Спорт
Србија се спаси од Португалија, изненадувања во режија на Малта и Луксембург
Избраниците на српскиот селектор Драган Стојковиќ Пикси повторно одиграа добар натпревар (пред се второто полувреме) против Португалија за поделба на пленот, 2-2 во рамките на второто квалификациско коло за пласман на Светското првенство во Катар 2022.
Диого Жота со двата гола во првото полувреме ги уништи домаќините кои, пак, во второто полувреме најпрво преку Митровиќ, а потоа и преку Костиќ стигнаа до голем бод со фаворитот.
Фаворитот во групата Е селекцијата на Белгија одигра нерешено 1-1 нагости кај десеткуваната Чешка. Иако домашниот селектор пред овој меч остана без четворица стандардни првотимци, сепак чешките репрезентативци откинаа 2 планирани бода од Белгијците.
Провод во 50 минута погоди за 1-0, а Лукаку 10 минути подоцна даде гол вреден 1 бод за својата селекција. Двете репрезентации сега се на врвот на табелата со по 4 бода од две средби.
Малта беше на прагот на голема сензација кај Словачка. Имаше предност од 2-0 (Гамбин 16 минута и Сатариано 20 минута) но словачките фудбалери во второто полувреме успеаја да стигнат до еден бод благодарение на погодоците на Стрелец и Шкрињар.
Изненадувањето на вечерта е во режија на Луксембург и нивната победа нагости кај Република Ирска. Голот за победа од 1-0 за малата држава е дело на Родригес во 85 минута.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
(Видео) Чудо во Хернинг: Раул Гонзалес со Србија ја победи Германија
Србија приреди вистинска сензација со победата над Германија 30:27 (13:17), во второто коло на Европското првенство во ракомет. Избраниците на поранешниот тренер на Вардар, Раул Гонзалес, со гранитна одбрана го шокираа големиот фаворит во второто полувреме, во кое надополнија негатива од четири гола.
Германија го диктираше темпото во првото полувреме, во кое Србија држеше приклучок благодарение на голманот Дејан Милосављев. Сепак во финишот на полувремето Германците успеаја да дојдат до голема предност.
Вториот дел, може да се каже дека е мастерклас на селекторот Гонзалес. Србите ги натераа Германците на период од шест минути без постигнат гол, поведоа со гол разлика, Германците одговорија со серија 4:1.
Вистинска драма се случуваше во финишот, а особено неверојатен беше моментот кога германскиот селектор побара тајм-аут, во моментот кога Кнор постигна гол, при водство на Србија 27:26.
— OvoOno (@OvoOnoX) January 17, 2026
Тој момент како да ги поремети Германците, Зербе промаши и седмерец, а потоа Србија мирно го заклучи натпреварот.
Којадиновиќ и Воркапиќ беа најефикасни со по шест гола, заедно со Пешмалбек (5), Додиќ (4) и Вања Илиќ (3). Се истакна и Милосављев, кој го заврши натпреварот со 12 интервенции. На другата страна, одлични беа Шлуров и Ушчинс (по 6 гола), како и Кнор (5) и Зербе (4).
Во последното коло, во оваа А група, Србија ќе игра против Австрија, а Германија ќе се соочи со Шпанија.
Спорт
Флик разочаран, голем талент ја напушта Барселона
Педро „Дро“ Фернандез, 18-годишниот талент на Барселона, наскоро ќе го напушти клубот, откако ќе биде активирана откупната клаузула во износ од шест милиони евра.
Тинејџерот, кој има понуди од неколку водечки европски клубови, го информирал тренерот Ханси Флик за својата одлука, што предизвика силна реакција од германскиот стручњак, пишува „Спорт“.
Според овој извор, Флик не ја примил добро веста. Тренерот наводно бил особено вознемирен бидејќи губи играч кого го смета за клучен за иднината на клубот, кој потекнува од Ла Масија и веќе има неколку настапи под негово водство.
Со оглед на тоа што заминувањето на Фернандез се очекува во рок од неколку дена, Флик одлучил дека играчот повеќе нема да тренира со првиот тим.
Оваа одлука е донесена со цел да се избегнат евентуални повреди, но и поради ставот дека играчот повеќе не е целосно фокусиран на работата со тимот. Реакцијата на Флик е разбирлива со оглед на довербата што ја покажа во 18-годишникот.
Тренерот го сметаше Фернандез за еден од играчите на кои им обрнуваше посебно внимание, а веста за неговото заминување длабоко го погоди. Неговото разочарување беше толку големо што наводно им кажал на луѓето од неговиот близок круг дека годоживеал „најголемото разочарување во својот живот“.
Инаку „Спорт“, тврди дека Дро кариерата ќе ја продолжи во редовите на актуелниот европски првак, ПСЖ.
Спорт
Нигерија „бронзена“ на Африканскиот куп
Нигерија го освои третото место на Купот на Африканските нации. Во „малото финале“, Нигерија победи по изведувањето пенали со 4:2, откако по 90 минути игра немаше голови. Според правилата, во натпреварот за третото место не се играат продолженија, туку веднаш се изведуваат пенали.
Во првата серија, нигерискиот голман Стенли Нвабали се прослави. Нвабали е 29-годишниот голман кој игра за јужноафриканскиот Чипа Јунајтед.
Тој го одбрани ударот на Мохамед Салах, а потоа блесна и во втората серија, кога беше поуспешен и од Омар Мармуш.
Адемола Лукман го погоди решавачкиот пенал.
Утре домаќините Мароко и Сенегал ќе се борат за титулата.
Foto/ EPA

