Спорт
„Секој може да ја победи Барселона, нема да ја освојат Лигата на шампионите“
Тони Крос, легендарниот германски играч од средниот ред и поранешен играч на Реал Мадрид, во својот подкаст „Einfach mal Luppen“ детално ја анализираше играта на Барселона под водство на тренерот Ханси Флик.
Крос ја пофали актрактивноста и ги истакна клучните слабости за кои верува дека ќе ги чинат успех во Лигата на шампионите.
Кроос верува дека играта на Барселона е една од најзабавните за гледање во Европа, но нивната „опсесија“ секогаш да играат на ист начин ги прави исклучително ранливи.
„Барса има еден од најатрактивните стилови, ако не и најатрактивниот во цела Европа, но мислам дека преземаат премногу ризици. Кога Педри, Ламин Јамал или Рафиња имаат лош ден, секој тим може да ги победи“, рече Крос.
Тој додаде дека токму тоа ги спречува да бидат конкурентни за титулата во Лигата на шампионите.
„Можат да ги елиминираат од Лигата на шампионите. Минатата година тоа веќе им се случи со Интер, а оваа година, во осминафиналето, четвртфиналето, полуфиналето или финалето, во еден момент ќе се сретнат со таков противник кој ќе ги нокаутира. Тоа ќе им се случи во Лигата на шампионите, нема да им се случи во Шпанската лига бидејќи се многу доминантни.“
Германецот особено ги нагласи проблемите што се јавуваат во последните минути од натпреварите, кога заморот ги погодува играчите, а тактичкиот пристап останува ист.
„По 75 минути, забележувате дека сите се поуморни и гледате дека не го менуваат стилот на затворање на просторот. Ако сте уморни и не го менувате стилот на играта, станува многу јасно во каков проблем сте“, заклучи Крос.
Foto/ EPA
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Работнички испушти предност од два гола против Арсими
Два натпревари во кои немаше победник го отворија 11-то коло во Првата македонска фудбалска лига.
Арсими и Работнички ги поделија бодовите по возбудливо реми во натпревар во кој двата тима постигнаа по два погодоци. Средбата донесе динамична игра, многу возбудувања и четири гола.
Натпреварот започна со офанзивен ритам од двете страни. Во 7-та минута, Бешагиќ и Шефити комбинираа убаво, но ударот на Шефити заврши над пречката. Работнички ја имаше најдобрата шанса во 27. минута преку Кадриу но голманот Ислами одлично интервенираше и ја спаси својата мрежа.
Само три минути подоцна, Арсими возврати со опасен напад, кога Шефити шутираше силно од далечина, но голманот на Работнички повторно беше на висина на задачата. Предноста на романтичарите дојде во 40. Минута, Демир Имери со прецизен удар со десната нога го совлада голманот за 1:0. Само една минута подоцна, по центаршут од десната страна на Имери, Дрлевиќ ја погоди сопствената мрежа и зголеми на 2:0, резултат со кој заврши првото полувреме.
Во вториот дел, Арсими почна многу поагресивно, барајќи го голот на надеж. Во 68. Минута Башким Велиу постигна вистински еврогол од околу 35 метри, намалувајќи на 2:1. Притисокот на домашните продолжи, а во 85. минута по голема мешаница во шеснаесетникот на Работнички, Албан Таипи се снајде најдобро и постигна гол.
Првично, судијата го поништи погодокот поради офсајд, но по консултација со ВАР-системот, голот беше признаен на радост на домашните играчи и публиката.
По ова реми, Арсими стигна до 12 бодови и се наоѓа на осмото место на табелата, продолжувајќи со позитивна серија. Работнички останува на десеттата позиција со само 7 бодови, продолжувајќи ја кризата на резултати.
Во истиот термин нерешено (1:1) заврши и дуелот меѓу Македонија ЃП и Башкими.
Табела:

Извор/ Фудбалска федерација на Македонија
Спорт
Доживотна суспензија за двајца фудбалери на Беса Слупчане, физички го нападнаа голманот на Аеродром
Фудбалската федерација на Македонија ја информира јавноста дека Дисциплинскиот комесар на Трета лига – Север донесе одлука за доживотна суспензија на фудбалерите Орхан Демири и Ердин Арифи од ФК Беса Слупчане, поради физички напад и обид за линч на противнички фудбалер по завршување на натпреварот ФК Беса Слупчане – ФК Аеродром, одигран во рамки на 8. коло од Третата лига – Север.
Домашниот терен на ФК Беса Слупчане се суспендира на 10 (десет) натпревари. Истовремено, ФК Беса согласно дисциплинскиот правилник е должен да плати и парична казна.
Фудбалската федерација на Македонија најостро го осудува секој облик на насилство на фудбалските терени и ќе продолжи со доследна примена на сите дисциплински прописи, со цел заштита на интегритетот на натпреварите и безбедноста на сите учесници во фудбалот.
Ставот на ФФМ е јасен и недвосмислен:
Во фудбалот нема место, ниту милост за оние што се подготвени да тепаат, линчуваат и го нарушуваат угледот на фудбалот.
Извор/ Фудбалска федерација на Македонија
Спорт
Се повреди Педри, ќе отсуствува неколку недели
По поразот од Реал Мадрид, пристигнаа нови лоши вести за Барселона, повреда на мускулот заработил најдобриот играч, Педри.
Каталонските медиуми денес потврдија дека Педри ќе биде отсутен од тимот неколку недели.
Инаку, Педри доби црвен картон во судиското продолжение во Ел Класико, па дефинитивно ќе го припуштеше дуелот со Елче, но поради повредата нема да игра и против Клуб Бриж и Селта на гости, а по репрезентативната пауза, домашниот меч со Атлетик Билбао и гостувањето кај Челзи на „Стемфорд Бриџ“.
Се очекува главната цел на Педри да биде враќање за дербито со Атлетико Мадрид, кој гостува кај Барселона на 2 декември.
Ова дефинитивно е најлошата можна вест во најлошото можно време, бидејќи Рафиња, Дани Олмо, Роберт Левандовски, Гави и Џоан извесно време се отсутни поради повреди.
Во отсуство на Педри и Гави, се очекува Марк Касадо да го заземе стартното место покрај Френки де Јонг.

