Спорт
Тим со два тај-брејка го реши Надал, на чекор е до полуфиналето во Лондон
Австрискиот тенисер Доминик Тим малку изненадувачки славеше победа од 2-0 против вториот светски тенисер во моментот, Рафаел Надал, на завршниот мастерс-турнир, што се игра во Лондон.
Предмалку, во меч што траеше два и пол часа и кој Тим го доби со 7-6 и 7-6 во два тај-брејка, љубителите на белиот спорт во меч од групата „Лондон 2020“ можеа да уживаат во одлична партија, која сепак му припадна на помладиот тенисер, кој го искористи падот на концентрацијата на фаворитот.
Со овој пораз Надал се оддалечи од полуфиналето и можноста да го освои трофејот што никогаш досега не го донел во своите витрини.
Тим, по голема борба, го освои првиот сет со 9-7 во тај-брејкот откако до 6-6 немаше одземања гем на сервис на противникот.
Во вториот сет беше израмнето до 3-3 и тогаш Надал му зеде сервис на Тим и поведе со 4-3. Сепак, предноста ја загуби веќе во наредниот гем, па повторно мораше сè да се решава во тај-брејк. Тим повторно беше поуспешен и со 7-4 стигна до победа во овој дуел.
И Шпанецот и Австриецот славеа во мечевите од првото коло, Надал беше подобар од Рублев, а Тим од Циципас.
Доколку вечерва, во мечот што почнува од 21 часот, Циципас слави во дуелот со Рублев, на тој начин Тим веќе ќе се промовира во полуфиналист, а Надал во дуелот со грчкиот тенисер би одлучувал за вториот полуфиналист од оваа група.
Иако Тим славеше во овој дуел, поенот на мечот е за Надал:
Ridiculous on the run ?@RafaelNadal #NittoATPFinals pic.twitter.com/eBxeFQUYKk
— Tennis TV (@TennisTV) November 17, 2020
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Првиот спринт во сезоната за Ферстапен, Хамилтон втор
Возачот на Ред Бул, Макс Ферстапен, триумфираше на првата спринт трка во сезоната, која се возеше како дел од Големата награда на Кина, петта трка од овогодинешниот шампионат во Формула 1.
Трикратниот светски шампион славеше со повеќе од 13 секунди предност пред Луис Хамилтон од Мерцедес, додека на третото скалило на подиумот се најде вториот возач на Ред Бул, Серхио Перез.
Од пол-позицијата стартуваше Ландо Норис во Мекларен, кој веднаш беше предизвикан од агресивниот Хамилтон, кој не му даде простор да остане во водство. И додека седумкратниот светски шампион го презеде водството, помладиот од двајцата Британци отиде широко и падна на седмото место, додека Хамилтон го следеа Алонсо и Ферстапен.
Бранителот на титулата најпрвин го стигна, а потоа во седмиот круг и го престигна Шпанецот, а два круга подоцна го презеде водството, откако Хамилтон практично не се бранеше, а потоа лесно се одлепи.
Возачот на Мерцедес исто така немаше конкуренција во борбата за второто место, но зад него се одвиваше голема борба за третата позиција. Алонсо најпрво беше предизвикан од Карлос Саинц Јуниор, но возачот на Астон Мартин се бранеше агресивно, што го искористи Перез и ги претекна двајцата.
Во еден момент дојде и до контакт меѓу двајцата Шпанци, поради што Алонсо мораше да се повлече од трката, а потоа дојде до борба меѓу Саинц и неговиот тимски колега Шарл Леклер.
На тој дуел имаше доста искри, а Леклер успеа да се снајде подобро и да стигне до четвртото место со две секунди зад Перез. Саинц беше три секунди поназад, пред Норис и Оскар Пјастри и Џорџ Расел во вториот Мерцедес, кој го освои последниот поен.
Во генералниот поредок сега води Ферстапен со 85 бодови, 15 повеќе од Перез, додека Леклер е трет со 64.
Спорт
Драконска казна во Холандија – клуб исфрлен од првата лига
На фудбалскиот клуб Витезе му беа одземени 18 бодови, по што и официјално испадна од првата холандска лига, соопшти Фудбалскиот сојуз на Холандија (КНВБ).
„Независниот комитет за лиценцирање на КНВБ му изрече санкција на Витезе од минус 18 бодови. Клубот од Арнем ја доби оваа казна затоа што повеќепати не ги исполнуваше барањата од прописите за лиценцирање играчи во подолг временски период“, се вели во соопштението на КНВБ.
Витезе сега има минус еден бод и автоматски го загуби прволигашкиот статус на четири кола пред крајот на првенството.
Најголемиот успех во историјата клубот од Арнем го постигна во сезоната 2016/17 кога го освои Купот на Холандија.
Последен пат Витезе играше во Европа во сезоната 2021/22, кога беа елиминирани од подоцнежниот освојувач Рома во осминафиналето на Конференциската лига.
Спорт
Бакс без Јанис во првото коло од плеј-офот
Милвоки Бакс се соочува со значителен проблем пред почетокот на плеј-оф серијата во која ривал ќе им биде Индијана Пејсерс. Бакс нема да може да смета на Јанис Адетокумбo.
Како што пренесе Шамс Чаранија, Адетокумбо ќе мора да паузира од две до четири недели поради повредата на потколеницата со која се здоби на натпреварот против Бостон Селтикс.
Овие првични проценки за повреди секако значат дека Адетокумбо сигурно ќе го пропушти првото коло од плеј-офот и натпреварите со Индијана.
Плеј-офот за Бакс започнува ноќта помеѓу недела и понеделник, а тие се домаќини во првиот натпревар.