Фудбалерите на Тотенхем го победија Манчестер Јунајтед, ја освоија Лига Европа и обезбедија директен пласман во Лигата на шампионите следната сезона.

Финалето во Билбао на стадионот „Сан Мамес“ заврши со резултат 1:0 (1:0). Бренан Џонсон го постигна единствениот гол во 42-та минута.

Тотенхем одигра неверојатно дисциплинирано во текот на целиот меч, ја искористија шансата преку Џонсон, а Јунајтед ќе жали за шансите на Хојлунд (кога Ван дер Вен со акробатска интервенција ја исфрли топката од гол линијата), Бруно Фернандеш и Лук Шо во претпоследната минута, кога Викарио брилијантно интервенираше.

Тотенхем го освои првиот трофеј по 2008 година, воедно ова е прв европски трофеј за клубот по пауза од 41 година. Тотенхем во 1984 година го освои Купот на УЕФА.

Фото/ EPA-EFE/GEORGI LICOVSKI

Фудбалерите на Вардар го освоија Купот на Македонија за сезоната 2024/25. Црвено-црните во финалето славеа со 2:0 над Струга ТЛ. Вардар го освои шестиот Куп во клупската историја, прв по пауза од 18 години.

Вардар до триумфот го предводеше младиот напаѓач Талевски. Ги постигна двата гола во 26. и 48.минута од натпреварот.

Струга имаше свои шанси во ова финале, но не искористи ниту една. Најдобрите не ги искористија Укпа, Радески и Кривањева кога резултатот беше 0:0. Откако Талевски го постигна првиот гол, Доминго ја погоди стативата.

Тренерот на Вардар, Гоце Седлоски го освои првиот трофеј во Купот, додека неговиот колега Илчо Ѓорѓиоски не успеа да дојде до трофејот во Купот и во своето второ финале.

Вардар со оваа победа избори пласман во квалификациите во Конференциската лига.

Барселона официјално објави дека го продолжи договорот со Ханси Флик до јуни 2027 година. Клубот ја потврди веста преку соопштение објавено на социјалните мрежи со наслов „Шоуто мора да продолжи“.

Германскиот тренер, кој првично потпиша до 2026 година кога пристигна во летото 2024 година, сега го продолжи договорот за уште една сезона, без никаква дополнителна опција за продолжување.

Веќе во првата сезона, Флик ја освои тројната домашна круна – Ла Лига, Кралскиот Куп и Шпанскиот Суперкуп.

Одлуката да ја продолжи соработката ја донел на 11 мај, веднаш по последното Ел Класико. Потоа, за време на вечерата со неговиот агент Пини Захави, а потоа и со претседателот на клубот Жоан Лапорт, тој ги финализираше деталите.

Флик, како што рече претходно на прес-конференцијата, лично инсистирал на едногодишен договор.

„Не сум тип на тренер кој сака да потпише тригодишен договор и со тоа да си ја обезбеди иднината. Сакам да работам за најдобриот клуб во светот и мојот начин на размислување е да одам сезона по сезона.“

Таква е ситуацијата сега – имам уште една година од договорот и ако сè оди добро, ќе додадеме уште една. Сакам да ја завршам мојата работа тука на најдобар можен начин“, рече Флик.

По завршувањето на сезоната 2025/2026, двете страни повторно ќе седнат и ќе проценат дали е време за уште едно продолжување на соработката.