Извршниот директор на Формула 1 Стефано Доменикали разговараше со премиерката на Тајланд, Пенгтогтан Шинаватра за плановите за организирање трка на улиците на Бангкок.

Премиерката рече дека Владата ќе нарача физибилити студија за можноста трката да се одржи во главниот град од 2028 година, објави Би-Би-Си.

„Верувам дека сите жители на Тајланд ќе имаат корист од организирањето на овој настан, без разлика дали тоа е преку големи инфраструктурни инвестиции, отворање нови работни места, генерирање нови приходи и увоз на нови технологии и иновации“, рече Шинаватра.

Доменикали рече дека плановите биле „импресивни“.

Во северозападниот дел на Тајланд, во Бурирам, постои патека која е акредитирана од Меѓународната автомобилска федерација (ФИА). На оваа патека се возат трки во Мото Гп шампионатот.

Оваа сезона, шампионатот во Формула 1 ќе има 24 трки, вклучувајќи четири во азиско-пацифичкиот регион.

Сезоната започна минатиот викенд со трка во Мелбурн.

Кошаркарот на Сан Антонио, Сандро Мамукелашвили ја одбележа изминатата ноќ во НБА лигата.

Крилниот центар на Спарс стана првиот играч во историјата на НБА кој постигнал 34 поени за помалку од 20 минути.

На Грузиецот, роден пред 25 години во Њујорк, му беа потребни само 19 минути игра за да го „наполни“ кошот на Њујорк во победата 120:105.

Само еднаш не погоди од поле, погоди 13 од 14 удари, постигна седум тројки од исто толку обиди.

Ноќта на кариерата ја најави во првото полувреме, кога за само осум минути постигна 13 поени, забележа седум скока и асистенција. Во второто полувреме неговиот шут функционираше перфектно, продолжи без грешка да го полни кошот на Њујорк и да пише историја, постигна 21 поен во последната четвртина.

„МВП, МВП“, ечеше во салата.

Самиот беше зачуден. Тој едвај ги најде вистинските зборови за да го опише она што му се случи.

„Не знам што се случи, не знам што се случи“, со неверување повторуваше Мамукелашвили додека ги даваше првите изјави.

До натпреварот против Њујорк, неговиот сезонски рекорд беше 13 поени, кои ги постигна неодамна против Шарлот.

Каков подвиг е ова, можеби најдобро се илустрира со фактот дека историскиот натпревар го одигра играч чиј претходниот просек беше пет поени и 8,9 минути по натпревар.

Напаѓачот на Аргентина, Лаутаро Мартинез ќе ги пропушти претстојните квалификации за Светското првенство против Уругвај и Бразил поради повреда на тетивата, објави во средата аргентинската федерација.

Мартинез од Интер остана на клупата на реваншот од осминафиналето на Лигата на шампионите против Феенорд минатата недела поради болки во мускулите.

27-годишниот фудбалер играше потоа во дербито против Аталната и постигна гол во победата 2.0 во Бергамо.

Мартинез е уште еден играч на кого Лионел Скалони нема да може да смета за овие натпревари. Претходно поради повреди отпаднаа Лионел Меси, Гонзало Монтиел, Џовани Ло Селсо и Пауло Дибала.

Аргентина е лидер во квалификацискиот поредок на КОНМЕБОЛ со 25 бода по 12 натпревари. Светскиот шампион и шампион на Копа Америка во петок ќе играат со второпласираниот Уругвај, а четири дена подцна ќе му гостуваат на петтопласираниот Бразил.