Спорт
Шесте англиски клубови уште се дел од Суперлигата, чекаат „рестарт“?

Шесте англиски клубови (Манчестер сити, Манчестер јунајтед, Арсенал, Ливерпул, Тотенхем и Челси) уште се формални членови на контроверзниот проект Европска Суперлига, и организаторите сметаат дека нивниот план ќе има нов „рестарт“, тврди британскиот „Тајмс“.
Иако шесте клуба од Премиер лигата се повлекоа од Суперлигата во 72 часа по обидот за формирање на елитна европска лига во април, „Тајмс“ тврди дека тие остануваат ко-сопственици и акционери на холдинг-компанијата формирана во Шпанија, бидејќи не постои механизам за повлекување од лигата.
Организаторите, во прв план трите клуба кои ниту формално не се повлекоа од проектот – Барселона, Реал Мадрид и Јувентус, сметаат дека ова е само почеток на планот за елитната европска лига, бидејќи со сегашните средства кои ги добиваат од УЕФА едноставно „не може да се продолжи“.
Претседателот на Реал Мадрид, Флорентино Перез постојано тврди дека 12-те клуба имаат „обврзувачки договор“ и дека идејата продолжува. УЕФА минимално ги казни 9-те клуба кои се повлекоа од лигата, но ја стопираше дисциплинската постапка против Реал, Барса и Јуве поради одлуката на трговскиот суд во Мадрид, кој одлучи дека УЕФА нема право да ги казни или исклучи клубовите. Покрај тоа, Суперлигата поднесе случај пред Европскиот суд на правдата, на кој треба да се одлучи дали тие имаат право да организираат натпреварувања.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Панчев: Хуманитарен меч Вардар-Црвена звезда на 16. април

Легендата на македонскиот, југословенскиот фудбал и Црвена звезда, Дарко Панчев е скршен од тага по трагедијата во Кочани, во која во пожар во дискотеката „Пулс“ загинаа 59 лица, а преку 150 се повредени.
Европски и светски шампион со Црвена звезда, Панчев во разговор за „Спортклуб“, откри дека разговарал со генералниот директор на најтрофејниот српски клуб, Звездан Терзиќ, црвено-белите да му гостуваат на Вардар во Скопје. Идеката на Панчев е да се одигра хуманитарен натпревар.
„Останува само да се одреди датум, Црвена звезда за се ќе се договори со Вардар, директорот Терзиќ го спомна 16 април, благодарам, што друго да кажам. Во име на Кочани, Скопје и цела Македонија, Ви благодариме за грижата, за тоа што се прави за повредените, за нивниот транспорт и за лекувањето во Србија, благодареност до братскиот народ“, рече Панчев.
Спорт
Аргентина без Меси против Уругвај и Бразил

Капитенот на Аргентина, Лионел Меси нема да настапи на претстојните натпревари против Уругвај и Бразил.
Откако синоќа блескаше во победата над Атланта во МЛС лигата, Меси заработи повреда на мускулот, а по тестовите беше одлучено дека во овој прозорец нема да настапува за репрезентацијата.
Аргентина веќе обезбеди пласман на Мундијалот, прва е во јужноамериканскиот поредок со 25 бода, пет повеќе од Уругвај, па Лионел Скалони не сакаше ништо да ризикува.
Иако најави пензионирање, Меси сепак ужива во дресот на „гаучосите“, па останува да се види дали ќе игра и на СП 2026 година, кое сега не е така далеку, за нешто повеќе од една година.
Спорт
Стефан Ристовски ќе го напушти Динамо Загреб

Поранешниот капитен на фудбалската репрезентација на Македонија, Стефан Ристовски, веројатно ќе го напушти Динамо Загреб по завршувањето на сезоната. Ристовски, еден од капитените на најтрофејниот хрватски клуб со доаѓањето на тренерот Фабио Канаваро остана без местото во стартната посатав.
Договорот на Ристовски истекува на 30 јуни 2025 година, а потоа ќе стане слободен играч доколку, се разбира, во меѓувреме не потпише нов договор со актуелниот хрватски шампион. Платата на Ристовски според сегашниот договор е околу 700.000 евра годишно.
„Индекс“ пишува дека на подготовките му бил понуден нов договор, но со значително намалување. Новиот договор би бил за најмалку една третина помал од стариот, што значи дека Ристовски би можел да заработува околу 450 илјади евра годишно.
Во овој момент одлуката на Ристовски не е потврдена, но тој најверојатно нема да потпише нов договор. Проблемот не е во парите, туку во тоа што не е задоволен од статусот што би можел да го има следната сезона на „Максимир“.
Тој има 33 години и се уште може да најде сериозна минутажа во европскиот фудбал, а источните лиги и земјите кои нудат профитабилни договори се секогаш опција за играчите кои се пред крајот на кариерата.
Ристовски одигра 177 натпревари за Динамо и одигра важна улога во освојувањето на многу трофеи, но се чини дека и клубот и тој се повеќе се свесни дека влегуваат во нова ера.