Спорт
(Видео) Шпанија – Бразил 3:3, судијата најлош актер на теренот
Спектакуларен натпревар на стадионот „Сантијаго Бернабеу“ во Мадрид одиграа Шпанија и Бразил, во кој најслаб актер беше судијата Антонио Нобре.
Бидејќи ова беше пријателски натпревар, Португалецот немаше помош од ВАР технологијата, поради што со неколку неразбирливи одлуки внесе нервоза кај играчите на двете репрезентации.
Се чини дека во финишот едвај го дочека стартот на Дани Карвахал над Галено за да го досуди третиот пенал на мечот, а само еден за Бразил (и единствениот оправдан).
Така, во шестата минута од судиското надополнување, Лукас Пакета од 11 метри го совлада Унаи Симон и го постави конечниот резултат: Шпанија – Бразил 3:3 (2:1).
Бразилците го прославија ова реми како да го освоиле светскиот шампионат, лути од арбитражата на Нобре.
Се започна со непостоечки пенал за домашните во 12. минута, кога младиот Јамин Џамал добро одглуми по стартот на Вендел, а кулминираше со уште еден пенал по сударот меѓу Карвахал и Андреас Переира во 87. минута.
Капитенот Родри ги реализираше пеналите за Шпанија, која имаше предност од два гола по половина час игра. Вториот гол за Шпанија на Дани Олмо беше вистинска минијатура.
Стрелец за Бразил беше и тинејџерот Ендрик, кој за неколку месеци ќе се пресели во Реал Мадрид.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Мбапе играч на годината во Франција
Килијан Мбапе е прогласен за најдобар фудбалер на француската Лига 1.
Напаѓачот на Пари Сен Жермен ја доби престижната награда петти пат по ред. Одлуката ја донесоа членовите на Здружението на француски фудбалери.
Во текот на сезоната, Мбапе постигна 44 гола во сите натпреварувања.
Лига 1 е единствената лига во која сум играл досега во кариерата и зазема многу важно место во мојот живот. Сигурно ќе ми недостига, но време е за ново поглавје во мојот живот“, изјави Мбапе на церемонијата на доделувањето на наградата што му ја врачи Мари-Жозе Пере, поранешна олимписка шампионка во атлетика.
Брилијантниот напаѓач неодамна го одигра последниот натпревар за Пари Сен Жермен против Тулуз, а следната сезона треба да игра за Реал Мадрид, иако тоа никаде официјално го нема потврдено.
Спорт
Лекарите нема да му дозволат на Синер да настапи на Ролан Гарос
Италијанскиот тенисер Јаник Синер веројатно нема да учествува на Ролан Гарос, објави „Газета дело Спорт“. Синер поради повреда не учествува на Мастерсот во Рим, а прашање е дали ќе игра на Ролан Гарос.
Одлуката треба да биде позната оваа недела.
Синер се наоѓа во Торино во клиниката што ја користи Јувентус и според првите информации играњето на Ролан Гарос може да му создаде долгорочен проблем на младиот Италијанец.
Според италијанските медиуми, се очекува тој да биде на теренот во среда кога ќе биде донесена одлуката дали ќе настапи на вториот грен слем во сезоната.
Италијанецот веќе изјави дека нема да ја загрози кариерата поради еден турнир и дека се чини дека повредата на колкот може да биде посериозна.
Според „Газета дело Спортt“, лекарите се многу блиску до одлуката да му забранат учество бидејќи тоа долгорочно би го загрозило неговото здравје.
Спорт
Рафаел Варан заминува од Манчестер јунајтед
Францускиот фудбалер Рафаел Варан (31) по крајот на сезоната ќе го напушти Манчестер јунајтед. Клубот објави дека нема да го продолжи договорот со Варан и дека фудбалеро може веднаш да преговара со други клубови.
Во 2021 година, Варан пристигна на „Олд Трафорд“ од Реал Мадрид за 34 милиони фунти и во меѓувреме одигра 93 натпревари за англискиот тим.
Со Јунајтед освои еден трофеј, Лига купот во 2023 година.
„Сите во клубот му се заблагодаруваат на Рафа за неговиот придонес и му посакуваат се најдобро во иднина“, соопшти клубот.
Варан пристигна во Јунајтед по серијата големи успеси со Реал, три трофеи во Ла Лига и четири во Лигата на шампионите.
Во 2018 година ја освои титулата светски шампион со Франција на Светското првенство во Русија.
Тој се повлече од репрезентацијата во февруари 2023 година.
Последниот натпревар за Јунајтед го одигра во април во поразот од Челзи 3:4, а оттогаш не игра поради повреда.