Спорт
Во Екерен статуа на Алдервајрелд наместо на Леополд Втори?
Белгискиот дефанзивец на Тотенхем, Тоби Алдервајрелд признава дека е почестен со петицијата на жителите на неговиот роден град Екерен да ја заменат статуата на поранешниот крал на Белгија, Леополд Втори со негов лик, но не верува дека тоа ќе се оствари.
Леополд Втори, кој беше крал на Белгија од 1885 до 1908 година, е мета на протестантите при анти-расистичките протести во оваа земја, поради ѕверствата кои беа направени во поранешната колонија Конго.
Околу 1.000 луѓе поднесоа петиција за да се постави статуа на 31-годишниот дефанзивец, но Алдервајрелд вели дека тоа не е сериозно.
„Мислам дека е шега, но луѓето навистина ја потпишуваат петицијата. Сепак, морам да кажам дека малку сум почестен. Се работи за мал град во Белгија и до мојата 15-т година одев во школо таму и секогаш се враќам. Ако сакаат да го направат тоа нема да се противам, но нема да ја потпишам сопствената петиција. Мислам дека од тие потпишаните, едно 80 отсто ми се познаници. Не верувам дека ќе заслужам статуа“, вели Алдервајрелд во интервју за „Гардијан“.
Тој не сакаше да влегува во дискусија дали треба да се отстрануваат историските споменици.
„Не знам дали е добро да е симне статуа и нема да се вклучувам во тоа, но добро е да се погледне кон историјата и да се научи нешто. Истото е со историјата и Светските војни. Секако, ми се гади од расистичките работи и никогаш нема да го разберам тоа, но да се тргнат сите статуи?“, вели Алдервајрелд.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Артета: Не се откажуваме од борбата за титулата

Арсенал не се откажува од борбата за титулата во Премиер лигата.
Така барем вели Микел Артета, иако предноста на Ливерпул е огромна. „Црвените“ имаат 11 бода и меч повеќе од Арсенал на девет кола пред крајот на првенството.
„Нема откажување од борбата за титулата. Само преку мене мртов“, истакна шпанскиот стручњак, а потоа дополнително објасни: „Ако престанам да верувам, ќе си одам дома. Математички се уште е можно“.
Арсенал во среда гостува кај Нотингем Форест во вонредно коло, додека лидерот Ливерпул го пречекува Њукасл.
Спорт
Гасперини се сели во Рим, по девет години ја напушта Аталанта

Џан Пјеро Гасперини (67) нема да го продолжи договорот со Аталанта. Искусниот тренер го предводи клубот од Бергамо од 2016 година. Под негово водство, тимот постојано е меѓу најдобрите во италијанскиот фудбал, редовен учесник во европските купови.
Во Серија А еднаш беа втори, три пати трети и двапати четврти. Најлошиот финиш на Аталанта под водство на Гасперини беше во сезоната 2021/22, кога беа осми. Минатата сезона беше најуспешна за нив, беа втори во италијанскиот шампионат и ја освоија Лигата на Европа.
Во тековната сезона го држи третото место на 12 кола до крајот на првенството. Заостанува два бода зад второпласираниот Наполи и три бода зад водечкиот Интер.
Единствената негативна страна е елиминацијата во осминафиналето на Лигата на шампионите против белгискиот Клуб Бриж.
Гасперини, чиј договор со Аталанта истекува во јуни следната година, во саботата потврди дека нема намера да го продолжи договорот.
Според италијанските медиуми, Гасперини од следната сезона ќе биде тренер на Рома.
Спорт
Влаховиќ чека понуда од Премиер лигата

Фудбалерот на Јувентус, Душан Влаховиќ ја одбил понудата на Фенербахче бидејќи сака летово да се пресели во некој од премиерлигашките клубови, објавија денеска италијанските медиуми.
„Тутоспорт“, објави дека Фенербахче е подготвен да му понуди на Влаховиќ плата од 12 милиони евра годишно од сезоната 2025/2026, колку што моментално заработува во Јувентус, но 25-годишниот српски репрезентативец не е заинтересиран да замине во Турција.
Влаховиќ се надева дека ќе добие понуда од Премиер лигата на крајот на сезоната.
Влаховиќ не постигнал договор со Јувентус за продолжување на соработката, поради што клубот има намера да ги слушне понудите од заинтересираните клубови.
Српскиот репрезентативец е најдобар стрелец на Јувентус оваа сезона, а во неделата првпат беше стартер во Серија А во 2025 година. Го постигна единствениот гол на натпреварот.
Поранешниот играч на Партизан и Фиорентина на 31 натпревар сезонава постигна 14 гола и имаше две асистенции.