Спорт
Сега и официјално – Самсоненко крева раце од Вардар!
Тоа за што подолго време се шпекулира, денеска е и официјално потврдено – рускиот бизнисмен Сергеј Самсоненко по седум години на чело на РК Вардар, си заминува од клубот.
Во објава на официјалната веб-страница на РК Вардар, Самсоненко со соопштение вели дека по големите средства што ги вложил во клубот и ветената помош, не може да продолжи со финансирањето на клубот.
Под водство на Самсоненко, РК Вардар стигна до титулата европски шампион во 2017 година, освои 4 титули од регионалната СЕХА-лига, а ЖРК Вардар трипати беше бронзен, а двапати сребрен во големите европски финалиња.
Известувањето на Самсоненко во целост:
Почитувани граѓани, пријатели! Почитувана јавност!
Изминува веќе 7. година од моето раководење и финансирање на ракометот во државата почнувајќи од ЖРК Вардар во 2012 година и веќе во 2013 година приклучувајќи го и РК Вардар.
Од седумте години поминати во ракометот, за жал, изминува веќе третата година како јас лично се борам од ден на ден за издржување на клубот, со постојано задолжување и земање кредити. Покрај оваа борба што ја водам секој ден, зад мене има повеќе од 5.000 вработени во моите компании, кои ги издржувам со нивните семејства и кои не сакам да ги загрозувам, а веќе тоа се одразува со моето постојано задолжување за спортот.
Приходот што ракометниот клуб го има од страна на Европската ракометна федерација и од спонзори изминативе години не е ни 10 отсто од буџетот што јас го давам годишно.
Добив премногу ветувања дека за кратко ќе добијам помош за ракометот, но еве веќе, како што напоменав, измина и седмата година и таа помош ја нема.
Ова е причината поради која јас од следната сезона не сум во можност да продолжам со финансирањето на ракометниот клуб Вардар.
Во изминатите години РК Вардар како симбол на државата доминира во спортот. Вардар е и ќе биде национална гордост за секој граѓанин. Вардар стана европски првак во машка конкуренција во ЛШ во 2017 година и на нашата земја ѝ го донесе европското злато.
„Црвено-црните“, како што нè нарекуваат, ја освоија европската круна во Келн и никогаш нема да заборавам, ниту јас ниту сите граѓани, како во Скопје нè пречекаа илјадници луѓе и се поклонија за успехот на ракометарите.
Да не заборавиме дека 6 сезони во ЖРК Вардар донесоа: 6 првенствени титули, 5 купа на РМ, 5 учества во Лигата на шампионите, од кои трипати европска бронза и двапати го освоивме второто место.
Шест сезони во РК Вардар донесоа: 4 првенствени титули, 5 купа на РМ, 2 супер купа на РМ, 4 регионални СЕХА-титули, едно изгубено полуфинале во Лигата на шампионите и титулата со непроценливо значење – освојувачи на ЛШ во 2017 година.
Поради сето ова погоре, со ова мое искрено писмо отворено ги повикувам сите македонски бизнисмени да дојдат и да се приклучат кон финансирањето на ракометниот клуб.
Вардар е едната радост на нашата земја! Се надевам дека ова ќе допре до вашите срца и заедно ќе ја сочуваме нашата гордост!
Со почит,
Сергеј Самсоненко
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
(Видео) Челзи ја декласира Барселона, Баер го победи Манчестер Сити
Фудбалерите на Челзи ја надиграа и убедливо ја поразија Барселона со 3:0, во петтото коло во Лигата на шампионите. За разлика од Челзи, Манчестер Сити доживеа пораз на домашен терен од Баер Леверкузен 0:2. Победи вечерва забележаа Борусија Дортмунд, Наполи, Олимпик Марсеј и Јувентус, додека Славија и Атлетик Билбао одиграа без голови.
Фудбалска рапсодија на Челзи на „Стенфорд Бриџ“. Екипата на Енцо Мареска во сите сегменти ја надигра Барселона. Едина единствена шанса имаше Барселона, во раната фаза на натпреварот, кога сам пред Санчез беше Феран Торес и шутираше крај голот.
Останатиот дел од натпреварот му припадна на Челзи. До водството кое дојде со автоголот на Кунде, на челзи му беа поништени два гола. Дека Барселона ќе доживее пораз беше јасно во 43-та минута кога Араухо беше исклучен поради два жолти картони.
Во второто полувреме, уште еден поништен гол на Челзи, а потоа Естевао постигна брилијантен гол за 2:0, а резервата Делап стави точка на мечот во 78-та минута.
На „Еихад“ во Манчестер, Пеп Гвардиола го потцени Баер леверкузен и доживеа пораз. Гвардиола со комбиниран тим го започна натпреварот, како да станува збор за Лига купот, а не за меч во Лигата на шампионите.
Халанд, Рејндерс, Черки влегоа на теренот на 25 минути до крајот, кога гостите имаа предност од два гола.
До неа дојдоа со головите на Грималдо во 23-та и Шик во 57-та минута.
Резултати:
Ајакс – Бенфика 0:2 (0:1)
/Дал 6, Бареиро 90/
Галатасарај – Унион Сен Жилоа 0:1 (0:0)
/Дејвис 57/
Боде/Глимт – Јувентус 2:3 (1:0)
/Бломберг 27, Фет 87 пен – Опенда 48, Мекени 59, Дејвис 90+1/
Борусија (Д) – Виљареал 4:0 (1:0)
/Гираси 45+2, 54, Адејеми 59, Свенсон 90+5/
Челзи – Барселона 3:0 (1:0)
/Кунде 28 a.г., Естевао 55, Делап 73/
Манчестер Сити – Баер Л. 0:2 (0:1)
/Грималдо 23, Шик 54/
Наполи – Карабаг 2:0 (0:0)
/ Мектомин 66, Јанковиќ 72 а.г./
Марсеј – Њукасл 2:1 (0:1)
/Обамејанг 46, 50 – Барнс 6/
Славија (П) – Атлетик Билбао 0:0 (0:0)
Спорт
Вардар 1961 го декласира Сесвете
Ракометарите на Вардар 1961 го обезбедија првото место во Ф групата и пласман во Топ 16 фазата, во Европската лига. Вечерва на гостински терен го декласираа тимот на Сесвете со 38:24 (23:12).
Сесвете против Вардар 1961 се држеше до резултат 3:5, потоа црвено-црните се одлепија на 4:9 и од тој момент натпреварот стана еднонасочна улица.
Предноста на Вардар 1961 растеше со секоја следна минута.
Валах забележа 11 интервенции, а најефикасен беше Митровиќ со седум гола.
Црвено-црните ќе ка заокружат првата фаза во Европската лига со натпреварот против Тулуз на домашен терен.
Табела:
Foto/ rk vardar. com.mk
Спорт
ФИФА го одреди распоредот на ждрепката, Хрватска е во вториот шешир
Меѓународната фудбалска федерација (ФИФА) ги објави шеширите во ждрепката за Светското првенство во 2026 година, кое ќе се одржи во Соединетите Американски Држави, Канада и Мексико.
Победниците од шесте плејоф натпревари се во четвртиот шешир. Ждрепката ќе се одржи на 5 декември во 18:00 часот во Вашингтон. На Светското првенство во 2026 година за прв пат ќе учествуваат 48 репрезентации поделени во 12 групи.
Во првиот шешир се домаќините Канада, Соединетите Американски Држави и Мексико, како и деветте најдобро рангирани репрезентации на ранг-листата на ФИФА: Шпанија, Аргентина, Франција, Англија, Бразил, Португалија, Холандија, Белгија и Германија.
Во вториот шешир се Хрватска, Мароко, Колумбија, Уругвај, Швајцарија, Јапонија, Сенегал, Иран, Јужна Кореја, Еквадор, Австрија и Австралија.
Во третиот шешир е најдобрата репрезентација на европските квалификации, Норвешка, како и Египет, Алжир, Шкотска, Парагвај, Тунис, Брегот на Слоновата Коска, Узбекистан, Катар, Саудиска Арабија и Јужна Африка.
Во четвртиот шешир се Јордан, Зелено’ртските Острови, Гана, Курасао, Хаити, Нов Зеланд, како и победниците од четирите европски плејоф натпревари и две репрезентации од интерконтиненталниот плејоф.
Во групата А од европскиот бараж се Италија, Велс, Босна и Херцеговина и Северна Ирска, во групата Б се Украина, Шведска, Полска и Албанија, во групата Ц се Словачка, Турција, Романија и Косово, во групата Д се Чешка, Ирска, Данска и Македонија.
ДР Конго, Јамајка и Нова Каледонија се во првата колона од интерконтиненталниот бараж, додека Ирак, Боливија и Суринам се во втората колона.
За прв пат, ФИФА одлучи четирите најдобро рангирани репрезентации на ранг-листата да бидат сместени во различни делови од ждрепката, за да не се сретнат потенцијално пред полуфиналето.
„За да се обезбеди конкурентска рамнотежа, при изготвувањето на распоредот на натпреварите се утврдени два одделни пата до полуфиналето. Заради избалансирана распределба, четирите најдобро рангирани репрезентации на ранг-листата на ФИФА, Шпанија, Аргентина, Франција и Англија, ќе бидат случајно извлечени во спротивни патеки. Ова ќе осигури доколку ги освојат своите групи, дека нема да можат да се сретнат пред финалето“, објави ФИФА.
Во групите нема да има повеќе од еден претставник од истата конфедерација, освен од Европа, која може да има максимум две селекции во иста група.
Светското првенство ќе се одржи од 11 јуни до 19 јули 2026 година во 16 градови во САД, Канада и Мексико.

