Спорт
Силва објасни зошто Арсенал за Сити не е голем ривал како Ливерпул
Манчестер сити и Арсенал ремизираа 2:2, во дербито одиграно вчера во петтото коло во Премиер лигата. Сити од пораз се спаси во 98.минута со голот на со голот на Џон Стонс.
По натпреварот менаџерите Пеп Гвардиола и Микел Артета имаа примедби на судењто, додека фудбалерот на Сити, Бернардо Силва го критикуваше пристапот на Арсенал не само на овој туку и на претходните натпревари.
„Само еден клуб излезе да игра фудбал, противникот дојде да игра до границата на дозволеното и за жал тоа им го дозволи судијата. Но на крајот освоивме бод, не сме среќни бидејќи сакавме да победиме. Лично, среќен сум од начинот на кој игравме и пристапото што го имавме, мило ми е што сме тим кој на секој натпревар оди со желба за победа“, изјави Силва.
Потоа го спореди ривалството на Сити со Ливерпул во однос на Арсенал.
„Можеби тоа е затоа што Ливерпул ја освои Премиер лигата, а Арсенал не. Ливерпул исто така ја освои Лигата на шампионите, а Арсенал не. Ливерпул има ист пристап каков што имаме ние, на секој натпревар оди на победа. Од таа перспектива, нашите натпревари со Арсенал никогаш не биле како тие со Ливерпул, а не се ни сега“, потенцира Силва.
Сити е лидер на табелата со 13 бодови, Ливерпул и Астон Вила имаат по 12, а Арсенал 11.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Многу сум среќен, имав голема поддршка од тимот, изјави младиот шахист Лазов од ШК „Алкалоид“, кој се закити со сребро на Олимпијадата
Актуелниот државен првак на Македонија во шах и член на ШК Алкалоид, ИМ Тони Лазов, го постигна најголемиот успех во кариерата на Шаховската Олимпијада, која заврши во Будимпешта, освојувајќи сребрен медал за својот индивидуален настап на втората табла, со одличен рејтинг-перформанс (2763)!
Лазов игра во одлична форма последниве две години, при што претходната година на Европското екипно првенство освои велемајсторска норма, која и овојпат му беше на дофат. Со освоени извонредни 7,5 бода од 8 партии (со седум победи, од кои две извојувани на првата табла, и само со едно реми), тој се етаблираше како иден лидер на националната селекција. Воедно, на својот актуелен рејтинг од 2360 поени тој сега ќе додаде нови 33 освоени на Олимпијадата.
Откако го започна турнирот со уверливи победи против послабо рангираните селекции, во четвртото коло тој ремизираше со холандскиот велемајстор Јорден ван Форест (2696 рејтинг, триесет и петторангиран во светот), а за да влезе во игра за медал, пресудни беа победите над ВМ Јаник Пелетие (2526) од Швајцарија и над ВМ Каспер Пиорун (2599) од Полска.
„Многу сум среќен што успеав да освојам медал. Имав голема поддршка од тимот. Голема благодарност и до мојот тренер, ВМ Трајко Недев, кој ме подготвуваше за време на турнирот, и до мојот клуб ШК Алкалоид, кој секогаш ме поддржува“, изјави Тони Лазов.
Со овој успех 24-годишниот Лазов се приклучува кон „клубот на медалисти“, во кој досега беа тројца негови колеги од ШК Алкалоид: ВМ Драгољуб Јаќимовиќ има златен медал од Олимпијадата во Истанбул 2000 година на третата табла, ВМ Трајко Недев има бронза од Олимпијадата во Ереван 1996 година на четвртата табла, додека, пак, единствената дама во ова друштво е Весна Секуловска, чиј медал е освоен на Европското екипно првенство во Пловдив 2003 година, сребро на втората табла. Воедно, неговиот тренер ВМ Трајко Недев е единствениот кој има и сребрен медал од ЕП 2003 година, освоен на третата табла, и сребрен од Светското првенство за шахисти над 50 години 2023 година, на втората табла.
Тони Лазов е најмладиот носител на шаховски олимписки медал во Македонија, а кариерата ја започнува во шаховските школи на ШК Алкалоид, активно играјќи шах од својата 10-годишна возраст.
ИМ Тони Лазов беше единствениот член на ШК Алкалоид во составот на машката репрезентација на Македонија на оваа 45. Шаховска Олимпијада во Будимпешта. Тимот го стартуваше турнирот како 62-рангирана екипа, а во конечниот пласман заврши на 61. место од 188 екипи кои настапија. Репрезентативците имаа 6 победи и 5 порази и освоија 12 бода, еден повеќе од женската екипа.
Женската репрезентација беше 57-рангирана, а заврши на 77. место од 169 екипи славејќи 4 победи. Три средби завршија со поделба на поенот, а доживеа и 4 порази.
Спорт
Поранешен голман на Реал е најсериозен кандидат да го пополни местото на Тер Штеген
Капитенот на Барселона, Марк-Андре тер Штеген заработи тешка повреда на коленото поради која ќе биде надвор од терените најмалку осум месеци. Германецот се повреди синоќа, во финишот на првиот дел на натпреварот со Виљареал.
Тер Штеген го повреди коленото кое двапати го оперираше, на почетокот и на крајот од сезоната 2020/21, поради што свесно реши да го пропушти Европското првенство.
Во оовј случај не страдаа предните вкрстени лигаменти, туку пателарната тетива, поради што треба да има уште една операција и уште подолга пауза.
Среќа во несреќата е што правилата во Ла Лига им дозволуваат на клубовите да донесат замена и надвор од преодниот рок, во случај кога лекарските извештаи потврдат дека повредениот фудбалер ќе отсуствува најмалку шест месеци.
Барселона ќе може да ангажира еден од слободните голмани.
Интересно, во игра е и Кејлор Навас, чиј договор со Пари Сен Жермен истече летово. Костариканецот не сакаше да замине во Саудиска Арабија, а не доби адекватни понуди од Европа, па се уште е без клуб.
Доколку Барселона го искористи правилот на Ла Лига и ангажира нов голман тој сепак нема да има право да брани во Лигата на шампионите.
Спорт
Мота го губи трпението со Влаховиќ – Јувентус бара нова „деветка“
Ефикасноста е главниот проблем на Јувентус од почетокот на сезоната. Првиот напаѓач, Душан Влаховиќ, постигна само два гола на шест натпревари. Србинот, во саботата против Наполи, беше заменет во паузата меѓу двете полувремиња, откако за 45 минути имаше само шест допири со топката.
Како што пренесуваат италијанските медиуми, тренерот Тијаго Мота и челниците на Јувентус бараат нова „деветка“ наместо Душан Влаховиќ.
Според овие извори изборот е напаѓачот на Лил, Џонатан Дејвид.
Канаѓанецот има 24 години, а оваа сезона на 10 натпревари постигна четири гола. Неговиот договор истекува на крајот од актуелната сезона, па Лил нема ништо против да го продаде својот напаѓач за да заработи малку пари во зимскиот преоден рок.