Шест слободни места останаа за Светското првенство во САД, Мексико и Канада. За едно од нив ќе се бори и Македонија. Нашата селекција е една од 16-те европски селекции кои ќе играат бараж во март наредната година, а само четири од нив ќе се пласираат на Мундијалот.

Последните две селекции, учеснчки на СП ќе бидат познати по одигрувањето на интерконтиненталниот бараж. Турнирот ќе се игра во Мексико, а таму ќе бидат Боливија (зона Јужна Америка), Нова Каледонија (зона Океанија), Ирак (Азија), Јамајка и Суринам (Северна и Централна Америка) и ДР Конго (зона Африка).

Каков е системот на интерконтинеталниот бараж? Од шесте репрезентации, двете најдобро рангирани според листата на ФИФА, Конго и Ирак, се директно во финалето, а преостанатите четири репрезентации ќе играат за уште две места, во полуфиналето на интерконтиненталниот плејоф.

Според сè уште неофицијални информации, сите тие натпревари треба да се играат на тлото на Северна Америка, најверојатно на два стадиони во Мексико, во март 2026 година.

Интересно е што неколку месеци пред тие дуели ќе се одржи ждрепката за Светското првенство, поточно на 5 декември во Вашингтон. Тогаш сè уште нема да бидат познати последните шест учесници на Светското првенство, два преку интерконтиненталниот бараж и четири преку европскиот.

Затоа, ФИФА ќе ги класифицира сите тие шест репрезентации во најлошиот, четврти шешир, без оглед на нивното место на ранг-листата.

Кошаркарите на Лос Анџелес Лејкерс ја забележаа 11-та победа во 15-от натпревар од почетокот на сезоната. „Езерџиите“ на домашен терен ги победија Јута Џез со 140:126.

Доминираше Лука Дончиќ со 37 поени, пет скока и десет асистенции, по него следуваа Остин Ривс со 26 и Диандре Ајтон со 20 поени и 14 скока. Кај гостите се истакнаа Кејонте Џорџ со 33 и Лаури Марканен со 31 поен.

На овој натпревар, Леброн Џејмс, кој е во својата 23-та сезона во НБА, го одигра својот прв натпревар.

Еден од најдобрите кошаркари во светот забележа дабл-дабл учинок со 11 поени и 12 асистенции во своето деби.

Леброн така стигна до неверојатната бројка од рекордни 1.293 натпревари во кои имаше двоцифрен број поени.

Џејмс не успеа да постигне поен во првите 11 минути на теренот, но потоа погоди две тројки по ред, што беше доволно да го престигне Реџи Милер како шести најдобар тројкаш во историјата на лигата.

Изминатата ноќ, нова победа забележаа Детроит Пистонс. Лидерот на Истокот, ја забележа 13-та победа во сезоната, а триумфот во Атланта (120:112) беше нивни 11-ти по ред.

Кејд Канингем, кој се врати од повреда, постигна 25 поени со десет асистенции.

Џејлен Дурен, кој игра одлично оваа сезона, го заврши натпреварот со 24 поени, Данкан Робинсон постигна 14 поени.

Кај Атланта, Џејлен Џонсон имаше 25 поени, Хокс беа сериозно ослабени, бидејќи на теренот го немаше Закари Ризаше заедно со Треј Јанг и Кристапс Порзингис.

Резултати:

Орландо – Голден стејт 121:113
/Бејн 23 – Кари 34/

Бруклин – Бостон 99:113
/Портер 25 – Браун 29/

Сан Антонио – Мемфис 111:101
/Фокс 26 – Кауард 19/

Портланд – Феникс 110:127
/Шарп 29 – Букер 19/

По 52 години, фудбалската репрезентација на Хаити, повторно ќе игра на Светското првенство.

Во решавачкиот натпревар, Хаити ја победи Никарагва (2:0) со головите на Дедсон и Провиденс и со тоа заврши како лидер во квалификациската група Ц, во зоната КОНКАКАФ пред Хондурас.

Можеа да изборат пласман и со нерешен резултат, бидејќи Хондурас одигра нерешено против Костарика (0:0), но решија да не ја остават својата судбина во туѓи раце, бидејќи облогот беше да се вратат на најголемата сцена по повеќе од половина век.

Приказната на оваа репрезентација е уште поголема, ако се знае дека не одиграа ниту еден натпревар на домашен терен во овие квалификации.

Од атентатот врз претседателот Жовенел Моиз во 2021 година, во земјата постојано се водат војни на бандите кои се борат за превласт. Главниот град Порт-о-Пренс е 85 проценти под нивна контрола, додека минатата година го „презедоа“ националниот стадион, пишува „ESPN“.

Во вистинска смисла на зборот, не одиграле натпревар како домаќини повеќе од четири години, но ништо од тоа, дури ни поплавите и лошото време што никогаш не ги заобиколуваат, не ги спречија да се пласираат на завршниот турнир по втор пат во нивната историја.

Покрај Хаити од зоната КОНКАКАФ, пласман на СП изборија Курасао и Панама, додека патото до Мундијалот преку интерконтиненталниот баражот ќе го бараат Јамајка и Суринам.

Foto/ EPA