку до Челзи. Иако ‘сините’ покажаа интерес, ‘црвените ѓаволи’ се први фаворити за негово доведување. Прашање е само дали тоа ќе се случи во јануари или на крајот на сезоната“, пишува „Газета“.

Кризата во која се наоѓа Манчестер Јунајтед ги тера челниците на клубот да бараат нови решенија. Иако ова лето беа донесени Матеус Куња, Бењамин Шешко и Брајан Мбеумо, тимот и натаму тоне – моментално се само на 14. место во Премиер лигата со седум бода.

За Влаховиќ е подготвена и огромна понуда – седмична плата од 370.000 фунти (над 19 милиони фунти на годишно ниво). Тоа е токму износот што српскиот напаѓач го бараше. Во моментов тој е најплатениот играч во Серија А со нето 12 милиони евра годишно.

Манчестер Јунајтед нема да биде сам во трката, затоа што и Баерн Минхен планира повторно да се активира.

„Влаховиќ е на листата на Баерн. Разговори имало и претходно, но не дојде до договор. Тој е тип на напаѓач што клубот го бара“, најави „Билд“.

Влаховиќ сезонава има одличен ефект, на девет натпревари постигна шест погодоци. Вкупно во дресот на Јувентус има 62 голови во 151 настап.