Спорт
Улм игра натпревари на три континенти во пет дена
Кошаркарите на Портланд синоќа одиграа контролен натпревар со германски Улм и победија со 111:100.
Улм, учесник во Еврокупот веднаш по завршувањето на натпреварот со првиот лет се враќа во Германија, бидејќи во сабота од 18 часот и 30 минути ќе гостуваат во Олденбург во Бундеслигата, а оттаму ќе се упатат кон Западна Сахара, поточно кон Канарските Острови, каде во вторник ќе одиграат натпревар од Еврокупот со Гран Канарија.
Улм во рок од пет дена ќе игра на три континенти – Северна Америка, Европа и Африка.
Треба да се додаде дека оваа светска турнеја кошаркарите на Улм ја започнаа од Истанбул, каде во понеделникот вечерта одиграа натпревар од Еврокупот со Бешикташ и доживеаја убедлив пораз од 107:74.
Во Орегон германскиот тим го подобри впечатокот и го „положи оружјето“ во последната четвртина пред фаворизираниот домашен тим, член на најсилната кошаркарска лига во светот.
Портланд до полувремето акумулираше 15 поени предност, а во вториот дел имаше 20, но подоцна стигна одговорот и гостите се доближија на негатива од шест поени. Сепак, тоа беше најблиску што Улм успеа да се доближи до тимот на Чонси Билапс.
Домашниот тим, важно е да се истакне, одигра без неколку напаѓачки адути. Тимот беше без Шејдон Шарп, Роберт Вилијамс Трети, Анферни Симонс, Џереми Грант, Џабари Вокер и Матис Тајбул.
Најефикасен кај победниците беше Дени Авдија со 18 поени, додека Деандре Ајтон постигна 13.
DENIED BY DC™️ pic.twitter.com/JQpnlVNlTP
— Portland Trail Blazers (@trailblazers) October 17, 2024
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Јувентус покажува интерес за Анте Будимир
Будимир со своите карактеристики е идеален за идеите на Тиаго Мота. Хрватскиот репрезентативец е легенда на Осасуна каде пристигна во октомври 2020 година.
За четири години Будимир постигна 51 гол на 146 натпревари, а оваа сезона има четири гола на девет натпревари. Будимир веќе има искуство во Италија. Кариерата ја започна во Радник од Велика Горица, а во помладите селекции настапуваше за австрискиот ЛАСК.
Беше член на Кротоне (83 настапи, 27 гола, шест асистенции) и Сампдорија (14 натпревари, 1 гол). Во кариерата настапуваше и за Интер од Запрешиќ, Мајорка, Локомотив и Ст. Паули.
За хрватската репрезентација одиграл 27 натпревари и постигнал три гола, а според „Трансфермаркт“ вреди пет милиони евра.
Неговиот договор со Осасуна е до летото 2027 година.
Спорт
Гласнер ќе добие отказ, Мојс ќе го преземе Кристал Палас
Кристал Палас не ја започна според планираното, а тоа може да резултира со смена на менаџерот Оливер Гласнер. Потенцијалната замена е веќе подготвена.
По седум натпревари во Премиер лигата оваа сезона, Палас освои само три бода и се наоѓа во зоната за испаѓање.
Гласнер го презеде тимот минатата сезона и го оживеа. Се очекуваше дека тимот ќе продолжи да расте, но дојде до пад поради што Гласнер може да остане без работа
Замена за актуелниот тренер би можел да биде Дејвид Мојс. Во минатото искусниот стручњак можеше да ги „извлече“ екипите од опасната зона, а во таква ситуација сега е и Палас.
Мојс остави најголем белег како тренер на Евертон. Тој помина 11 години на „Гудисон Парк“. Потоа имаше неславна епизода во Манчестер јунајтед и Реал Сосиедад, една година беше тренер на Сандерленд, а потоа се пресели во Вест Хем.
Мојс беше таму во два мандати. Прво успеа да обезбеди опстанок со „чеканите“, а во вториот мандат ги одведе до трофејот во Конференциската лига и до полуфиналето на Лига Европа.
Спорт
Фудбалерите против расистите: Покажете „Х“ со рацете и натпреварот ќе биде прекинат
ФИФА одлучи да ја продолжи борбата против расизмот во фудбалот, воведувајќи построги мерки за казнување на секоја расна дискриминација. Натпреварот ќе биде прекинат доколку судијата забележи расистички навреди од играчите или ако му се пожалат. Исто така, можно е натпреварите да завршат пред крајот поради расизам.
Во иднина, судиите ќе ја прекинат играта веднаш кога ќе забележат расистички извици или гестови од трибините, но и ако играчите се пожалат .
Новото правило усвоено на 74. Конгрес на ФИФА во Бангкок предвидува дека натпреварот ќе биде трајно прекинат доколку судијата и делегатот проценат дека тоа е неприфатлива форма на говор на омраза, расна или каква било друга дискриминација.
ФИФА одлучи да преземе колективна одговорност за глобалната позиција против расизмот во фудбалот. ФИФА, во соработка со сите национални асоцијации, ќе активира програми и акции во секоја од петте области на дејствување кои ја поддржуваат глобалната позиција против расизмот: правила и санкции, акција на теренот, кривични пријави, едукација и гласот на играчите.
На Конгресот на ФИФА беше воспоставен гест со кој играчите можат да испратат јасна порака до судијата дека доживеале расни навреди. Станува збор за вкрстени раце во „Х“.
Во пракса, постапката треба да изгледа вака:
Прв чекор
Судијата ја прекинува играта: Ако сте доживеале навреди на расна основа, користете го „антирасистички гест“ (прекрстени раце во „Х“) тогаш судијата автоматски ќе ја прекине играта;
Втор чекор
Судијата ги испраќа тимовите во соблекувалната: Доколку навредите продолжат по предупредувањето и играта продолжи, судијата го прекинува натпреварот по втор пат и ги испраќа тимовите во соблекувалната.
Трет чекор
Судијата го прекинува натпреварот: Доколку навредите се повторат за време на паузата или по продолжувањето на натпреварот, натпреварот ќе биде трајно е прекинат и ќе се решава на „зелена маса“.
Овој јасно дефиниран протокол дефинитивно ќе помогне во борбата против расизмот на фудбалските терени, но сепак е пораз што сето тоа треба да се направи во 21 век.