Спорт
(Видео) Невиден дебакл на Голден Стејт во Бостон

Кошаркарите на Голден Стејт Вориорс доживеаја еден од најтешките порази во историјата на франшизата, загубија во Бостон со 140:88. Бостон на овој натпревар постигнаа 25 тројки со што го изедначија клупскиот рекорд.
Бостон првата четвртина ја заврши со серија од неверојатни 23:1 за предност од 22 поени по 12 минути, а индиспонираниот тим од Калифорнија на пауза замина со понижувачки резултат 82:38.
Тимот од Масачусетс на почетокот на последната четвртина имаше рекордни 56 поени предност (118:62), а потоа тренерот Џо Мазула реши малку да ги поштеди „Воините“ и предвреме ги испрати своите ѕвезди на клупата. Вориорс го добија последниот период, но тоа секако не може да биде утеха за срамениот дебакл.
Џејлен Браун постигна 29 поени со по три скока и асистенции, Џејсон Тејтум додаде 27, а Пејтон Причард 19. Кај гостите Лестер Киносес со 17, Мозес Муди беа двоцифрени.со 11 и Џером Робинсон со 10 поени.
Најголемите ѕвезди на Голден Стејт Стеф Кари, Клеј Томпсон и Дрејмонд Грин заедно постигнаа 18 поени. Најдобриот шутер во историјата на НБА, Кари, натпреварот го заврши со четири поени, не погоди ниту една тројка, а имаше девет обиди.
Селтикси се во серија од 11 победи и со скор од 48-12 се лидери на Истокот и воопшто во лигата, додека Голден Стејт е деветти на Западот со 32-28.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Де Јонг го продолжи договорот со Барселона

Холандскиот фудбалер Френки де Јонг потпиша нов договор со Барселона, кој ќе го задржи на „Ноу Камп“ до 2029 година, објави каталонскиот клуб.
„Френки де Јонг ја продолжи соработката со фудбалскиот клуб Барселона до 2029 година. Холанѓанецот потпиша нов договор во среда во седиштето на клубот, во присуство на претседателот Џоан Лапорта, потпретседателот Рафаел Јусте, членот на одборот Џоан Солер, спортскиот директор Андерсон Луис де Соуза Деко, координаторот Бојан Кркиќ и други членови на спортската комисија“, се наведува во официјалното соопштение.
Како што објавија шпанските медиуми, новиот договор предвидува зголемена откупна клаузула, која сега изнесува 500.000.000 евра.
Де Јонг пристигна во Барселона од Ајакс во 2019 година.
За време на престојот во Барселона, тој ја освои титулата шампион на Шпанија, Купот на Кралот и Суперкупот.
Спорт
Чесите му врачија отказ на Иван Хашек

Иван Хашек (62) повеќе не е селектор на чешката фудбалска репрезентација, одлучи Чешката фудбалска асоцијација по неочекуваниот пораз од Фарските Острови во квалификациите за Светското првенство.
Хашек го презеде водството на чешката репрезентација во јануари 2024 година и во 21 натпревар оствари 11 победи, пет нерешени и пет порази. Неговиот наследник сè уште не е именуван.
Во неделата, Фарските Острови изненадувачки ја победија Чешка со 2:1, која три дена претходно во Прага одигра нерешено 0:0 со Хрватска.
Поранешната чешка фудбалска ѕвезда Павел Недвед го нарече настапот на Чесите против Фарските Острови „неприфатлив“, а медиумите го оценија како „срамен“ и истакнаа дека „изгубиле од рибари и столари“, алудирајќи на полупрофесионалниот статус на фарските фудбалери.
Бидејќи Чесите се втори во групата Л, со три бода помалку од водечката Хрватска, која има 16 бода и натпревар помалку, директен пласман на Светското првенство во 2026 е невозможен. За да ја престигнат Хрватска, на Чесите им е потребна исклучително убедлива победа против Гибралтар, како и порази од екипата на Златко Далиќ од Фарските Острови и Црна Гора.
За Чешка, победа против претпоследниот Гибралтар на 17 ноември би можела да обезбеди место во дополнителните квалификации. Три дена пред таа средба, тие играат пријателски натпревар против Сан Марино.
Спорт
УЕФА го менува квалификацискиот систем за Европското првенство

Челниците на УЕФА се воодушевени од тоа како сега изгледаат Европските купови, што започнаа консултации за воведување сличен формат и квалификациите за Европското првенство.
Како би изгледало тоа? Наместо сегашните 12 групи, во кои некои имаат по четири, некои пет учесници, сите би биле сместени во две групи. И би се играло според швајцарскиот модел, би имало две табели и најдобрите би оделе на Европското првенство.
Зошто промената? Според претседателот на УЕФА, Александар Чеферин, сегашниот квалификациски модел е застарен, предвидлив и неинтересен за телевизиските куќи.
„Претходно, дури и во Лигата на шампионите, знаевме, штом ќе започне групната фаза, кој ќе оди понатаму. Сега имаме неизвесност до последното коло“, објасни Чеферин.
Беа одржани првите разговори на таа тема, учествуваа 28 генерални секретари од европски земји.
„Сигурно е дека ќе има промени. Луѓето постојано бараат нешто ново, а кога ќе го започнете процесот на промена, веднаш сите викаат „не, не“. Не ни недостасува храброст, ќе разговараме со сите, сите ќе бидат вклучени. Форматот на Европското првенство нема да се промени, но квалификациите веројатно ќе се променат. Нема да има повеќе натпревари, само ќе биде понеизвесно“, објасни Чеферин за „Тајмс“.
Сепак, сето тоа нема да важи за квалификациите за следното Европско првенство, кое ќе се игра во 2028 година, туку потоа. Но, се чини дека е сигурно нешто што ќе се случи.