Спорт
(Видео) Давид Силва замина во пензија
Познатиот шпански фудбалер Давид Силва (37) денеска соопшти дека, поради тешката повреда на коленото, става крај на професионалната кариера.
Сигурно е дека Силва вака не го замислуваше своето збогување со фудбалот, но играчот кој ќе остане запаметен како еден од најкреативните играчи од средниот ред во Европа во последните 15 години нема за што да жали.
Давид Силва се повреди неодамна на тренингот на неговиот клуб Реал Сосиедад. Тој ги скина вкрстените лигаменти на коленото.
„Денес е тажен ден за мене. Денес е денот кога треба да се збогувам со она на што го посветив целиот мој живот. Денес е време да се збогувам со моите соиграчи кои ми беа како семејство. Ќе ми недостигате сите многу. Ви благодарам на сите бидејќи со вас се чувствував како дома“, рече Силва во емотивното видео, на неговото збогување со фудбалот.
Muchas gracias…fútbol pic.twitter.com/HoB6TPojAd
— David Silva (@21LVA) July 27, 2023
Ќе остане запаметен како член на најславната ера на шпанскиот национален фудбал, еден од неговите најзначајни адути на патот кон светскиот и европскиот трон.
Двапати со „Црвената фурија“ беше европски првак и еднаш победник на Светското првенство.
Во кариерата одигра 784 натпревари, постигна 124 гола и даде 154 асистенции, настапувајќи за Еибар, Селта, Валенсија, Манчестер сити и Реал Сосиедад.
На клупско ниво, неговите трофеи вклучуваат четири Премиер лиги, два Копа дел Реј, пет ФА Купа, два ФА Купа и три Комјунити Шилд.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Синер му предаде на Алкараз, Шпанецот го освои Синсинати

Шпанецот Карлос Алкараз ја освои титулата на Мастерсот во Синсинати.
Во финалето, Алкараз славеше по само дваесет минути игра против најдобриот тенисер во светот и бранител на титулата Јаник Синер.
Синер го предаде натпреварот при водство на Алкараз 5:0 во првиот сет. Се уште не е познато за каква повреда станува збор.
Италијанецот се држеше во неколку наврати во пределот на стомакот, па може да станува збор и за вирус. Како и да е, тој донесе одлука дека е подобро да се предаде и да не го загрози својот настап на Отвореното првенство на САД.
Што се однесува до самиот натпревар, тие дваесетина минути минаа во целосна доминација на Алкараз.
За краток период, тој направи дури три брејка против противник кој, во најголем дел, само статираше на теренот.
Пред последниот гем во првиот сет, во кој Алкараз требаше да сервира, Синер седна на клупата и му рече на судијата Мохамед Лајани дека му е жал за навивачите, но дека не може да продолжи.
Тој исто така нагласи дека морал да се обиде, што имплицира дека здравствените проблеми се појавиле пред почетокот на мечот.
Foto/ X
Спорт
Интер сака да го врати Онана

Интер наводно повторно ја следи ситуацијата со својот поранешен голман Андреа Онана откако Манчестер јунајтед го изостави од составот за отворањето на сезоната во Премиер лигата.
Според „Сан“, италијанскиот клуб внимателно го следи неговиот статус бидејќи има сè повеќе шпекулации за иднината на Камерунецот на „Олд Трафорд“. Се додава дека Интер е заинтересиран за враќање на 29-годишникот, кој замина во Јунајтед во 2023 година.
Од неговото доаѓање, тој не ја оправда отштетата од 56 милиони евра, а со оглед на тоа што тренерот на Интер бара нов голман, додека Јан Сомер во моментов е прв избор, враќањето би можело да стане реална опција.
Фото/ Принтскрин
Спорт
Лукаку ќе го пропушти првиот дел од сезоната

Тежок удар за Наполи пред почетокот на сезоната во Серија А во која ја бранат титулата. Ромелу Лукаку се повреди и го очекува подолга пауза.
Напаѓачот кој минатата сезона забележа дабл-дабл учинок од 14 гола и 11 асистенции го повреди квадрицепсниот мускул и ќе му биде потребна операција. Се очекува да отсуствува четири до пет месеци.
Огромен проблем за Конте и Наполи. Бидејќи сега Наполи како класичен напаѓач го има само Лоренцо Лука засилувањето од Удинезе.
Затоа е јасно дека Наполи ќе мора да се активира на пазарот. Според првите информации, целта е Расмус Хајлунд од Манчестер јунајтед. Идејата на Наполи е да го доведе на позајмица.
Сепак, Наполи не е единствениот што е заинтересиран за Данецот. Милан е во игра веќе некое време и преговара со „црвените ѓаволи“ и го сака Хојлунд во случај да не постигнат договор со Душан Влаховиќ. Како што стојат работите, Хојлунд е на добар пат да се врати во Серија А.