Спорт
Саудиски правила: Богатство за Златната топка и брејк од 167 поени
Никој од осумте најдобри снукер играчи во светот не помисли да ја одбие поканата за првиот гала-турнир во Ријад, Светскиот мастерс, каде ќе бидат претставени новите „саудиски правила“ на играта.
Екстравагантните организатори на турнирот решија засекогаш да го сменат снукерот со воведување на златната топка.
Златната топка ќе биде поставена во центарот на зоната „болк“, зад кафената топка и нема да се игра со неа освен ако играчот не постигне максимален брејк од 147 поени.
Тогаш ќе има предвид дека може буквално да ја удвои заработката за цела сезона, доколку по последната црна топка ја уфрли и златната на спротивната страна од масата.
Формално ќе вреди 20 поени, па така новиот „саудиски максимум“ ќе биде 167 поени, но тоа е помалку важна информација од премијата што го чека секој играч кој ќе стигне до златната топка и ќе успее да ја смести во дупката.
Секој што ќе направи „златен брејк“ ќе добие чек на 460.000 евра.
За споредба, Џад Трамп, кој ја предводи едногодишната листа, оваа сезона од премии на сите турнири заработил 631.000 евра.
Само Рони О’Саливен заработи повеќе од 460.000 евра во сезоната 2023/24.
Златната топка ќе биде отстранета од масата во моментот кога ќе се изгуби можноста за максимален брејк. Дотогаш на масата ќе стои топката вредна речиси половина милион евра.
Тоа не е се кога се парите во прашање. Титулата на Светскиот мастерс во главниот град на Саудиска Арабија ќе биде наградена со 583.000 евра.
О’Саливен, кој сезонава ги освои двата најпрестижни турнири досега, шампионатот на Велика Британија и Мастерсот, заработи 492.000 евра.
На Светскиот мастерс, покрај Трамп и О’Саливен, ќе учествуваат и Марк Ален, Лука Бресел, Марк Селби, Шон Марфи, Марк Вилијамс, Али Картер и двајца кои ќе добијат специјална покана.
Натпреварот започнува во понеделник.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Хрватска го дозна противникот во полуфиналето од квалификациите за ОИ
Противник на хрватската кошаркарска репрезентација во полуфиналето од квалификациите за Олимписките игри ќе биде Доминиканска Република.
Ова и официјално беше потврдено откако домаќинот Грција во последниот натпревар го победи Египет со 93:71. Хрватска во сабота од 20 часот ќе игра со Доминиканската Република.
Противникот на Хрватска на овој турнир не може да смета на неколку клучни играчи.
Во споредба со ланското Светско првенство, го нема центарот Карл-Ентони Таунс, ѕвездата на Минесота Тимбервулфс, како и Анхел Делгадо, исто така центар, кој игра за Галатасарај.
Недостига и Лестер Кињонес од Голден Стејт Вориорс.
Еден од предводниците на оваа репрезентација е 26-годишниот плејмејкер Андрес Фелиз, кој од следната сезона ќе настапува за Реал Мадрид, а тука е и Крис Дуарте, шутер кој настапува за Сакраменто Кингс во НБА лигата.
Во случај на победа над Доминиканската Република, Хрватска би се пласирала во квалификациското финале кое ќе се игра веќе во недела.
Нејзин противник би бил подобриот од дуелот Словенија и Грција.
Спорт
Бојан Богдановиќ во Бруклин
Њујорк Никс направи голема работа и се договори со Бруклин Нетс.
Њујорк Никс веќе имаат шампионски тим од универзитетот Виланова, бидејќи Џејлен Брансон, Џош Харт и Донте Дивиченцо ја делат соблекувалната, а сега ќе им се придружи и Мајкл Бриџис.
Играчот беше превземен од Бруклин Нетс во Њујорк Никс и сега целата зделка ќе биде завршена.
Според Шемс Чаранија, во се е вклучен и Бојан Богдановиќ.
Никс договорија тригодишен договор вреден 9 милиони долари со Малик Милтон, кој заедно со Бојан Богдановиќ ќе оди во Бруклин Нетс, а во Њујорк доаѓа Кеита Бејтс-Диоп, како и Мајкл Бриџис, кој е централна фигура на оваа размена.
Оваа година, поради големиот број повреди, Никс го пропуштија Источното финале кога беа поразени во седмиот натпревар во Медисон Сквер Гарден од Индијана Пејсерс.
Спорт
УЕФА жестоко го казни Демирал
Турскиот стопер Мерих Демирал е суспендиран од УЕФА поради истакнување на симболот на терористичка организација.
Мерих Демирал ги постигна двата гола во победата на Турција над Австрија во осминафиналето на Европското првенство, а натпреварот заврши со резултат 2:1.
Демирал ги прослави головите покажувајќи го поздравот на „Сивите волци“, односно симбол на десничарската екстремистичка идеологија, која во некои земји се смета за терористичка порака.
Демирал на тој начин доби казна за која сигурно нема да игра во четврт-финалето кое Турција ќе го игра в сабота против Холандија, а дури и да се пласира во полуфиналето неговата селекција нема да биде во тимот.
Стоперот ќе може да им помогне на своите момци само доколку Турција се пласира во финалето на Европското првенство, одлучи УЕФА.