Спорт
(Видео) Арсенал го доби Тотенхем во градското дерби

Фудбалерите на Арсенал успешно ја продолжуваат трката за титулата во Премиер лигата. „Топџиите“, гостуваа кај најголемиот ривал Тотенхем и славеа драматична победа во дербито на северен Лондон.
Натпреварот на стадионот на Тотенхем заврши со резултат 2:3 (0:3).
Арсенал со оваа победа ја зголеми предноста на врвот на табелата на четири бода од второпласираниот Манчестер Сити, но шампионот на Англија има два натпревари помалку.
Се чинеше дека се е решено во дербито на северен Лондон по нешто повеќе од половина час игра кога гостите дојдоа до предност од три гола.
„Топчиите“ поведоа само една минута откако голот на Хаверц беше поништен поради офсајд. Се играше во 15. минута, корнерот го изведе Букајо Сака, а Данецот Пјер Емил Хајберг си постигна автогол.
Тотенхем одговори многу брзо, во 21. минута Ромеро најпрвин ја погоди стативата, а само минута подоцна Мики Ван де Вен ја затресе мрежата на Арсенал, но ВАР утврди дека младиот Холанѓанец бил во офсајд на почетокот на акцијата.
Домашните продолжија да напаѓаат, во 27. минута имаше гужва во шеснаесетникот на гостите, во првиот момент се чинеше дека Тотенхем може да добие пенал (Кулушевски падна), но Арсенал изведе брза контра која ја заврши Букајо Сака.
Само десет минути подоцна веќе беше 0:3. Деклан Рајс изведе уште еден корнер, овој пат од левата страна, а Каи Хаверц беше најснаодливиот играч во шеснаесетникот на Тотенхем.
Второто полувреме започна со отворена игра и шанси на двете страни, а домашните на крајот постигнаа гол во 64. минута по големата грешка на голманот на Арсенал, Давид Раја. Шпанецот буквално му ја подари повратната топка на Габриел на Кристијан Ромеро, а Аргентинецот без мака ја затресе мрежата на гостите.
Во 87. минута беше досуден пенал за Тотенхем, по фаулот на Деклан Рајс врз Бен Дејвис. Сон Хеунг-Мин ја зеде топката и буквално ја заби во мрежата.
Тотенхем се обиде да стигне до сензационално реми, но резултатот повеќе не се менуваше.
Тотенхем со овој пораз ги намали шансите во борбата за место кое води во Лигата на шампионите. Моментално се петти во поредокот со дури седум бода помалку од Астон Вила, иако имаат одиграно два натпревари помалку.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
(Видео) ПСЖ се спаси од пораз против Стразбур

Фудбалерите Пари Сен Жермен и Стразбур ремизираа 3:3 во дербито на осмото коло од Лига 1.
Луд натпревар беше виден на „Паркот на принцовите“. Домаќинот трган фуриозно, а на крајот мораше да се бори за еден бод.
Сè започна со голот на Баркола во шестата минута, но гостите до полувремето направија пресврт, со головите на Паничели во 26-та и Мореира во 41-та минута.
Паничели дополнително ги загрижи „Светците“ во 49-та минута, а Рамос го врати ПСЖ во игра од пенал во 58-та минута.
Мајулу спаси бод за ПСЖ во 79-та минута.
И на овој натпревар Луис Енрике не можеше да смета на важни играчи – Дембеле, Маркињос, Невеш, Руиз, додека Кварацхеликја, Мендеш и Витиња започнаа од клупата.
ПСЖ го запиша второто последователно реми, и е на чело со 17 бода, еден повеќе од Стразбур.
Спорт
Мареска потврди дека Палмер ќе паузира уште шест недели

Фудбалерот на Челзи, Кол Палмер (23), нема да може да им се придружи на соиграчите уште шест недели поради повреда на препоните, објави тренерот Енцо Мареска.
Палмер не играл од поразот на Челзи од Манчестер Јунајтед на 20 септември.
Тој го напушти теренот во првото полувреме, а Мареска потоа објави дека ќе го одмори до октомвриската репрезентативна пауза, која сега е завршена.
„Згрешив. За жал, тој ќе биде надвор од терените веројатно шест недели“, рече Мареска, исклучувајќи ја можноста за операција.
„Се обидуваме да го заштитиме Кол колку што е можно повеќе и најважно е тој да биде целосно закрепнат кога ќе се врати“, додаде италијанскиот стручњак.
Челзи, кој моментално е седми на табелата во Премиер лигата, во сабота гостува кај Нотингем Форест, кој е 17-ти на табелата.
Спорт
Флик негира дека претседателот на клубот му се меша во работата

Ханси Флик, на прес конференцијата, пред натпреварот со Џирона, бурно реагираше на прашањето дека претседателот на Барселона барал Ламин Јамал да игра против ПСЖ во Лигата на шампионите.
Шпанските медиуми со денови шпекулираат за наводниот конфликт во врвот на каталонскиот клуб, според кој претседателот Џоан Лапорта наводно му наредил на Ханси Флик да го вклучи Ламин Јамал во почетниот состав за натпреварот против ПСЖ, иако 18-годишникот, според изворите, доцнел на задолжителниот состанок на тимот пред дуелот.
„Би сакал да знам од каде доаѓаат тие глупости. Никој во клубот никогаш не ме замолил да направам нешто слично. Тие ми веруваат целосно. Немам што да кријам, познато е дека во Барселона тренерскиот штаб носи спортски одлуки“, рече Флик.
Тој нагласи дека Ламин Јамал не бил казнет и дека неговото место во почетниот состав против ПСЖ е спортска одлука, а не резултат на каков било притисок од раководството.
Да потсетиме дека шпанските таблоиди претходно објавија дека Флик прво планирал да го казни младиот напаѓач затоа што доцнел и дека му рекол дека нема да биде во првиот состав. Сепак, според овие шпекулации, раководството на клубот наводно инсистирало Јамал да го започне натпреварот.
Инаку, Барселона во второто коло загуби од ПСЖ со 1:2.