Спорт
Шекил О’Нил: САД нема да го освојат златото на ОИ во 2028
Легендата на НБА, Шекил О’Нил во ексклузивно интервју за германски „Билд“, изјави дека европската кошарка по квалитетот ја стигнала НБА лигата и дека разликите кои некогаш постоеле веќе не се толку изразени.
О’Нил верува дека европските репрезентации сега можат рамноправно да се натпреваруваат со најдобрите тимови во светот.
„Ги гледав натпреварите на Светското првенство во Манила и не сум изненаден што Германија ги победи САД. Кога играв бевме многу пред Европа, но тоа се смени, не стигнавте. Сигурен сум дека репрезентацијата на САД нема да освои злато на Олимпијадата во Лос Анџелес“, рече тој.
О’Нил особено ја истакна Србија како нација која има потенцијал да направи големи работи на претстојните Олимписки игри во Лос Анџелес во 2028 година.
„Леброн Џејмс повеќе нема да игра, веројатно нема да игра ниту Кевин Дурант или Стеф Кари. Не гледам дека тие што доаѓаат можат да ја продолжат својата доминација. Европските тимови се многу добри. Србија, Хрватска и Германија, сите можат да освојат злато на Олимпијадата во 2028 година“, истакна тој.
Да потсетиме, репрезентацијата на САД славеше на неодамнешните Олимписки игри во Париз, во финалето ја победи Франција.
Пред тоа во драматично полуфинале Американците се соочија со Србија и едвај успеаја да победат. Тоа полуфинале беше доказ за напредокот на европската кошарка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Србија и Албанија ќе го организараат У21 ЕП во 2027 година
Србија и Албанија заеднички ќе го организираат Европското првенство за фудбалери до 21 година во 2027 година, се чека само УЕФА да ја потврди оваа информација.
Ваквата одлука е сосема извесна откако истече рокот за поднесување на кандидатури, а српско-албанската апликација беше единствена.
Конечната одлука ќе биде донесена на состанокот на Извршниот комитет на УЕФА на 16 декември.
Како што пренесуваат медиумите ширум Европа, проект за заедничка организација на овој натпревар имале и Белгија и Турција, но на крајот се откажале од поднесување на својата кандидатура.
Предлогот на Србија и Албанија, како што е објаснето, има за цел да се надминат политичките тензии меѓу двете земји со идеја за заедничка организација на турнир со 16 селекции.
Покрај сето ова, Србија и Албанија ќе бидат домаќини и на следните два Конгреса на УЕФА.
Спорт
Солскјер би прифатил да се врати во Манчестер јунајтед
Оле Гунар Солскјер бил подготвен да се врати на клупата на Манчестер јунајтет. Норвежанецот ова го изјавил на бизнис форумот во Осло, секако под претпоставка дека некој во клубот го повика да го замени Ерик Тен Хаг.
„Ако вашето семејство ве покани да им помогнете, секако дека ќе го прифатите, нели?“, рекол Норвежанецот и дополнил.
„Сепак, Манчестер јунајтед има тренер. Навистина не сакам да зборувам на таа тема во оваа ситуација. Но, ако треба да одговорам, мојот одговор би бил потврден“.
Солскјер беше сменет од клупата на Манчестер јунајтед во септември 2021 година и оттогаш нема никаков ангажман како тренер или селектор, иако имаше неколку покани, пред се од канадската репрезентација и клубови од Саудиска Арабија.
Манчестер Јунајтед моментално ја зазема 11-та позиција на табелата во Премиер лигата со седум освоени бода од пет натпревари, а во средата вечерта ремизираше на домашен терен против холандски Твенте во првиот натпревар од новото издание на Лига Европа.
Спорт
(Видео) Надреална промоција – Пјаниќ јава коњ на стадионот во Москва
Миралем Пјаниќ (34), легендата на репрезентацијата на Босна и Херцеговина со 115 настапи за националниот тим, потпиша за новиот клуб. Како слободен играч го комплетираше трансферот во ЦСКА Москва. Поранешниот играч на Јувентус, Барселона и Рома потпиша за ЦСКА до крајот на сезоната со опција за продолжување на уште една сезона.
Пјаниќ на Инстаграм ја објави веста за потписот за ЦСКА. Но, вистинското шоу започна кога Пјаниќ го објави официјалното видео за презентација.
ЦСКА по тој повод го сними Босанецот како јава коњ со наметка, на теренот на стадионот во Москва со специјална порака од Пјаниќ до навивачите.
Покрај гореспоменатите клубови, Пјаниќ настапуваше и за Лион и Бешикташ, а последните две години ги мина во Емиратите од Шарја.