Спорт
Вардар против Барса во полу-финалето

Ракометарите на Вардар кои ја воодушевија европската јавност со своите настапи сезонава во Лигата на шампионите го дознаа ривалот против кого ќе играат во полу-финалето на завршниот турнир во Келн.
Вардар за противник во полу-финалето ќе игра против најголемиот фаворит Барселона. Каталонскиот гигант е единствениот тим кој успеал два пати да го победи Вардар оваа сезона (26:30, 26:34).
Полу-финални двојки:
Барселона-Вардар
Веспрем-Кјелце
Завршниот турнир во Келн ќе биде првиот на кој нема да има екипи од Германија и Франција, прв на кој тимовите учесници ги предводат шпански тренери (Парондо, Душебаев, Дејвис, Пасквал).
Интересен е и податокот дека екипите што учествуваат на завршниот турнир се натпреваруваа во А-групата во Лигата на шампионите. На крајот од фазата по групи Барселона со 24 бода го освои првото место, Веспрем беа втори со 20, Вардар освои 19 бода, а Кјлеце 14.
Барселона е најтрофејниот тим во Лигата на шампионите со девет титули. Каталонците последен пат биле европски шампиони во 2015 година. Кјелце и Вардар имаат по еден трофеј, Полјаците победија во 2016, а Вардар во 2017 година.
Веспрем е единствениот тим во оваа конкуренција без европска титула. Унгарците имаат два порази во финалните натпревари, во 2015 од Барселона и во 2016 од Кјелце.
Завршниот турнир ќе се одигра на 1 и 2 јуни.
foto/epa
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Гвардиола на трансфери потрошил две милијарди евра на трансфери

Манчестер сити го потврди враќањето на голманот Џејмс Трафорд, кој пристигна од Барнли во трансфер што претставува британски рекорд за играч на таа позиција. Овој 22-годишник се враќа на „Етихад“, стадионот каде што ја започна кариерата, во трансфер вреден 36 милиони евра. Сумата на крајот би можела да биде поголема бидејќи зависи и од бонусите.
Гвардиола достигна еден вид рекорд со овој трансфер на „граѓаните“, бидејќи стана првиот тренер во историјата на фудбалот кој потрошил повеќе од две милијарди евра за засилувања во текот на својата кариера.
Голманот Трафорд е 96-ти играч за кого Шпанецот платил отштета во својата тренерска кариера.
Најблиску до Гвардиола по пари потрошени за трансфери е, верувале или не, Диего Симеоне со 1,31 милијарди евра потрошени за засилувања во Атлетико Мадрид.
По нив следува Масимилијано Алегри, кој потрошил 1,2 милијарди за трансфери во Милан и Јувентус, пред сè, иако ги предводеше и Каљари, Сасуоло, Гросето, Спал и Аљанезе, потоа Томас Тухел со 1,19 милијарди (Мајнц, Борусија Дортмунд, ПСЖ, Челзи, Баерн) и Антонио Конте со 1,16 милијарди (Бари, Аталанта, Сиена, Јувентус, Челзи, Интер, Тотенхем, Наполи).
Foto/ EPA
Спорт
Анте Ребиќ ќе потпише за Хајдук

Поранешниот хрватски репрезентативец, Анте Ребиќ, постигна договор со Хајдук.
Долго траеја преговорите меѓу двете страни. Минатата недела медиумите во Хрватска објавија дека трансферот нема да биде реализиран од финансиски причини. Хајдук нудел 350.000 и одредени бонуси како годишна плата, а Ребиќ барал двојно повеќе.
На крајот, Ребиќ реши да ја прифати последната понуда што му ја упати Хајдук, па во новата сезона ќе ги брани боите на тимот од Сплит.
Освојувачот на второто место на Светското првенство со Хрватска ќе игра за Хајдук за прв пат во својата кариера.
Ребиќ е роден во Сплит, но никогаш немал можност да го носи дресот на тимот од „Пољуд“. Во помладите категории, како и на почетокот на својата професионална кариера, бил член на фудбалскиот клуб Сплит.
Во Хајдук ќе заработува 450.000 евра годишно, со можност таа бројка да се зголеми преку бонуси.
Foto/ EPA
Спорт
Ако добие „понуда што не се одбива“, Барселона ќе го продаде Левандовски

Роберт Левандовски, најдобриот стрелец на Барселона е тема во денешните изданија на каталонските медиуми.
„Мундо Депортиво“, откри дека клубовите од Саудиска Арабија внимателно ја следат ситуацијата во Барселона и дека не е невозможно да се одлучат за Полјакот во овој преоден рок.
Причините се јасни, Барселона се уште има финансиски проблеми поради што не може да регистрира играчи, што значи дека Каталонците мора да продадат еден од своите играчи.
Марк-Андре тер Штеген одби трансфер, потоа повторно се повреди и заврши на операција и ќе отсуствува меѓу три и пет месеци. Андреас Кристенсен исто така одлучи да остане до следното лето, па Барса сега нема многу опции.
Во клубот се задоволни од Левандовски, несе размислува за негова продажба, но профитабилна понуда од Саудиска Арабија би можела да ги натера челниците да се предомислат.
Полјакот има 36 години, има договор до следното лето, а во исто време, неговите приходи ќе се зголемат во последната сезона. Тој е фудбалерот со најголема плата во Барселона.
Ова се сите причини зошто Барселона нема да остане имуна на профитабилна понуда од Саудиска Арабија.
„Мундо Депортиво“ не именува ниту еден арапски клуб конкретно, но не е тајна дека Ал Хилал бара замена за Александар Митровиќ, кој не е во плановите на Симоне Инзаги.
Во случај Левандовски да прифати огромна сума од Арапите, Ханси Флик ќе смета на Феран Торес и Маркус Рашфорд во шпицот на нападот.
Да ве потсетиме, Барса го донесе Левандовски во летото 2022 година од Баерн Минхен за 45.000.000 евра + 5.000.000 преку бонуси. Полјакот ја оправда инвестицијата, бидејќи помогна да се освојат две титули во Ла Лига, Купот на Кралот, два Суперкупа на Шпанија.
Фото/ Принскрин