Спорт
„Вечниот“ Надал против „лудиот“ Медведев во финалето на Флешинг Медоуз

Рафаел Надал ќе игра за својата 19-та гренд слем титула во недела на САД опен против талентираниот Русин Данил Медведев, откако двајцата релативно лесно победија во своите полуфиналиња на Флешинг Медоуз.
Надал го надмина „фрустрирачкиот“ прв сет за со 7:6(6)/6:4/6:1 да го победи Италијанецот Матео Беретини за по петти пат да игра во финалето во Њујорк. Шпанецот пропушти неколку брејк-топки во првиот сет, по што губеше со 4:0 во тај-брејкот, пред да го сврти мечот, да спаси две сет-топки и да доминира до крајот.
„Првиот сет беше навистина фрустрирачки бидејќи имав многу шанси пред тај-брејкот, по што имав среќа што не го освои сетот. Откако го преживеав тој момент, мечот целосно се смени и почнав да играм посмирено“, вели Надал.
Во финалето, Надал ќе игра со петтиот носител, Русинот Данил Медведев, кој до своето прво гренд слем финале стигна со 7:6(5)/6:4/6:3 победа над бугарскиот ас Григор Димитров.
„Конечно, тука сум по три сета. Пресреќен сум што ќе играм финале“, изјави Медведев, кој има фантастично лето и ова му е четврто финале во низа.
33-годишниот Надал ако победи во недела ќе се доближи на само една гренд слем титула од рекордот на Роџер Федерер. Тој го победи Медведев во финалето во Монтреал во нивниот единствен досегашен меѓусебен меч, а потоа не играше во Синсинати, каде што Медведев ја освои титулата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Интер без Павар против Барселона

Фудбалерот на Интер, Бенжаман Павард, ќе го пропушти првиот полуфинален натпревар од Лигата на шампионите против Барселона поради повреда на левиот глужд, објавија италијанските медиуми.
Павар се повреди во неделата за време на првенствениот натпревар против Рома (0:1) и нема да патува за Шпанија, објавија „Газета дело Спорт“ и „Скај Италија“.
Францускиот фудбалер се повреди при дуел со противнички играч. Откако доби помош, тој се обиде да ја продолжи играта, но набрзо мораше да го напушти теренот.
Италијанските медиуми објавија дека Маркус Тирам, кој ги пропушти последните три натпревари поради повреда на мускулот, би можел да се врати во тимот на Интер.
Во последните осум дена, Интер претрпе три порази, во првенството против Болоња (0:1) и Рома (0:1) и во реваншот од полуфиналето на Купот против Милан (0:3).
До минатата недела, Интер беше во трка за тројната круна, но по елиминацијата од Купот, тоа веќе не е можно.
Тимот се бори за два трофеи, во Лигата на шампионите и во Серија А, во која, по два последователни порази, падна на второто место на табелата со 71 бод, три помалку од водечкиот Наполи.
Првиот полуфинален натпревар од Лигата на шампионите помеѓу Интер и Барселона ќе се игра во вторник од 21:00 часот во Шпанија.
Во второто полуфинале, во вторник во Лондон, Арсенал го пречекува Пари Сен Жермен во 21:00 часот.
Спорт
Сака ќе го продолжи договорот со Арсенал

Букајо Сака ќе ја продолжи соработката со Арсенал во следните неколку дена.
Најголемата ѕвезда на тимот од Лондон се согласи да потпише нов договор со тимот за кој игра практично целиот свој живот.
Се очекува веста наскоро да биде официјализирана, како и финансиските детали и време траењето на новиот договор.
Сака е во Арсенал од 2008 година, а потпиша професионален договор во 2018 година. Досега има одиграно 257 натпревари за „топџиите“.
Оваа сезона, тој има можност да го одведе Арсенал до финалето на Лигата на шампионите за прв пат од 2006 година.
Спорт
Реал подготвува церемонија за збогување и нова улога за Анчелоти

Најтрофејниот тренер на Реал Мадрид во неговата историја, Карло Анчелоти, ќе ја напушти позицијата ова лето, а „кралскиот клуб“ одлучи достоинствено да се збогува.
Анчелоти ќе го напушти клубот една година пред истекот на договорот, а раководството на клубот одлучи да му ги исплати сите плати што му следуваат според договорот, без оглед на тоа што нема да работи.
Во исто време, тој потоа ќе стане почесен амбасадор на клубот, иако најверојатно ќе стане селектор на бразилската фудбалска репрезентација.
Претседателот на Реал Мадрид, Флорентино Перез, сака да се раздели со Анчелоти на најубав можен начин, без никаква дамка, како што беше случајот претходно при разделбата на некои клупски легенди.
Перез планира да му приреди на италијанскиот тренер посебна церемонија за време на последниот натпревар од сезоната против Реал Сосиедад, кога треба да му биде одадено признание за сите трофеи што ги освоил и неговиот придонес за клубот.