Иако цела сезона се мачат со повредите на дефанзивците, кризата во нападот на Ливерпул продолжи откако и покрај поседот од речиси 70 отсто загубија на „Енфилд“ со 0:1 од Барнли, прекинувајќи ја неверојатната домашна низа на англискиот шампион од 2017 година.

Со 13 обиди на голот само во првото полувреме, Ливерпул најголемата шанса ја пропушти преку Дивок Ориги, кој излезе само пред голманот Поуп, но не го погоди голот, туку само пречката.

#Origi Nooooooooooooooooooooooooo pic.twitter.com/BeaK02pYNO

— @Khaltsha_tv (@Khaltsha_tv) January 21, 2021

Во второто полувреме, тој беше сменет со Мохамед Салах, а во игра влезе и Роберто Фирмино, но голот на Барнли остана сочуван, за во 81. минута да биде досуден пенал, кој Ешли Барнс го реализираше за Ливерпул да биде поразен дома првпат од 23 април 2017 година (кога Кристал палас победи со 2:1).

Ливерпул останува на четвртото место на табелата со 34 поени, дури 6 зад лидерот Манчестер јунајтед и 4 зад второпласираниот Манчестер сити, кој има натпревар помалку. Барнли пак, се 16-ти со 19 поени, седум над зоната за испаѓање.

Тоа што требаше да биде дуел на два различни каталонски клуба по големина, огромната Барселона и третолигашот Корнелја, на крајот стана неверојатен меч во кој прволигашот утна два пенали во регуларните 90 минути од 1/16 финалето на Копа дел реј и сега мора да игра продолженија за да избегне слична судбина како Реал, кои вчера испаднаа од Алкојано.

Прво во 39. минута, обидот од бела точка на Миралем Пјаниќ заврши во рацете на 21-годишниот голман на малиот каталонски клуб (кој игра на вештачка трева), Рамон Хуан Рамирез, за потоа во 79. минута, шанса за пласман да пропушти Усман Дембеле, кој имаше неверојатно лош обид во средината на голот за лесен плен за Хуан.

Ramon Juan Ramirez (Cornella) penalty save against Barcelona 80'pic.twitter.com/cx1cwQ0OcB

— noobfcb (@noob_fcb) January 21, 2021

Cornella vs Barcelona Second penalty miss Dembele pic.twitter.com/eEcG80fJss

— mignola arbeloa (@mignolaalvedon) January 21, 2021

По поразот од Црвена звезда, Реал Мадрид доживеа уште еден незгоден пораз во Евролигата, овојпат на гости кај Макаби Тел Авив, кои предводени од Тајлер Дорси стигнаа до 86:84 победа.

Дорси имаше 30 поени, 4 скока и 3 асистенции, за Макаби да се одмазди за поразот во деветтото коло во Мадрид (79:63) и да го подобри скорот на 10-11 во трка за место во плејофот. Треј Томпкинс ги предводеше „кралевите“ со 20 поени, 6 скока и 4 асистенции, Алберто Абалде додаде 13, а Реал падна на 13-8 скор.

Зенит Санкт Петерсбург, пак, за малку ќе пропуштеше предност од 23 поени во второто полувреме, но сепак, стигна до 85:78 победа над Анадолу Ефес, прекинувајќи ја низата од три победи на турскиот клуб.

Вил Томас имаше 10 поени во првата четвртина и заврши со 14, додека Остин Холинс и Кевин Пангос имаа по 13 поени. Василије Мициќ имаше 23 поени, 5 скока и 4 асистенции за Ефес, а Шејн Ларкин стигна до 20.

ЕВРОЛИГА, 21.КОЛО

Зенит Санкт Петерсбург – Анадолу Ефес 85:78 (28:15, 25:16, 11:24, 21:23)

Панатинаикос – Химки 94:78 (23:20, 23:13, 24:18, 24:27)

Макаби Тел Авив – Реал Мадрид 86:84 (24:33, 21:13, 18:20, 23:18)

Асвел Лион – Валенсија 90:77 (17:17, 23:17, 21:20, 29:23)

Армани Милано – Баерн Минхен 75:51 (20:10, 22:10, 21:15, 12:16)