Голманска вртелешка се подготвува во финишот на летниот преоден рок. Бразилскиот голман Едерсон (31) е на прагот да се пресели во Галатасарај, што значи дека на неговото место ќе дојде Џиџи Донарума кој е пречкртан во ПСЖ: .

Едерсон се договорил со актуелниот шампион на Турција. Ќе потпише договор до 2028 година, со плата од 7.000.000 евра годишно, со бонуси, тврди италијанскиот инсајдер Николо Скира, без да наведе колкава сума Сити ќе заработи од трансферот на Бразилецот.

Со доведувањето на Едерсон, Галатасарај ќе го комплетира неверојатниот преоден рок, во кој, меѓу другите, успеаја да ги купат Виктор Осимене и Лерој Сане.

Заминувањето на долгогодишниот прв чувар на мрежата од Сити може да значи само едно, дека Донарума ќе слета на „Етихад“.

Foto/ EPA/ADAM VAUGHAN

Барселона би можела да остане без најдобриот напаѓач до крајот на преодниот рок. Имено, полскиот напаѓач Роберт Левандовски, ѕвездата на каталонскиот клуб, би можел да го напушти клубот ова лето откако добил понуда од Саудиска Арабија која вклучува неверојатни 50 милиони евра годишно.

Левандовски, кој наполни 37 години на почетокот на месецот, има договор со Барселона до крајот на следната сезона. Тој дојде во клубот во 2022 година од Баерн. И покрај своите години, Левандовски имаше извонреден настап минатата сезона, постигна 42 гола на 52 настапи за Барселона во сите натпреварувања.

Сите очекуваа тој да го предводи нападот на „блауграната“ и во новата сезона. Во јуни, Левандовски за „Билд“, изјави дека ќе остане во клубот:

„Останувам и следната сезона. Во моментов, моите мисли се насочени само кон Барселона. Нашиот тим ќе биде уште подобар следната сезона. Се чувствувам одлично физички. Моето тело е како да имам 30 години. На крајот на денот, го правам она што ми кажуваат срцето и главата.“

Сепак, сега постои одредена неизвесност околу неговата иднина во Барселона, бидејќи пристигнала понуда од Саудиска Арабија. Според информациите од шпанскиот „Ел Национал“, Левандовски добил предлог за договор за две години со износ од 100 милиони евра од неименуван клуб.

Покрај тоа, му биле понудени „дополнителни погодности“ што вклучувале бенефиции за него и неговото семејство, под услов да го потпише договорот. Спортскиот директор на Барселона, Деко, исто така го замолил Левандовски да донесе одлука што е можно поскоро, за да може клубот да реагира соодветно на пазарот во случај да биде потребно.

Foto/ EPA/ALBERTO ESTEVEZ

Фудбалскиот клуб Реал Мадрид објави дека се противи на одлуката на ла Лига, натпреварот меѓу Виљареал и Барселона, закажан за 20 декември да биде одигран во Мајами, САД.

Шпанската фудбалска федерација во понеделникот го одобри барањето натпреварот од лигата помеѓу Виљареал и Барселона да се игра на американска почва.

Федерацијата ќе побара дозвола од Европската фудбалска унија (УЕФА) и Меѓународната фудбалска федерација (ФИФА). Виљареал им вети на своите навивачи кои имаат сезонски билети за оваа сезона бесплатно патување и билети за натпреварот.

Натпреварот од 17-то коло од шпанското првенство помеѓу Виљареал и Барселона ќе се игра на 20 декември на стадионот „Хард Рок“.

Реал објави дека презел мерки за да спречи натпреварот да се одигра во Америка. Клубот тврди дека дуелот може да му наштети на интегритетот на натпреварувањето и на легитимноста на резултатите.

„Мерката, која беше донесена без претходно известување или консултација со клубовите што учествуваат во натпреварувањето, го нарушува основниот принцип на територијален реципроцитет, кој се применува по принципот еден натпревар дома, еден во гости, нарушувајќи ја конкурентската рамнотежа и давајќи им неоправдана спортска предност на клубовите, кои го поднеле барањето“, се вели во соопштението на Реал.

Реал оцени дека натпреварот во САД би поставил „неприфатлив преседан што отвора врата за исклучоци врз основа на неспортски интереси, јасно влијаејќи на спортскиот интегритет и ризикувајќи фалсификување на натпреварувањето“.

„Доколку овој предлог се спроведе, неговите последици би биле толку сериозни што би претставувале пресвртница во светот на фудбалот“, се наведува во соопштението на „кралскиот“ клуб.

Реал побара од УЕФА, ФИФА и спортските управни тела во Шпанија да не дозволат натпреварот да се одигра во САД.

Од Реал сметаат дека Барселона и покрај тоа што треба да биде гостин ќе биде во голема предност и дека тие три бода можат да влијаат на конечниот изглед на табелата. Од Мадрид напоменуваат дека како домаќин на својот стадион Виљареал е еден од најтешките противници во лигата.

Ова е само продолжение на „војната“ што Реал ја води против шпанската Ла Лига веќе една година.