Анадолу Ефес доминираше на гости кај Барселона за да стигне до неверојатна 102:68 победа и да поведат со 2:1 во плејофот од Евролигата, доаѓајќи на еден триумф од место на фајнал форот.

Шејн Ларкин беше фантастичен за клубот од Истанбул, постигнувајќи 30 поени со 11-од-12 во шут од поле, а додаде и три скока и 2 асистенции во 23 минути на теренот. Предводени од Ларкин, гостите стигнаа до предност од 25 поени на крајот на третата четвртина (81:56), а Барса имаше уште полоши последни 10 минути. Следниот меч се игра в петок во Барселона.

И ЦСКА Москва стигна до импресивна гостинска победа, триумфирајќи со 84:77 на гости кај Басконија, каде што човек на одлука беше Нандо де Коло, кој имаше 28 поени за „армејците“.

ЕВРОЛИГА, ПЛЕЈОФ

(1:2) Басконија – ЦСКА Москва 77:84 (18:28, 21:18, 20:16, 18:22)

(1:2) Барселона – Анадолу Ефес 68:102 (20:26, 19:26, 18:32, 11:18)

Баерн Минхен се пласираше во финалето на ДФБ купот каде што ќе игра со РБ Лајпциг, откако во драматичен меч на „Весерстадионот“ го совлада Вердер Бремен со 3:2 со гол од пенал на Роберт Левандовски.

Баварците ја имаа контролата на резултатот, откако прво Левандовски во 36. минута донесе водство, а кога Томас Милер во 63. минута зголеми на 0:2, Баварците се понадеваа дека работата е веќе завршена. Меѓутоа, Вердер успеа да постигне два гола за само една минута, кога прво Јуја Осако во 74. минута намали на 1:2, пред Косовецот Милот Рашица да израмни минута подоцна!

Сепак, Баварците ќе се борат за двојната круна во Германија, откако во 80. минута беше досуден пенал, а Левандовски рутински го совлада голманот Јиржи Павленка.

Манчестер сити ја мина најголемата пречка која му стои на патот до трофејот од Премиер лигата, откако во дербито на градот во северна Англија со 2:0 го совлада Манчестер сити за да се врати на првото место со поен разлика пред Ливерпул на само три меча до крајот на сезоната.

Јунајтед пак, со овој пораз уште повеќе си ги намали шансите следната сезона да игра во Лигата на шампионите, и во корист му одат само слабите игри на Арсенал и Челси, но немаат време за очајување бидејќи веќе овој викенд играат со Челси во директна пресметка за топ 4 пласман.

Домаќините немаа лошо прво полувреме, во кое двете екипи играа динамично со многу шанси, но на крајот се покажа квалитетот на актуелните англиски шампиони. Бернардо Силва во 54. минута и Лирој Сане во 66. минута постигнаа убави голови за да го решат победникот и да донесат нова победа.

Тимот на Пеп Гвардиола сега има сѐ во своите раце на патот до титулата – остануваат три меча, и со три победи тие ќе ја одбранат титулата. Сити гостува кај Барнли  во недела, по што следуваат мечевите со Лестер дома и со Брајтон на гости. Ливерпул играат дома со Хадерсфилд, гостуваат кај Њукасл и ги пречекуваат Вулверхемптон во последното коло.

Јунајтед пак, ќе мора да се надева на подобра игра и на малку среќа за топ 4 пласман. Тотенхем се трети со 70, Челси четврти со 67, Арсенал петти со 66, а Јунајтед само шести со 64 поени. До крајот на сезоната тие викендов го пречекуваат Челси, а потоа играат со двата тима кои се веќе испаднати од лигата – гостуваат кај Хадерсфилд, и ги пречекуваат Кардиф во последното коло.