Манчестер Сити го комплетираше трансферот што им дава дополнителна надеж дека можат да ја освојат титулата оваа сезона.

Од денес и официјално, Антоан Семењо е нов играч на „Граѓаните“. На сметката на Борнмут се уплатени 75.000.000 евра, што дефинитивно е најголемиот трансфер во овој преоден рок.

Семењо се збогува со својот поранешен клуб на уникатен начин, со гол за победа против Тотенхем (3:2), во 95-та минута.

„Го гледав Сити во текот на последната деценија под водство на Пеп Гвардиола и тие беа доминантен тим во Премиер лигата, со неверојатен успех во Лигата на шампионите, ФА Купот и Лига Купот. Тие поставија највисоки стандарди и тоа е клуб со играчи од светска класа, одлични услови и еден од најголемите тренери на сите времиња – Пеп.

Имам огромен простор за напредок, па затоа доаѓањето во овој клуб, во оваа фаза од мојата кариера, е совршено за мене. Голема привилегија е да бидам тука.

Сигурен сум дека мојот најдобар фудбал допрва доаѓа. А Сити е во одлична позиција – сè уште е во игра во четири натпреварувања. Навистина верувам дека можам да им помогнам да имаат силна втора половина од сезоната.

Етихад е мојот нов дом. Едвај чекам да играм пред навивачите тука и се надевам дека ќе им покажам на сите што можам да направам“, се претстави Семењо.

Патем, тој го зеде бројот што некогаш го носеше Јаја Туре, 42.

Полуфиналниот натпревар од шпанскиот Суперкуп помеѓу Реал Мадрид и Атлетико Мадрид (2:1) во Џеда донесе многу тензии, не само на теренот, туку и крај аут линијата. Тренерот на Атлетико, Диего Симеоне, и напаѓачот на Реал, Винисиус Жуниор, беа во центарот на вниманието.

Нивната расправија стана главна тема по натпреварот, особено поради репликата што Симеоне ја упати кон Бразилецот: „Флорентино ќе те исфрли, запомни“.

Тренерот Чаби Алонсо се вклучи во дискусијата, а Реал Мадрид наводно е незадоволен од ставот на аргентинскиот тренер.

Иако Симеоне не сакаше подетално да го коментира инцидентот на прес-конференцијата, од таборот на Атлетико тврдат дека конфликтот започнал со провокациите на Винисиус, пишува шпански „АС“.

Според верзијата од таборот на Атлетико, сè започнало откако Винисиус побарал пенал по дуелот. Бразилецот потоа наводно се свртел кон клупата на Атлетико со гестови што ги разбесниле сите во соперничкиот табор. „Смирете се, сега ќе досудат пенал“, е реченицата што Винисиус им ја упатил, врдат од Атлетико.

Токму тогаш, Симеоне го замолил фудбалерот да продолжи да игра, а во средината на расправијата, тој ги изговорил зборовите за неговата иднина што биле снимени од камерите: „Ќе те исфрлат“.

Тренерот подоцна разговарал за ова со Федерико Валверде и Дани Карвахал на пат кон соблекувалната.

По средбата, Симеоне се обидел да ги смири тензиите. „Што се случува на теренот, останува на теренот“, им рекол тој на новинарите. Сепак, Чаби Алонсо не се согласил со таков став, кратко велејќи: „Не е сè дозволено“.

Во Атлетико веруваат дека целата ситуација нема да има големи последици, нагласувајќи дека ова не е прво дерби во кое Винисиус е во центарот на слични настани. Исто така, велат дека го разбираат ставот на Чаби Алонсо, кој го брани својот играч, бидејќи тоа е неговата улога.

Foto/ EPA

Во Тајланд, му се заблагодарија на поранешниот играч на Партизан, Немања Николиќ (33), а тој одговори во коментарите со навредлива порака: „Пу..те ми го к..ов“.

Тајландскиот клуб Бурирам Јунајтед објави проштална објава на социјалните мрежи за својот поранешен напаѓач, со зборови на благодарност за неговата посветеност и професионализам и желби за успех во неговата идна кариера, со слоганот „Еднаш син, секогаш син“.

Сепак, тоа дополнително го налути фудбалерот. Николиќ, кој се пресели во Бурирам ова лето, но не дебитираше, не одигра ниту една секунда поради ограничувањата за странци во лигата,.

По некое време, клубот го избриша коментарот, кој собра околу 2.800 лајкови, но навивачите продолжија да го навредуваат Бурирам.

Николиќ помина само два и пол месеци во Бурирам пред да го раскине договорот, по што се врати во Србија и тренираше со Чукарички, а сега се шпекулира за негов трансфер во Будуќност Подгорица.

Според „Трансфермаркт“, Николиќ вреди 500 илјади евра.